ءبىلىم جانە عىلىم ءمينيسترى اسحات ايماعامبەتوۆ «بولاشاق» باعدارلاماسىنىڭ 28 جىلدىعىمەن قۇتتىقتادى، دەپ حابارلايدى Almaty.kz 24.kz-كە سىلتەمە جاساپ
«بولاشاق» ستيپەندياسى — ق ر تۇڭعىش پرەزيدەنتى، ەلباسى نۇرسۇلتان نازاربايەۆتىڭ باستاماسىمەن قولعا الىنعان بىرەگەي ستراتەگيالىق جوبا. باعدارلاما جۇزەگە اسىرىلىپ كەلە جاتقان 28 جىلدىڭ ىشىندە 14 مىڭنان استام قازاقستاندىق الەمنىڭ ۇزدىك جوعارى وقۋ ورىندارىندا ءبىلىم الۋ مۇمكىندىگىنە يە بولدى.
بۇگىندە «بولاشاق» تۇلەكتەرى ءتۇرلى سالالاردا ەڭبەك ەتىپ، ەل دامۋىنا ەلەۋلى ۇلەس قوسۋدا. ماسەلەن، 800-گە جۋىق ستيپەنديات دەنساۋلىق ساقتاۋ سالاسىندا قىزمەت اتقارادى جانە جىل سايىن ونداعان مىڭنان استام كۇردەلى وتا جاسايدى. ءبىلىم بەرۋ سالاسى ءۇشىن دە 800-دەن استام مامان دايىندالدى.
ولار ءارتۇرلى دەڭگەيدەگى ءبىلىم بەرۋ ۇيىمدارىندا، ونىڭ ىشىندە اۋىلدىق جەرلەردە دە جۇمىس ىستەيدى. باعدارلاما تۇلەكتەرى العان بىلىمدەرىن ءىس جۇزىندە قولدانىپ، عىلىم، ەكونوميكا، جۋرناليستيكا، مادەنيەت، يننوۆاسيالار مەن تەحنولوگيالار، مەملەكەتتىك باسقارۋ جانە باسقا دا سەكتورلاردىڭ دامۋىنا ەڭبەك ۇلەستەرىن قوسىپ كەلەدى.
وزىق عىلىمي تەحنولوگيالاردى ترانسفەرتتەۋ ءۇشىن پرەزيدەنت قاسىم-جومارت توقايەۆ الەمنىڭ جەتەكشى زەرتتەۋ ورتالىقتارىندا جىل سايىن 500 عالىمنىڭ تاعىلىمدامادان ءوتۋىن قامتاماسىز ەتۋدى تاپسىردى. بۇل ءۇشىن عالىمدارعا ارنالعان تاعىلىمدامالار جاڭا ساناتى بەكىتىلدى. «بولاشاق» باعدارلاماسىنىڭ 28 جىلدىعىمەن قۇتتىقتايمىن. بۇگىندە ەلىمىزدىڭ تالانتتى جاستارىنا قولداۋ كورسەتىپ كەلە جاتقان «بولاشاق» ستيپەندياسى دۇنيەجۇزىنە تانىلعان قازاقستاندىق برەندكە اينالىپ وتىر».