سەبەبى الاياقتار دەلدالدار كەيپىنە ەنۋدە.
"ءبىرىڭعاي جيناقتاۋشى زەينەتاقى قورى" اق (بجزق) سوڭعى ۋاقىتتا الاياقتاردىڭ جالعان اقپارات تاراتۋ جاعدايلارىنىڭ جيىلەپ كەتكەنىن ايتتى، دەپ حابارلايدى Almaty-akshamy.kz
«قۇرمەتتى سالىمشىلار!
اتاپ ايتقاندا، الەۋمەتتىك جەلىلەردە جانە ونلاين-حابارلاندىرۋ پلاتفورمالارىندا زەينەتاقى جيناقتارىن جەكە باسقارۋشى كومپانيالارعا نەمەسە ساقتاندىرۋ ۇيىمدارىنا اۋدارۋ جولىمەن قولما-قول الۋ بويىنشا دەلدالدىق قىزمەتتەر كورسەتۋ تۋرالى ۇسىنىستار جىبەرىلەدى. تەك مۇنداي قىزمەتى ءۇشىن حابارلاما يەسى بەلگىلى ءبىر كولەمدەگى سىياقىنى تالاپ ەتەدى. "بجزق" اق بۇل اقپاراتتىڭ شىندىققا جاناسپايتىنىن مالىمدەيدى» دەلىنگەن قوردىڭ سايتىنداعى اقپاراتتا.
جەكە باسقارۋشى كومپانيالاردىڭ سەنىمگەرلىك باسقارۋىنداعى نەمەسە زەينەتاقى اننۋيتەتى شارتى بويىنشا ءومىردى ساقتاندىرۋ كومپانيالارىندا ورنالاستىرىلعان زەينەتاقى جيناقتارىن قانداي دا ءبىر دەلدالدار ارقىلى الۋ مۇمكىن ەمەس. ال سالىمشىلارعا بجزق-داعى زەينەتاقى جيناقتارىنىڭ ەڭ تومەنگى جەتكىلىكتىلىك شەگىنەن اساتىن بولىگىن عانا زاڭنامادا كوزدەلگەن، تۇرعىن ءۇي جاعدايلارىن جاقسارتۋ نەمەسە ەمدەلۋ ماقساتتارىنا پايدالانۋ ءۇشىن شەشىپ الۋعا رۇقسات ەتىلەدى.
الاياقتار ۇسىنعان سحەمالارعا قاتىسۋعا كەلىسە وتىرىپ، ءسىز ءوز اقشاڭىزدى جوعالتۋ ءقاۋپىن تۋدىرىپ قانا قويماي، سونىمەن قاتار بولاشاقتا باسقا الاياقتىق ارەكەتتەر ءۇشىن پايدالانىلۋى مۇمكىن جەكە دەرەكتەرىڭىزدىڭ ساقتالۋىنا دا ءقاۋىپ توندىرەسىز.
"بجزق" اق ءوز سالىمشىلارىنا سوڭعى كەزدەردە ءجيى تارالىپ كەتكەن وسىنداي "جالعان" حابارلامالاردى ەلەمەۋگە جانە اقپاراتتى تەك رەسمي كوزدەردەن عانا الۋعا قاتاڭ كەڭەس بەرەدى.
ءسىز زەينەتاقى جيناقتارىن الۋ مەن اۋدارۋعا قاتىستى بارلىق سۇراقتارعا جاۋاپتى بجزق بولىمشەلەرىنەن دە، قاشىقتىقتان دا الىپ، اقپاراتتىڭ سەنىمدىلىگىن بىلايشا تەكسەرە الاسىز:
كوپ ارنالى تەگىن بايلانىس ارقىلى، بايلانىس ورتالىعىنىڭ 1418 نومىرىنە قوڭىراۋ شالۋ، سونداي-اق، +7 777 000 1418 ءنومىرى بويىنشا WhatsApp ارقىلى.
بجزق-نىڭ ودنوكلاسسنيكي، Telegram، Facebook، ۆكونتاكتە، Twitter جانە Instagram سياقتى تانىمال پلاتفورمالارداعى الەۋمەتتىك جەلىلەردەگى رەسمي پاراقشالارى ارقىلى.