بوكستان ءاچ: قازاقستان مەدالدار كەستەسىندە نەشىنشى ورىن الدى

ءتورت التىنمەن ءۇندىستان كوش باستادى

ءۇندىستاننىڭ نيۋ-دەلي قالاسىندا بوكستان ايەلدەر اراسىندا وتكەن الەم چەمپيوناتىندا قازاقستان قۇراماسىنىڭ مەدالدار كەستەسىندە نەشىنشى ورىن العانى انىقتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستاندىق قىزدار بىرىنشىلىكتە 2 كۇمىس، 4 قولا جۇلدەگە يە بولىپ، مەدالدار كەستەسىندە 8-ساتىدان كورىندى.

ءتورت التىنى بار ءۇندىستان كوش باستاسا، جۇڭگو (3 التىن، 1 كۇمىس، 3 قولا) ەكىنشى، رەسەي (1 التىن، 1 كۇمىس، 1 قولا) ءۇشىنشى ورىندا. 2023 جىلعى الەم چەمپيوناتىنىڭ مەدالدار كەستەسى:

1. ءۇندىستان — 4-0-0

2. جۇڭگو — 3-1-3

3. رەسەي — 1-1-1

4. يتاليا — 1-1-0

5. ماروككو — 1-0-1

5. تايۆان — 1-0-1

5. برازيليا — 1-0-1

8. قازاقستان — 0-2-4

9. كولۋمبيا — 0-2-2

10. اۋستراليا — 0-2-1

11. مونعوليا — 0-1-1

11. تايلاند — 0-1-1

13. ۆەتنام — 0-1-0

14. فرانسيا — 0-0-3

15. بەلارۋس — 0-0-1

15. وڭتۇستىك كورەيا — 0-0-1

15. ازەربايجان — 0-0-1.

سونىمەن قاتار قازاقستاندىق بوكسشىلاردىڭ قانشا تابىس تاپقانى بەلگىلى بولدى.

كۇمىس العان كارينا يبراگيموۆا (57 كگ) مەن ءلاززات كۇنگەيبايەۆاعا (+81 كگ) 50 مىڭ دوللاردان تيسە، قولا جۇلدەگەرلەر الۋا بالقىبەكوۆا (48 كگ)، نادەجدا ريابەس (66 كگ)، ۆالەنتينا حالزوۆا (75 كگ) جانە فاريزا شولتايعا (81 كگ) 25 مىڭنان بۇيىردى. ءبارىن قوسقاندا، قازاقستاندىقتار حالىقارالىق بوكس قاۋىمداستىعىنان (IBA) 200 مىڭ اقش دوللارىن الادى.

الەم چەمپيوناتىنا قازاقستاننان بارلىعى 12 سپورتشى بارسا، نازىم قىزايباي (50 كگ)، جازيرا وراقبايەۆا (52 كگ)، جاينا شەكەربەكوۆا (54 كگ)، ريمما ۆولوسەنكو (60 كگ)، ايدا ابىكەيەۆا (63 كگ) جانە ءمادينا نۇرشايەۆا (70 كگ) جۇلدەسىز قالدى.

ەسكە سالا كەتەيىك، بۇدان بۇرىن كارينا يبراگيموۆانىڭ بوكستان الەم چەمپيوناتىنىڭ كۇمىس جۇلدەگەرى اتانعانىن جازعان بولاتىنبىز.

سونداي-اق ءلاززات كۇنگەيبايەۆانىڭ التىن ءۇشىن رينگكە شىعاتىنى حابارلاندى.

بوكسشى ءلاززات كۇنگەيبايەۆا الەم چەمپيوناتىنىڭ كۇمىس جۇلدەگەرى بولدى.