بولاشاعىن ويلاعان ەل جولىن جوندەيدى

ەلىمىزدىڭ باسقا وڭىرلەرىنەن كورى، مەگاپوليس الماتى حالقىنىڭ كوپ ۋاقىتى جولدا وتەدى. جول – قايناعان ءومىر. سوندىقتان جولدىڭ ءقادىرىن ءبارىمىز تۇسىنەمىز. اسىرەسە، مەگاپوليس تۇرعىندارى جولعا ەرەكشە ءمان بەرەدى. الماتىلىقتار الدىمەن جولدىڭ ساپالى بولعانىن قالايدى. الايدا سول جولدى سالۋشى كومپانيالار جۇمىستارىنا سالعىرت قاراۋدىڭ ارقاسىندا قالا تۇرعىندارىنىڭ جۇيكەسىنە سالماق تۇسىرەدى.
 
«قارعىس الما، العىس ال»، - دەگەن بابالارىمىز. ءار ءىسىمىز العىس الارلىقتاي بولسا عوي، شىركىن! كوكتەم شىققاننان باستاپ الماتى كوشەلەرىندە جوندەۋ جۇمىستارىنا بايلانىستى كەپتەلىس باستالادى.  جىلدا ءبىر كورىنىس، نەگە؟ ويتكەنى، جول جوندەۋشى كومپانيالار ساپاعا ءمان بەرمەۋدە. بۇگىنگى تاڭدا جول ساپاسىنا جاۋاپتى «جول اكتيۆتەرىنىڭ ۇلتتىق ساپا ورتالىعى» جاۋاپسىز مەردىگەرلەردى تارتىپكە شاقىرىپ وتىرادى. اتالعان ورتالىقتىڭ الماتى فيليالىنىڭ باسشىسى اسحات ۇسەنوۆپەن جول ساپاسىنا قاتىستى اڭگىمەلەسكەن ەدىك. 
- بولاشاعىن ويلاعان ەل جولىن جوندەيدى. بۇگىنگى تاڭدا قالا اكىمى ەربولات دوسايەۆ جول ساپاسىنا ەرەكشە ءمان بەرىپ كەلەدى. شىنىندا بۇرىنىراق، الدىمەن جول جاسالىپ، ارتىنان كوممۋنالدىق جەلىلەر جۇرگىزىلەتىن. ناتيجەسىندە جول ساپاسى بۇزىلاتىن. قازىرگى كەزدە الدىمەن كوممۋنيكاسيالاردى جۇرگىزىپ الىپ، ارتىنان جول جابىندىسى توسەلەتىن بولدى. دەمەك، جول جوندەۋشى كومپانيا ءوز جۇمىسىنا سالعىرت قاراۋعا نەگىز جوق. 
قالا اكىمىنىڭ ۇسىنىسىمەن بۇگىنگى تاڭدا جول جوندەۋ، كوگالداندىرۋ ماسەلەسىنە بولىنەتىن قارجىنى اۋداندارعا ءبولىپ بەردى. بۇل وتە ءتيىمدى. ەندى بۇل جاعىنان اۋدان ءوزى شەشىم شىعارىپ، جول ساپاسىنا كوڭىل ءبولۋى ءتيىس. وسى رەتتە قالا باسشىلىعى بىزگە جول ساپاسىن تەكسەرۋگە نەمەسە باقىلاۋعا الۋدى سەنىپ تاپسىردى. ويتكەنى، ءبىزدىڭ ورتالىق تىكەلەي جولعا قاتىستى. بىزدە ارنايى زەرتحانا بار. وندا توسەلگەن اسفالتتىڭ قۇرامىن، تاپتاۋ كەزىندەگى قىسىمدى دا بىلۋگە بولادى. سوندىقتان بۇگىنگى تاڭدا قالانىڭ ءاربىر اۋدانىمەن كەلىسىمشارت جاسالۋدا. ازىرگە اۋەزوۆ، الاتاۋ، المالى اۋداندارى بىزبەن كەلىسىمشارتقا وتىرۋعا قۇلىقسىزدىق تانىتىپ وتىر. قالعان اۋداندار بىزگە وزدەرى قاي جەردە قانداي جول سالىپ جاتقانى تۋرالى اقپارات بەرەدى. ءبىز سول بويىنشا جوندەۋ جۇرگىزىپ جاتقان كوشەلەرگە بارىپ، جۇمىستىڭ ساپالى نەمەسە كەمشىن كەتىپ جاتقانىن انىقتايمىز. سونان كەيىن اكىمشىلىككە ياعني تاپسىرىس بەرۋشىگە حات جازىپ جولدايمىز. 
-تەحنيكالىق قاداعالاۋشى قىزمەتى دە مەملەكەتتىك ساتىپ الۋ پورتالىندا جولداناتىن. ونى ۇتىپ العان كومپانيا قاداعالاۋشى ەدى. ەندى ولاردىڭ جۇمىسى قىسقاردى ما؟
-جوق قىسقارعان جوق. ول زاڭعا سايكەس جۇرگىزىلە بەرەدى. تەك كەيىنگى كەزدەرى تەحنيكالىق قاداعالاۋشى جۇرگىزىلىپ جاتقان جۇمىستىڭ باسىندا بولمايدى. ناتيجەسىندە جۇمىس ءوز دەڭگەيىندە جۇرمەيدى. مىنە، ءبىزدىڭ ماماندار وسىنداي كەمشىلىكتەردى حاتتا كورسەتىپ ءتيىستى ورىندارعا جولدايمىز. 
- بيىلعى جىلعا جاۋاپقا تارتىلعان كومپانيالار بار ما؟
- جاڭا ءسوز ەتكەن بويىنشا الدىمەن اۋداندارمەن كەلىسىمشارتقا وتىرۋىمىز كەرەك. كەلىسىمشارتقا وتىرعان اۋدانداردا جۇمىستار ەندى باستالدى. سوندىقتان جۇمىسىنا سالعىرت قاراعان كومپانيالاردى جاۋاپقا تارتاتىن بولامىز. 
ۋاقىت ءبولىپ ارنايى سۇقبات بەرگەنىڭىزگە راحمەت! جۇمىسىڭىزعا ساتتىلىك تىلەيمىز!