«بولاشاق» باعدارلاماسىنا قۇجات قابىلداۋ باستالدى

قابىلداۋ ءتورت كەزەڭنەن تۇرادى.

بيىلعى «بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋعا قۇجاتتار قابىلداۋ باستالدى، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگى باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، ءتورت كەزەڭنەن تۇراتىن قۇجات قابىلداۋدىڭ العاشقى كەزەڭى 27 قاڭتارعا دەيىن جالعاسادى.

ەكىنشى كەزەڭ 2023 جىلعى 3 ءساۋىر مەن 28 ءساۋىر ارالىعىندا، ودان كەيىن 5 ماۋسىم مەن 7 شىلدە ارالىعىندا جانە 17 شىلدە مەن 15 قىركۇيەك ارالىعىندا جۇرگىزىلەتىن بولادى.

كونكۋرستىق ىرىكتەۋ 2023 جىلعى 20 قاڭتار مەن 31 جەلتوقسان ارالىعىندا وتەدى. وتىنىمدەر Egov.kz مەملەكەتتىك قىزمەتتەر پورتالى ارقىلى قابىلدانادى.

بيىل ماگيستراتۋرا جانە رەزيدەنتۋرا باعدارلامالارىنا 395 ستيپەنديا، دوكتورانتۋراعا 50 ستيپەنديا، تاعىلىمدامادان ءوتۋ ءۇشىن 110 ستيپەنديا ءبولىندى. ۇسىنىلاتىن جوو-لار ءتىزىمى الەمنىڭ 27 ەلىنەن 236 ۋنيۆەرسيتەتتى قامتيدى. باسىم ماماندىقتار تىزبەسىنە 262 ماماندىق كىردى.

پرەزيدەنت قاسىم-جومارت توقايەۆتىڭ «بولاشاق» باعدارلاماسىن قايتا باعدارلاۋ جونىندەگى تاپسىرماسى بويىنشا «ينجەنەرلىك-تەحنيكالىق ماماندار» جەڭىلدىك ساناتى بەكىتىلدى.

سونىمەن قاتار، مەديسينالىق قىزمەتكەرلەر ءۇشىن جەڭىلدىك ساناتى ەنگىزىلدى. كۆوتالىق ساناتتاردىڭ تەگىن تىلدىك دايىندىقتان ءوتۋ مۇمكىندىگى بار. سونداي-اق ولار قۇجات تاپسىرعان كەزدە شەتەلدىك جوو-عا ءوز بەتىمەن تۇسۋگە مىندەتتى ەمەس. ولار وقۋ ورنىن ستيپەنديا تاعايىندالعاننان كەيىن باعدارلاما اياسىندا وقۋعا ۇسىنىلاتىن جوو-لار تىزىمىنەن تاڭداي الادى.

جەتەكشى شەتەلدىك جوعارى وقۋ ورنىنان شارتسىز شاقىرۋى بار ۇمىتكەرلەر عانا «بولاشاق» ستيپەندياسىن تاعايىنداۋ كونكۋرسىنا قاتىسا الادى. ولارعا جەڭىلدىگى بار كانديداتتار جاتپايدى.