قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا ونلاين-جارنامانى تاڭبالاۋ قاعيدالارىن بەكىتۋ تۋرالى بۇيرىققا قول قويدى، دەپ حابارلايدى اlmaty-akshamy.kz
بۇيرىققا سايكەس، «ونلاين-پلاتفورمالار جانە ونلاين-جارناما تۋرالى» زاڭعا سايكەس ونلاين-جارناما تاڭبالاۋعا جاتادى.
«كونتەنتتە اكسيالار جاسالعان جانە باعاسى تومەندەتىلگەن تاۋارلارعا، جۇمىستارعا نەمەسە كورسەتىلەتىن قىزمەتتەرگە سىلتەمەلەر، سونداي-اق ينتەرنەت-رەسۋرستارعا، جارناما بەرۋشىنىڭ نەمەسە جارناما تاراتۋشىنىڭ ونلاين-پلاتفورمالارداعى اككاۋنتتارىنا سىلتەمەلەر قامتىلسا، ونلاين-جارناما تاڭبالانۋعا جاتادى»، – دەپ جازىلعان بۇيرىقتا.
تاڭبالاۋ ونى سايكەستەندىرۋ مۇمكىندىگىمەن ماتىندىك فورماتتا جۇزەگە اسىرىلۋى كەرەك. ەگەر ونلاين-جارناما دىبىستىق نەمەسە اۋديوكورنەكى نىساندا تاراتىلعان جانە ورنالاستىرىلعان بولسا، تاڭبالاۋ ونلاين-جارنامانىڭ الدىندا جۇزەگە اسىرىلۋعا ءتيىس. ياعني تاڭبالاۋدا ورنالاستىرىلعان ماتەريالدىڭ جارناما ەكەندىگى تۋرالى ماتىندىك نۇسقاما بولۋى شارت.
ماتىندىك نۇسقاما مىناداي تۇجىرىمدامالاردىڭ ءبىرىن قامتيدى.
ەندى بلوگەرلەر جارنامانى ارنايى مينيسترلىك بەكىتكەن ماتىنمەن تاڭبالاۋى ءتيىس. ونلاين جارناما:
- «جارناما»؛
- «جارنامالىق ماتەريال»؛
- «سەرىكتەستىك ماتەريال»؛
- «دەمەۋشىلىك ماتەريال»؛
- «جارناما قۇقىعىندا»؛
- «دەمەۋشىمەن تولەنگەن»؛
- «PR قۇقىعىندا» دەپ بەلگىلەنىپ وتىرادى.
قۇجاتتا لەزدىك حابار الماسۋ سەرۆيسىندە ورنالاستىرىلاتىن ونلاين-جارناما مەن تەلەراديوارنالاردىڭ ونلاين-پلاتفورمالارداعى اككاۋنتتارىندا ورنالاستىرىلعان تەلە-راديو باعدارلامالارداعى نەمەسە ولاردىڭ فراگمەنتتەرىندەگى جارناما، الەۋمەتتىك جارناما تاڭبالانۋعا جاتپايتىنى جازىلعان.
كۇزدە مەملەكەتتىك كىرىستەر كوميتەتى قازاقستاندا «ونلاين-پلاتفورمالار جانە ونلاين-جارناما تۋرالى» زاڭ كۇشىنە ەنگەننەن كەيىن 44 بلوگەردىڭ 42،5 ملن تەڭگە سالىق جانە الەۋمەتتىك تولەمدەر تولەگەنىن حابارلادى.
ۆەدومستۆو بلوگەرلەر تولەگەن سالىقتاردىڭ جالپى سوماسى 2024 جىلدىڭ ءساۋىر ايىندا، ولار جىل قورىتىندىسى بويىنشا كىرىستەر تۋرالى دەكلاراسيانى ۇسىنعان كەزدە بەلگىلى بولاتىنىن اتاپ ءوتتى.
كوميتەتتىڭ 2023 جىلعى 15 قازانداعى مالىمەتى بويىنشا، بىردە-بىر بلوگەردىڭ سالىقتار مەن الەۋمەتتىك تولەمدەر بويىنشا قارىزى جوق. الايدا 23 بلوگەرمەن جۇمىس جۇرگىزىلۋدە. ەگەر ولار ءوز مىندەتتەمەلەرىن ورىنداماسا، ولارعا ايىپپۇل سالىنىپ، تابىسىنىڭ نەمەسە مۇلكىنىڭ ءبىر بولىگى تاركىلەنۋى مۇمكىن.