ءىىم سوڭعى ۋاقىتتا ينتەرنەتتە پرانك جانە ەكسترەمالدى كورىنىستەر بەينەلەنگەن ۆيدەولار ءجيى تارالىپ جاتقانىن اتاپ ءوتتى، دەپ حابارلايدى aqshamnews.kz
- مۇنداي ويىندار مەن ءقاۋىپتى تريۋكتەر الەۋمەتتىك جەلىلەردە "حايپ" ءۇشىن جاسالۋدا. وكىنىشكە قاراي، "لايك پەن قارالىم ءۇشىن جارىس" ءازىل-قالجىڭ مەن دۇرىس كوڭىل كوتەرۋدىڭ شەڭبەرىنەن شىعىپ كەتۋدە. اۆتورلار ەشكىمگە زيان كەلتىرمەيتىن كونتەنتتىڭ ورنىنا اگرەسسيا، ارانداتۋ، زورلىق-زومبىلىق كورسەتىپ، ومىرگە ءقاۋىپ توندىرەتىن ارەكەتتەرگە بارىپ جاتىر. مۇنداي ارەكەتتەر جالپىعا ءقاۋىپتى جانە قوعامدىق ءتارتىپتى بۇزادى. جىل باسىنان بەرى وسىنداي دەرەكتەر بويىنشا 24 ادام اكىمشىلىك جاۋاپكەرشىلىككە تارتىلدى، دەيدى ءىىم رەسمي وكىلى شىڭعىس الەكەشيەۆ.
الەكەشيەۆ ناقتى مىسالداردى كەلتىردى.
- مىسالى، استانادا بلوگەرلەر ليفت ىشىندە "ءمايىت" تاسىپ جانە بالتامەن شابۋىل جاساپ، ۆيدەو تۇسىرگەن. بۇل ۆيدەو جولاۋشىلاردىڭ ۇرەيىن ۇشىرىپ، قاتتى قورقىنىش تۋدىردى. اتالعان قاتىگەز پرانكتىڭ بارلىق قاتىسۋشىلارى 15-تەن 30 تاۋلىككە دەيىن اكىمشىلىك قاماۋعا الىندى. الماتى وبلىسىندا ەكسترەمالدى ۆيدەو ءتۇسىرۋ كەزىندە جاس جىگىت كەلە جاتقان كولىكتىڭ ۇستىنەن سەكىرمەك بولدى. وكىنىشكە قاراي، بۇل ارەكەت قايعىمەن اياقتالدى — ول اۋىر جاراقات الىپ، كوز جۇمدى. مۇنداي ازىلدەر ءقاۋىپتى عانا ەمەس، سونىمەن قاتار ادەپ نورمالارىنا سايكەس كەلمەيدى، قوعامدىق ءتارتىپتى بۇزىپ، قاۋىپسىزدىككە قول سۇعىپ، ورنى تولماس سالدارعا اكەلۋى مۇمكىن. بۇل كورىنىستەردىڭ كۋاگەرلەرى كوبىنە شوك الىپ، كۇيزەلىسكە ۇشىرايدى. ال ورىنداۋشىلار ءوز ومىرلەرىن قاتەرگە تىگەدى، دەيدى الەكەشيەۆ.
ىشكى ىستەر مينيسترلىگى ەسكەرتۋ جاسادى.
- قوعامدىق ءتارتىپتى ورەسكەل بۇزاتىن، دۇربەلەڭ تۋعىزاتىن نەمەسە زيان كەلتىرەتىن، سونداي-اق ادامنىڭ ار-نامىسىن قورلايتىن ارەكەتتەر ءۇشىن اكىمشىلىك جانە قىلمىستىق جاۋاپكەرشىلىك كوزدەلگەن. بلوگەرلىك پەن كامەراعا ءتۇسىرۋ قۇقىق بۇزۋعا سىلتاۋ بولماۋى كەرەك. قاتىگەز پرانكتەر مەن ءقاۋىپتى تريۋكتەر — بۇل ونەر ەمەس، بۇل — زاڭ بۇزۋشىلىق. ءبىز وسىنداي كونتەنت اۆتورلارىنا ۇندەۋ جولدايمىز: كۇماندى كورىنىستى تۇسىرمەس بۇرىن نەمەسە وعان قاتىسپاس بۇرىن سالدارىن وي ەلەگىنەن وتكىزىڭىز؛ ومىردە دە، ينتەرنەتتە دە وزگەلەردىڭ سەزىمىن، قاۋىپسىزدىگىن جانە جەكە شەكاراسىن قۇرمەتتەڭىز. زاڭدى ساقتاڭىزدار جانە قۇقىقتىق جاۋاپكەرشىلىككە اكەلەتىن ارەكەتتەرگە بارماڭىزدار، - دەدى دەپارتامەنت باستىعى - ءىىم رەسمي وكىلى شىڭعىس الەكەشيەۆ.