ءتۇرلى اقپاراتتىق جانە ساياسي قىسىمدارعا قاراماستان اقش مەملەكەتتىك حاتشىسى قىتايعا ساپارلاي باردى. بۇل ونىڭ ءوز لاۋازىمىنا كىرىسكەننەن بەرگى قىتايدا العاش رەت رەسمي كەزدەسۋ وتكىزۋى. قىتايلىق ارىپتەسى سين گانمەن كەزدەسۋدە تاراپتار از دا بولسا ديپلوماتيالىق العا جىلجىۋعا قول جەتكىزدى.
اقش مەملەكەتتىك حاتشىسى ەتنوني بلينكەن مەن جۇڭگو سىرتقى ىستەر ءمينيسترى سين گان 18 ماۋسىم، جەكسەنبى كۇنى دياويۋيتاي مەملەكەتتىك قوناق ۇيىندە كەزدەستى. كەزدەسۋ 7 جارىم ساعاتقا سوزىلدى.
ارينە، بلينكەن مەن سين گان ەكى ەل اراسىنداعى قايشىلىقتىڭ تۇبەگەيلى پروبلەمالارىن تالقىلاۋدى كەيىنگە سىرىپ قويدى. سەبەبى، بەيجىڭ مەن ۆاشينگتوننىڭ جوعارى لاۋازىمدىلارى اراسىندا كوپتەن بەرى كەزدەسۋ بولمادى. بۇل دەگەنىمىز، تالقىلايتىن ماسەلەنىڭ تىم كوپ ەكەنىن كورسەتەدى. ۇزاق ۋاقىتان بەرى العاش قول جەتكىزگەن جوعارى دەڭگەيدەگى كەزدەسۋدە تەرەڭ قايشىلىقتى ەڭسەرىپ كەتۋ تىپتەن مۇمكىن ەمەس ەدى.
دەگەنمەن بلينكەننىڭ جۇمىس پاپكاسىندا ايماقتىق قاۋىپسىزدىك، ەسىرتكىگە قارسى كۇرەس، كليماتتىڭ وزگەرۋى، جاھاندىق ماكروەكونوميكالىق تۇراقتىلىق، ەكى جاقتا قاماۋعا الىنعان ازاماتتارى بويىنشا الماسۋ جاساۋ جانە اقش-قىتاي اراسىنداعى قارىم-قاتىناستى رەتتەۋ سەكىلدى ماسەلەلەر تۇردى. كەزدەسۋدە دە وسى ماسەلەلەر تالقىلاندى.
19 ماۋسىم. بەيجىڭ. ەنتوني بلينكەن جانە ۋان ي
بەلگىلى بولعانداي، بلينكەن قىتايلىق ارىپتەسىن قۇراما شتاتتارعا رەسمي ساپارمەن بارۋعا شاقىرعان. سين گان بۇنى قابىل العان. بۇنىڭ ءوزى ديپلوماتيالىق جۇرىستەردىڭ جيىلەۋى مۇمكىن ەكەنىن بىلدىرسە كەرەك.
ايتكەنمەن، كەزدەسۋدەن كەيىنگى ەكى ەلدىڭ رەسمي مالىمدەمەلەرىن سالىستىرساق، كەيبىر ماڭىزدى سالالارداعى تەرەڭ كەلىسپەۋشىلىك ءالى دە ساقتالىپ وتىرعانىن كورە الامىز.
ال بۇگىن، 19 ماۋسىمىڭ تاڭىندا بلينكەن قىتايلىق بۇرىنعى ارىپتەسى ءارى قىتايدىڭ سىرتقى ىستەر جونىندەگى جوعارى لاۋازىمدى تۇلعاسى، قكپ وك ساياسي بيۋروسىنىڭ مۇشەسى، ورتالىق سىرتقى ىستەر كوميسسياسى كەڭسەسىنىڭ ديرەكتورى ۆان يمەن كەزدەستى.
ۆان ي بلينكەنمەن تالاي مارتە كەزدەسكەن. سوندىقتان ەكەۋىنىڭ كەزدەسۋى قازىرگى جۇڭگو ءسىم باسشىسىمەن كەزدەسۋگە قاراعاندا اۋقىمدى تاقىرىپتارعا اۋىسقانى انىق. ايتالىق، ستراتەگيالىق قارىم-قاتىناس دەڭگەيىندە تالقى وتكىزگەن بولۋى مۇمكىن. ال، بلينكەننىڭ كەزەكتى بەيجىڭ ساپارىندا جۇڭگو ءتوراعاسى سي سينپينمەن كەزدەسەتىنى تۋرالى ناقتى مالىمەت بولماعان.
قالاي دەسەك تە، بلينكەن ساپارى اقش-قىتاي اراسىنداعى ديپلوماتيالىق سالقىندىققا از دا بولسا جىلىمىق بەردى. دەرجاۆالار اراسىنداعى قارىم-قاتىناس ءبىزدىڭ ەل مەن ايماققا دا بەلگىلى دەڭگەيدەگى اسەرىن بەرەتىندىكتەن، بەيجىڭدەگى كەزدەسۋلەر مەن ناتيجەلەرىن نازاردان تىس قالدىرماۋعا تۋرا كەلەدى.
بلينكەن ساپارىنا قاتىستى تولىقىراق «الماتى اقشامى» باسىلىمىنىڭ الداعى سانىنان وقي الاسىز.