قازاقستاندىق بوكسشى بەيبىت شۇمەنوۆكە جاريالانعان مەملەكەتارالىق ىزدەۋ كۇشىن جويدى.
بەيبىت شۇمەنوۆكە قاتىستى استانا قالاسى ەسىل اۋدانىنىڭ پوليسيا باسقارماسى قىلمىستىق كودەكستىڭ 293-بابى 2-بولىگى 2-تارماعىنا سايكەس سوتقا دەيىنگى تەرگەپ-تەكسەرۋ جۇرگىزدى، دەپ حابارلايدى Almaty-akshamy.kz Kazinform اگەنتتىگىنە سىلتەمە جاساپ.
«قازىرگى ۋاقىتتا تەرگەۋ ناتيجەسى بويىنشا جانە جابىرلەنۋشىلەردەن كەلىپ تۇسكەن كەشىرىم بەرۋ ارىزى نەگىزىندە بەيبىت شۇمەنوۆكە قاتىستى قىلمىستىق ءىس جانە قىلمىستىق قۋدالاۋ تاراپتاردىڭ تاتۋلاسۋىنا بايلانىستى قىسقارتىلدى. ق ر قىلمىستىق كودەكسىنىڭ 68-بابى 1-بولىگىنە سايكەس، قازاعا ۇشىراتۋمەن بايلانىستى ەمەس جانە ونشا اۋىر ەمەس نەمەسە اۋىرلىعى ورتاشا قىلمىس جاساعان ادام جابىرلەنۋشىمەن، ارىز بەرۋشىمەن تاتۋلاسسا، ونىڭ ىشىندە مەدياسيا تارتىبىمەن تاتۋلاسسا، سونداي-اق كەلگەن زالالدى وتەسە، قىلمىستىق جاۋاپكەرشىلىكتەن بوساتىلادى»، — دەلىنگەن اگەنتتىك جولداعان ساۋالدىڭ جاۋابىندا.
سونداي-اق، ىشكى ىستەر مينيسترلىگى وزگە اقپاراتتىڭ جاريا ەتۋگە جاتپايتىنىن جانە تەرگەۋ ناتيجەسىمەن قىلمىستىق پروسەسكە قاتىسۋشىلار عانا تانىسۋعا قۇقىلى ەكەنىن حابارلادى.