مۇنى ەلدىڭ ەرتەڭى، ۇرپاقتىڭ بولاشاعى جارقىن بولۋى ءۇشىن قولعا الۋىمىز كەرەك - مەملەكەت باسشىسى.
تۇركىستاندا ءوتىپ جاتقان ۇلتتىق قۇرىلتايدا پرەزيدەنت قاسىم-جومارت توقايەۆ وسىلاي ءمالىم ەتتى، دەپ حابارلايدى Almaty-akshamy.kz.
«جاس ۇرپاق تاريح تاعىلىمىن جانە ەلدىڭ جارقىن بولاشاققا ۇمتىلىسىن ءبىر ارناعا توعىستىرىپ جاتىر. وسىلايشا، ولار ۇلتتىڭ رۋحىن جاڭعىرتۋدا. وسى سەرپىلىستىڭ قارقىنىن ساقتاي وتىرىپ، ونى كۇشەيتە ءتۇسۋ – مەملەكەتتىڭ مىندەتى. بۇل مىندەتتى ابىرويمەن اتقارساق، قازاقتىڭ رەنەسسانس ءداۋىرى، ياعني تۇبەگەيلى وزگەرىستەر زامانى كەلەدى»، - دەدى مەملەكەت باسشىسى قاسىم-جومارت توقايەۆ.
پرەزيدەنت اتاپ وتكەندەي، جاستارعا قۇندىلىقتاردى دارىپتەۋ ىسىندە اعا بۋىننىڭ الار ورنى ايرىقشا.
«ءبىز، اعا بۋىن وكىلدەرى، ەڭبەكقورلىق، ىسكەرلىك سياقتى قۇندىلىقتاردى ءوزىمىز ۇلگى كورسەتۋ ارقىلى دارىپتەۋىمىز كەرەك. جاستارىمىز كوپ سوزگە قۇمار، جاعىمپاز، جالقاۋ، ەنجار، ماسىل بولماۋعا ءتيىس. ولاردى وسىنداي تەرىس ادەتتەردەن قاشىق بولۋعا ۇيرەتۋىمىز كەرەك. ءبىزدىڭ قوعام وزگەرىستى بىرەۋدەن ماداق ەستۋ ءۇشىن ەمەس، ەڭ الدىمەن، ءوزى ءۇشىن جاساۋعا ءتيىس. مۇنى ەلدىڭ ەرتەڭى، ۇرپاقتىڭ بولاشاعى جارقىن بولۋى ءۇشىن قولعا الۋىمىز كەرەك.
اشىعىن ايتساق، ءبىز كەيدە ءوز ومىرىمىزدەن گورى جۇرتتىڭ پىكىرىنە كوبىرەك ءمان بەرەمىز. ءتىپتى، بۇل ادەت قانىمىزعا سىڭگەن دەۋگە بولادى. ارينە، قازاقتىڭ قوناقجايلىعى – جاقسى قاسيەت. ءبىراق، ءۇيدىڭ ءىشى-سىرتىن قوناق كەلگەندە عانا رەتكە كەلتىرۋ دۇرىس ەمەس»، - دەپ ءمالىم ەتتى قاسىم-جومارت توقايەۆ.