سابىرلى ادام - التىن ادام
جاھاننىڭ قارىشتاپ دامىپ بارا جاتقان مەملەكەتتەرىندە اشۋدى تەجەۋگە بايلانىستى ءتۇرلى ادىس-تاسىلدەردى ۇيرەتەتىن سەمينارلار وتەدى. سولاردىڭ كوشىن كۇنشىعىس ەلى جاپونيا، قيىر شىعىستاعى وڭتۇستىك كورەيا باستاپ تۇر. دالىرەك ايتساق، ولاردا ارنايى ورتالىقتار بار. وندا شىنى سىندىرىپ، بالعالاپ، بويىڭىزداعى سترەستى تىسقا شىعاراسىز. وسىعان قاتىستى ساۋالناما جۇرگىزگەن ەدىك.
ايسارا ابىكەن،
ستۋدەنت:
– وزدەرىڭىز بىلەتىندەي، ستۋدەنتتىڭ نەگىزگى تىرشىلىگى – وقۋ. اسىرەسە، ەمتيحاندا قوبالجيمىز. ال قالعان ۋاقىتتا شاكىرتاقىنى كۇتەمىز. ونى دا ۇنەمدەپ جاراتۋ قاجەت. ايتپەسە، الماتىداي الىپ مەگاپوليستە اش قالاسىز. مۇندا اركىم وزدى-وزىمەن. سوندىقتان قوسىمشا جۇمىس جاسايمىن. بىزدەر بۋكلەتتەر، كوشىرمە، قاعاز باسۋ ىسىمەن اينالىسامىز. قاراپ جۇرگەننەن گورى ءىس قىلساڭىز، قالتاڭىزعا قاراجات تۇسەدى. جالپى، ءوزىمدى قاتتى كۇيزەلىسكە تۇسىرمەيمىن. ولاي بولعاننان ەشتەڭە شىقپايدى. قالىپتى، ءومىر سۇرگەندى دۇرىس كورەم.
ەرجىگىت ايدار،
داياشى:
– وتە ماڭىزدى سۇراق قويدىڭىز. XXI عاسىردىڭ اكتۋالدى تاقىرىبى دەپ بىلەم. نەگە دەسەڭىز؟ ويتكەنى، ءبارى قاربالاس. پاندەميا جاعدايىندا داياشى بولىپ ىستەۋگە تۋرا كەلدى. ءقازىر حالىقارالىق قاتىناستار ماماندىعىندا وقۋدامىن. ساباق ونلاين، 3 كۋرستامىن. اراسىندا دجي-دجيتسۋعا بارامىن. سپورتتىق سەكسياعا قاتىسقاندى جاقسى كورەمىن. سوندا دوستارىممەن جەكپە-جەككە شىعىپ، اشۋدى تارقاتىپ الامىن. ال، داياشىلىق قىزمەتتە نەشە ءتۇرلى ادامدى كورەسىز. قىسقاسى، جۇيكەڭ مىقتى بولۋى كەرەك. مەنىڭشە، ەر جىگىت بارلىق جاعىنان مىقتى جۇرگەنى ءجون.
بيبىگۇل شارابەكوۆا،
پسيحولوگ:
– قازىرگى تاڭدا كوپشىلىگىمىزدە «ەگو» باسىم. مەنمەنشىلدىك حالقىمىزدىڭ مەنتاليتەتىندە قۇپتالمايدى. ال شەتەلدە قالىپتى سانالادى. ءبىراق، ءبىزدىڭ ءوز جولىمىز بار. اباي اتامىز «وزىڭە سەن، ءوزىڭدى الىپ شىعار، اقىلىڭ مەن قايراتىڭ ەكى جاقتاپ» دەپ ناقىل قالدىرعان ەكەن. ءدال وسى ءتامسىل بۇگىنگى كۇنگە ءدوپ كەلۋدە. ادامنىڭ عۇمىرىنىڭ بەلگىلى شكالاسى بار. سوندىقتان ەڭسەڭدى كوتەرىپ، جادىراپ ءومىر سۇرۋگە كەڭەس بەرەمىن. قالعانى ءوز جايىن تابادى.
ءاناپيا قالدىبايەۆ،
زەينەتكەر:
– بالام، الدىڭداعى اتاڭ تالايدى كوردى. جاسىم 70-تەن استى. قىزمەتتى دە ىستەدىك. سونداعى مەنىڭ تۇيگەنىم، جىگەرلى، تەمىردەي بەرىك، قۇرىشتاي قارۋلى ادام بولۋ قاجەت-اۋ. مايدا مەن شۇيدەنى تەرمەگەن ابزال. مۇنداي ادامدىققا جات. ساعان قول سوزعان، دەمەگەن جانداردى ۇمىتپا. تىك ءجۇر، نىق سويلە. سوندا الدىڭ جارىق، قادامىڭ گۇلگە اينالادى. كوپشىلىك جاستارعا رازىمىن. بىرنەشە جەردە جۇمىس جاسايدى، ءبىر جاعىنان وقيدى. مىنەكەي، سونداي قاراكوزدەرىمىزدى ناعىز شىڭدالۋ ۇستىندەگى ورەندەر دەپ سانايمىن. اينالايىندار، اشۋعا بوي الدىرماڭدار. تەك العا، ماقساتقا جەتپەي ايالداماڭدار!
زامانىندا ايتەكە بي بابامىز «اشۋ دەگەن – اعىن سۋ، اقىل دەگەن - داريا» دەپ قاناتتى ءسوز قالدىرىپتى. قانداي عاجاپ ايتىلعان دۇنيە! جوعارىداعى پىكىرلەردى ۇشتاستىرعاندا، سوعان بارادى. از عانا عۇمىردا تاتۋلىق پەن بىرلىكتە عۇمىر كەشكەنگە ەشتەڭە جەتپەيدى دەمەكپىز.