سپورت – ادامنىڭ ەرىك-جىگەرىن قايرايتىن، ونىمەن قوسا سىنايتىن سالا. بۇل سالادا جەتىستىككە جەتۋ ادامنان ەرەكشە قاجىر-قايراتتى قاجەت ەتەدى. ونى دالەلدەپ، ەلدىڭ اتىن الەمگە تانىتىپ جۇرگەن جاندار بارشىلىق.
ادامنىڭ بالا كۇنىندەگى ارمانى اسقاق بولسا، ول يەسىنە سوعان قول جەتكىزگەنشە مازا بەرمەيدى. ماقساتقا جەتۋ جولى وڭاي ەمەس، دەگەنمەن شىنايى ارمان الدامايدى. «ءبىزدىڭ ماقتانىشىمىز» ايدارىنىڭ بۇگىنگى شىعارىلىمىنىڭ كەيىپكەرى تۋرالى وسىلاي دەۋگە ابدەن بولادى. بۇل جولى تانىمال سپورتشى، ارالاس جەكپە-جەكتەن الەم چەمپيونى شاۆكات راحمونوۆ، ونىڭ وسى كۇنگە دەيىنگى جەتىستىكتەرى جايلى ءسوز قوزعاماقپىز.
شاۆكات راحمونوۆ 1994 جىلى 23 قازاقستان وزبەكستاننىڭ ءشۇرشى قالاسىندا تۋعان. ءاتى-جونى مەن تۋعان جەرىنە قاراپ، كوپشىلىك ونىڭ ۇلتىنا قاتىستى سپورتشىنى «وزبەك» دەپ ويلايتىن بولۋى كەرەك. دەگەنمەن، شاۆكاتتىڭ ۇلتى قازاق، اكەسى – قازاق، اناسى – قوڭىرات.
جارىسقا قاتىسۋ، ءوزىنىڭ كۇشىن سىناۋعا ول كىشكەنە كۇنىنەن اۋەس بولدى. ول سپورتتىڭ ءار تۇرىمەن اينالىسقان – فۋتبولدان باستاپ، بوكسقا دەيىن. بولاشاق چەمپيوندى نەگىزىنەن كوشە تاربيەلەدى دەۋگە بولار. سەبەبى جاستايىنان بۇزىقتاۋ وسكەن بالا وزىنەن ەرەسەكتەۋ بالالارعا دا ەسەسىن جىبەرمەيتىن كورىنەدى.
شاۆكات 16-عا كەلگەندە ول وتباسىمەن بىرگە قازاقستانعا قونىس اۋدارادى. قاراعاندىعا كوشىپ كەلگەن ونىڭ وتباسىنىڭ جاعدايى بىردەن تۇزەلىپ كەتپەدى. ول كەزدەگى ءجاسوسپىرىم شاۆكاتقا اتا-اناسىنا قولعابىس ەتىپ، جۇمىس ىستەۋگە تۋرا كەلدى. بازاردا جۇك تيەۋشى بولىپ اۋىر جۇمىس ىستەدى. دەگەنمەن، سپورتقا دەگەن قىزىعۋشىلىق وعان دا ۋاقىت تابۋعا كۇش بەردى. كىشكەنە كۇنىنەن جەڭىلۋ جانىنا جاقپايتىن قايسار شاۆكاتتىڭ ومىرىندەگى بۇل قيىندىقتار ونى قايتا شىڭداي ءتۇستى. سپورتشى جۇمىستان قاتتى قاجىپ، جاتتىعۋ جاساۋعا مۇرشاسى كەلمەگەن كەزدەردى دە باسىنان وتكەن. ونداي كەزدەردە جۇدىرىعىن تۇيگەن كۇيى جاتتىعۋدى قالدىرماۋعا تىرىسقان.
19 جاسىندا شاۆكات كوكشەتاۋ قالاسىندا جاتتىقتىرۋشى بايان جانعالوۆپەن جاتتىعا باستايدى. كەيىن «كوكشە» اكادەمياسىنا دەنە شىنىقتىرۋ جانە سپورت فاكۋلتەتىنە وقۋعا تۇسەدى. شاۆكاتتىڭ اۋەسقوي رەتىندەگى العاشقى جەتىستىكتەرى سول كەزدە-اق بايقالا باستادى. سانكت-پەتەربۋرگتە ارالاس جەكپە-جەكتەن وتكەن چەمپيوناتتىڭ فينالىندا وزبەكستاندىق احليددين ميرزادوۆلاتوۆ باسىم ءتۇسىپ، شاۆكات العاشقى جەڭىستەرىنىڭ بىرىنە قول جەتكىزدى.
بۇل جەڭىس م-1 Global پروموۋشەنىنىڭ نازارىنا وزىنە اۋدارۋعا جەتكىلىكتى بولدى. 2014 جىلى شاۆكات ولارمەن كەلىسىمشارتقا وتىردى. جارتىلاي ورتاشا سالماقتا (77 كگ) ونەر كورسەتكەن راحمونوۆ العاشقى جارىستاردان وزىنە نازار اۋدارتا باستادى.
شاۆكاتتىڭ جارقىن جەڭىستەرى ودان كەيىنگى جىلدارى دا جالعاسىن تاپتى. راحمونوۆپەن بەلدەسكەن قارسىلاستارىنىڭ ءبارى بىرىنەن سوڭ ءبىرى نوكاۋت الدى. 2018 جىلدان باستاپ سپورتشى ارالاس جەكپە-جەكتەن قازاقستان فەدەراسياسى وتكىزگەن كەزدەسۋلەرگە دە قاتىسا باستادى. سول جىلدىڭ مامىر ايىندا شاۆكات راحمونوۆ جارتىلاي ورتاشا سالماقتا قارسىلاسى فاريدۋن وديلوۆتى تەحنيكالىق نوكاۋتپەن ۇتىپ، KZMMAF چەمپيونى تيتۋلىنا يە بولدى. بۇدان كەيىن جارتى جىلدان سوڭ شاۆكاتقا قىرعىز سپورتشىسى رينات ساياقبايەۆپەن كەزدەسىپ، چەمپيوندىق بەلدىگىن قورعاۋ كەرەك بولدى. بۇل بەلدەسۋ نەبارى بەس مينۋتقا سوزىلعان بولاتىن، سەبەبى شاۆكات تاعى ءبىر قارسىلاسىن كوزدى اشىپ-جۇمعانشا نوكاۋتقا جىبەردى.
2019 جىلدىڭ ناۋرىز ايىندا جارتىلاي ورتا سالماقتا م-1 Global-دىڭ ۆاكانتتى تيتۋلىن يەلەندى. ءۇش ايدان سوڭ راحمونوۆقا بۇل بەلدىگىن قورعاۋ كەرەك بولدى. تياگو ۆارەجاومەن وتكەن كەزدەسۋ قازاقتىڭ نامىستى جىگىتى شاۆكاتتىڭ جەڭىسىمەن اياقتالدى.
راحمونوۆتىڭ ليگاداعى دەبيۋتى 2020 جىلى قازان ايىندا ابۋ-دابيدە وتكەن UFC 254 ءتۋرنيرىنىڭ اياسىندا ءوتتى. پروموۋشەنعا جاڭا كەلگەن شاۆكاتقا قارسىلاس رەتىندە الەكس وليۆەير تاڭدالدى. جەكپە-جەك ارالىق سالماقتا ءوتتى، ويتكەنى برازيليالىق باقىلاۋ سالماعىن جوعالتىپ الدى جانە قارسىلاستىڭ پايداسىنا 20% ايىپپۇل سالىندى. شاۆكاتتىڭ ليگاداعى العاشقى جەكپە-جەگى ناعىز سەنساسيا تۋدىردى: ول قارسىلاسىن جەڭۋگە ءتورت-اق مينۋت ۋاقىت جۇمسادى.
ءوزىنىڭ جارقىن دەبيۋتىنەن كەيىن قازاقستاندىق سپورتشى كەلەسى بەلدەسۋىنە پروموۋشەننىڭ اڭىزعا اينالعان مىقتىسى دونالد سەررونەنى شاقىردى.
«ماعان امەريكالىق كوۆبويدى بەرسەڭىزدەر. مەن ونىمەن ەركىن توبەلەسە الامىن. ول مەنى ەشقالاي قورقىتىپ تۇرعان جوق. ونى قۇرمەتتەيمىن. ول وتە تاجىريبەلى كۇرەسكەر. ءوزىمىز دە ونى بەلدەسۋلەرىن كورىپ وستىك»، - دەگەن بولاتىن شاۆكات راحمونوۆ.
مما-داعى شاۆكاتتىڭ ەكىنشى كەزدەسۋى 2021 جىلى ماۋسىمدا ءوتتى. بۇل جولى قازاقستاندىق ارالاس جەكپە-جەك شەبەرىن برازيليالىق ميشەل پرازەريستى دە وڭاي جەڭدى. نەبارى ەكى مينۋتتا شاۆكات «ارتىنان قىلقىندىرۋ» ادىسىمەن ۇتتى. وسىلايشا، UFC-دە راحمونوۆتىڭ رەكوردى 2-0 بولسا، جالپى 14-0 بولدى.
2022 جىلدىڭ اقپان ايىنىڭ باسىندا بىردە-بىر رەت جەڭىلىپ كورمەگەن قازاقستاندىق سپورتشى لاس-ۆەگاستا UFC-دەگى ءۇشىنشى جەكپە-جەگىن وتكىزدى. كارلتون حارريس راحمونوۆتىڭ قارسىلاسى بولىپ تاعايىندالدى. جەكپە-جەكتىڭ ءفاۆوريتى بولىپ سانالعان شاۆكات ءبىرىنشى راۋندتا قارسىلاسىنا بۇرىلۋ كەزىندە اياعىمەن قاتتى سوققى بەرىپ، كەزەكتى جەڭىسىنە قول جەتكىزدى.
2022 جىلدىڭ ناۋرىزىندا راحمونوۆ UFC رەيتينگىندە پروموۋشەنىڭ ۇزدىك وندىعىنداعى نيل ماگنيدى كەزدەسۋگە شاقىرۋ تاستادى. شاۆكاتتىڭ ءوزى بۇل رەيتينگتە 15-ورىندا بولاتىن. قازاقستاندىق ارالاس جەكپە-جەك مىقتىسىنىڭ شاقىرۋىن قابىل اعان امەريكاندىقپەن كەزدەسۋ سول جىلى جازدا ءوتتى. بۇل جولى دا شاۆكاتتىڭ جولى وڭىنان بولىپ، قارسىلاسىنان باسىم ءتۇسىپ، جەڭىسكە جەتتى.
شاۆكات راحمونوۆ ءوزىنىڭ سپورتتىق جولىنداعى 17ء-شى، ال UFC-دەگى 5ء-شى كەزدەسۋىن وسى جىلى ناۋرىزدا وتكىزدى. بۇل جولعى ونىڭ قارسىلاسى سول كەزدەگى الەمدىك رەيتپنگتە 7-ورىندا تۇرعان دجەفف نيل بولدى. كەزدەسۋ ناتيجەسى راحمونوۆتى جەڭىلىسسىز كەزدەسۋلەر سانى بويىنشا رەكوردسمەن ەتتى. جەكپە-جەكتىڭ ستاتيستيكاسىنداعى ماڭىزدى فاكتور ونىڭ كوپتەگەن جەكپە-جەكتەردى مەرزىمىنەن بۇرىن اياقتاۋىمەن دە بايلانىستى بولدى.
بۇگىنگە دەيىن 17 كەزدەسۋ وتكىزىپ، ونىڭ ءبارىن جەڭىسپەن اياقتاعان شاۆكات راحمونوۆقا قانداي ماقتاۋ ايتسا دا ارتىق ەمەس. سپورتتاعى ونىڭ جەتىستىگى وسى جولداعى، وسى سالاداعى ءاربىر جانعا ۇلگى.
شاۆكات جەتكەن جەتىستىكتەر:
- 2018 — KZMMAF جارتىلاي ورتا سالماقتاعى چەمپيونى
- 2019 — جارتىلاي ورتا سالماقتاعى M-1 Global چەمپيونى
- 2022 – «كەشتىڭ قاتىسۋشىسى» (كارلستون حارريسكە قارسى)
- 2023 – «جەكپە-جەك كەشى» مۇشەسى (دجەفف نيلگە قارسى)
- 2023 – جەڭىلىسسىز كەزدەسۋلەر سەرياسى بويىنشا UFC رەكورسمەنى
تومەندە قازاقتىڭ ماقتاناشىنا اينالعان شاۆكاتقا قاتىستى قىزىقتى دەرەكتەردى ۇسىنامىز:
- شاۆكاتتىڭ اتاسىنىڭ تەگى – راحمان. سپورتشىنىڭ راحمونوۆتارعا اينالۋى وزبەكستانداعى احاج-دىڭ جىبەرگەن قاتەلىگىنەن.
- سپورتشىنىڭ لاقاپ اتى – نوماد، ياعني قازاقشالاپ ايتقاندا «كوشپەندى». ءوزىنىڭ سپورتتىق جولىندا شاۆكات بىرنەشە ەل رەسەيدەن وڭتۇستىك كورەياعا دەيىنگى بىرنەشە ەلدەردە ونەر كورسەتكەن.
- شاۆكاتتىڭ اپكەسى سورا - قويان-قولتىق كۇرەستەن الەم چەمپيونى – ءقازىر ارالاس جەكپە-جەكتەن دە سىنعا ءتۇسىپ ءجۇر.
- شاۆكات بوس ۋاقىتىندا بوكس تۋرنيرلارى مەن فۋتبول ماچتارىن كورگەندى جاقسى كورەدى.
- 2013 جىلى اۋەسقويلار اراسىندا الەم چەمپيونى اتاعىن جەڭىپ العاننان كەيىن راحمونوۆ بالا كەزىندەگى كۋميرى فەدور ەميانەنكومەن كەزدەستى. اتاقتى كۇرەسكەر وعان سىيلىقتى جەكە ءوزى تاپسىرعان بولاتىن.