كاسىپكەرلىك نەگىزدەرىنە وقىتۋ جاڭا فورماتتا قولجەتىمدى بولدى.
قازاقستان ۇكىمەتى ءوز ءىسىن باستاعىسى كەلگەن مەملەكەت ازاماتتارىنا ونلاين-فورماتتا ءبىلىم الۋعا مۇمكىندىك بەرىپ وتىر. بيزنەس نەگىزدەرىن ۇيرەتەتىن جوبا جاڭا فورماتتا قولجەتىمدى بولدى، دەپ حابارلايدى Almaty-akshamy.kz.
«2022 جىلعى 25 شىلدەدەن باستاپ «باستاۋ بيزنەس» جوباسى شەڭبەرىندە كاسىپكەرلىك نەگىزدەرىنە وقىتۋ جاڭا فورماتتا قولجەتىمدى بولدى. ءوز ءىسىن باستاۋدى جوسپارلاپ وتىرعان قازاقستاندىقتار ەندى Skills.enbek.kz پلاتفورماسى ارقىلى ونلاين رەجيمدە بيزنەس جۇرگىزۋ ءۇشىن بازالىق ءبىلىم مەن داعدىلاردى الا الادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
«باستاۋ بيزنەس» جوباسى 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا ارقىلى ازاماتتاردىڭ بيزنەس-باستامالارىن قولداۋدىڭ مەملەكەتتىك شارالار كەشەنى شەڭبەرىندە ىسكە اسىرىلادى.
وقۋ كۋرسىنا جازىلۋ ءۇشىن Business.enbek.kz پورتالدا تىركەلۋ، وقىتۋ شارتتارىنا سايكەستىگىنە اۆتوماتتى تەكسەرۋدەن ءوتۋ قاجەت. شارتتارعا سايكەس بولعان جاعدايدا قاتىسۋشى Skills.enbek.kz پلاتفورماعا ءوتىپ، وقۋعا كىرىسە الادى.
«باستاۋ بيزنەس» جوباسى اياسىندا كاسىپكەرلىك نەگىزدەرىنە وقىتۋ» ونلاين كۋرسىنىڭ قاتىسۋشىلارى بولا الادى:
1) جۇمىسسىزدار؛
2) ءىسىن جاڭا باستاعان جانە جۇمىس ىستەپ تۇرعان كاسىپكەرلەر؛
3) زەينەتكەرلىك جاسقا جەتپەي جۇمىستان قىسقارتىلاتىن قىزمەتكەرلەر؛
4) جەكە كاسىپكەر رەتىندە تىركەلمەي كىرىس الۋ ماقساتىندا تاۋارلاردى ءوندىرۋ (وتكىزۋ)، جۇمىستاردى ورىنداۋ جانە قىزمەتتەردى كورسەتۋ جونىندەگى قىزمەتتى دەربەس جۇزەگە اسىراتىن تۇلعالار جانە (نەمەسە) جۇمىس ىستەمەيتىن جەكە كاسىپكەرلەر؛
5) وتباسىلىق كاسىپكەرلىكتە اقى تولەنبەيتىن قىزمەتتى دەربەس جۇزەگە اسىراتىن تۇلعالار؛
6) تابىسى ەڭ تومەنگى كۇنكورىس دەڭگەيىنەن تومەن، ساتۋ (ايىرباستاۋ) ءۇشىن جەكە قوسالقى شارۋاشىلىقتا ءونىم ءوندىرۋ جونىندەگى قىزمەتتى دەربەس جۇزەگە اسىراتىن تۇلعالار؛
7) تابىستارى ەڭ تومەنگى كۇنكورىس دەڭگەيىنەن تومەن وندىرىستىك كووپەراتيۆتەردىڭ مۇشەلەرى.
وقىتۋ 14 كۇنتىزبەلىك كۇننەن اسپايدى. ءار قاتىسۋشى كۋرستى جەكە-جەكە مەڭگەرۋمەن اينالىسادى. وقۋ تولىعىمەن تەگىن.
وقىتۋ كەلەسى كەزەڭدەردەن تۇرادى:
- بىرنەشە مودۋل بويىنشا ونلاين وقىتۋ كۋرسى؛
- قورىتىندى تەستىلەۋ؛
- وقۋدان وتكەنى تۋرالى سەرتيفيكات الۋ.
وقۋ بارىسىندا پايدالانۋشى بىرنەشە ساباقتاردان تۇراتىن 12 مودۋلدەن ءوتۋى كەرەك. ءاربىر مودۋل اياقتالعان سوڭ ارالىق تەستىلەۋ وتكىزىلەدى. كەلەسى وقۋ مودۋلىنە ءوتۋ ءۇشىن قاتىسۋشى تەستىلەۋدى تاپسىرۋ كەزىندە دۇرىس جاۋاپتاردىڭ كەمىندە 70%-ىن جيناۋى كەرەك. ارالىق تەستىلەۋدەن ءوتۋ ارەكەتتەرىنىڭ سانى شەكتەلمەيدى.
«باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ» ونلاين كۋرسى ەگەر قاتىسۋشى قورىتىندى تەستىلەۋدى تاپسىرۋ كەزىندە دۇرىس جاۋاپتاردىڭ 70% - دان استامىن جيناعان جاعدايدا ءوتتى دەپ ەسەپتەلەدى. دۇرىس جاۋاپتاردىڭ 70%-ىنان تومەن جيناعان قاتىسۋشىعا قورىتىندى تەستىلەۋدەن 2 رەت قايتا ءوتۋ مۇمكىندىگى بەرىلەدى.
وقىتۋ قورىتىندىسى بويىنشا قاتىسۋشى بىرەگەي ءنومىرى بار ەلەكتروندىق سەرتيفيكات الادى. «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ تۋرالى سەرتيفيكاتتىڭ قولدانىلۋ مەرزىمى 3 جىلدى قۇرايدى.
«باستاۋ بيزنەس» جوباسى شەڭبەرىندە كاسىپكەرلىك نەگىزدەرىنە وقىتۋ» ونلاين كۋرسىنان وتكەن قاتىسۋشىلار ۇلتتىق جوبا شەڭبەرىندە بيزنەس-يدەيالاردى ىسكە اسىرۋعا گرانت الۋعا ۇمىتكەر بولا الادى.