ءبىزدىڭ ماقتانىشىمىز: قازاقتىڭ باعىنا قۇداي بەرگەن ديماش

بۇگىن قازاقتىڭ ماڭدايىنا بىتكەن جارىق جۇلدىزى – ديماش قۇدايبەرگەننىڭ تۋعان كۇنى. وسى اتاۋلى كۇنگە وراي سايتىمىزداعى «ءبىزدىڭ ماقتانىشىمىز» شىعارىلىمىن ءانشىنىڭ ءومىرى مەن شىعارماشىلىعىنا ارناۋدى ءجون سانادىق.

دىنمۇحاممەد قۇدايبەرگەن 1994 جىلى 24 مامىردا اقتوبەدە ەلگە تانىمال انشىلەر قانات پەن سۆەتلانا ايتبايەۆتاردىڭ وتباسىندا دۇنيەگە كەلگەن. ديماشتىڭ وزىنەن جاسى كىشى راۋشان ەسىمدى قارىنداسى مەن ءابىلمانسۇر ەسىمدى ءىنىسى بار.

ديماشتىڭ اتا-اجەسى دە مۋزىكاعا جاقىن جاندار. ءبىرى دومبىرادا ويناسا، ەكىنشىسىنىڭ ءان ايتۋعا بەيىمى مول. كىشكەنە كۇنىنەن اتا-اجەسىنىڭ باۋىرىندا ءوسىپ، ۇلكەندەردىڭ تاربيەسىن كورىپ وسكەن. قازاقى ءسالت-داستۇردى دارىپتەپ، قۇرمەت تۇتادى. ءوز اتا-اناسىن «اعا، اپا» دەپ اتايدى.

5 جاسىنان باستاپ فورتەپيانودا ويناۋدى ۇيرەنگەن. بالالار حورىندا ءان ايتقان.

ديماش «اينالايىن»، «بالداۋرەن»، استانادا وتكەن «جاس قانات» جانە باسقا دا حالىقارالىق مۋزىكالىق بايقاۋلارعا قاتىسقان. ءار بايقاۋدا ديماشتىڭ دارىنى جوعارى باعالاناتىن.

2014 جىلى ديماش احمەت جۇبانوۆ اتىنداعى مۋزىكالىق كوللەدجدە اكادەميالىق ءان ورىنداۋ سىنىبىن ءتامامدادى. ديماش قازاق ۇلتتىق ونەر ۋنيۆەرسيتەتىن «ەسترادا ۆوكالى» ماماندىعى بويىنشا ءبىتىرىپ شىقتى.

ءانشى ءارى سازگەر ديماش قۇدايبەرگەن كەمىندە بەس مۋزىكالىق اسپاپتى مەڭگەرگەن. ەڭ الدىمەن، ءوزىمىزدىڭ ۇلتتىق اسپابىمىز – دومبىرانى جەتىك مەڭگەرگەن. 

مۋلتيينسترۋمەنتاليست رەتىندە دە وتە تالانتتى مۋزىكانت جەكە باراباندا، سونىمەن قاتار فورتەپيانودا سۇيەمەلدەيدى.

ءتىپتى سوڭعى كونسەرتتەرىندە گيتارا مەن كسيلوفوندى دا تارتىپ، كوپتىڭ كوڭىلىنەن شىعىپ ءجۇر.

ءانشىنىڭ باعىن اشقان بايقاۋ

ديماش بالا كەزىنەن ءتۇرلى ءان بايقاۋلارىندا باعىن سىناپ، جۇلدەلى ورىنداردى يەلەنە باستادى. ونەرلى جاستىڭ باعىن اشقان بايقاۋ - ۆيتەبسكتە وتكەن «سلاۆيان بازارى-2015» حالىقارالىق ءان دوداسى بولاتىن. ديماش سول كونكۋرستا باس جۇلدە يەلەندى.

ديماش ەسىمىن الەمگە ايگىلەگەن جوبا

«سلاۆيان» بازارىنان» كەيىن ول كەزدەگى جاس ورىنداۋشى ديماش ءبىر جىلداي قىتايدا وتكەن «I am singer» جوباسىنا قاتىسىپ، تالانتىمەن ميللياردتار ەلىن تاڭعالدىرعان ەدى. ءسويتىپ، 2017 جىلى ديماش قىتايلىق جوبادا ەكىنشى ورىن الدى.

وسى جەڭىسىنەن كەيىن ديماش فرانسيانىڭ تانىمال باعدارلاماسىنا قۇرمەتتى قوناق رەتىندە شاقىرىلدى. وتانداسىمىز الەم جۇلدىزدارىمەن ءبىر ساحنادا ونەر كورسەتىپ، فرانسۋزداردى ءتانتى ەتتى.

ديماشتىڭ كونسەرتتەرى

ديماش العاشقى الەمدىك تۋرنەسى اياسىندا قىتايدىڭ بىرنەشە قالاسىن ارالادى. ال 2017 جىلدىڭ جازىندا استانادا العاشقى ۇلكەن كونسەرتىن بەردى. شىعارماشىلىق كەشكە قازاقستاندىقتاردان بولەك، جۇڭگو، يتاليا، رەسەي، ۋكراينا، اقش جانە فرانسيادان تىڭدارماندار كەلدى. «استانا-ارەنا» سپورت كەشەنىنە باس-اياعى 30 مىڭداي كورەرمەن جينالعان.

سونداي-اق، ديماش MTV Music Awards جۇلدەسىنىڭ يەگەرى، «ازيانىڭ ەڭ تانىمال ءانشىسى»، «حالىقارالىق دەڭگەيدەگى ەڭ تانىمال ءانشى»، «جىلدىڭ ەڭ ۇزدىك ءانشىسى» نوميناسيالارىنىڭ جەڭىمپازى. بۇگىندە الەمنىڭ تۇكپىر-تۇكپىرىندە ديماشتىڭ ميللياردتاعان تىڭدارمانى بار.

2019 جىلدىڭ 22 ناۋرىزىندا رەسەي استاناسىنداعى مەملەكەتتىك كرەمل سارايىندا ديماشتىڭ «D-Dynasty» اتتى العاشقى جەكە كونسەرتى ءوتتى.  ديماشتىڭ ماسكەۋدەگى كونسەرتىنە جانكۇيەرلەرى 57 ەلدەن كەلدى. ءانشى ءوز جانكۇيەرلەرىن «Screaming» انىمەن قارسى الدى. سونداي-اق ءارتىس دومبىرادا ويناپ، ءتۇرلى تىلدەردە بىرنەشە ءان ورىندادى. كورەرمەندەر ونىڭ ءار ءانىن بىرگە قوسىلىپ ايتۋعا تىرىستى.

ءانشىنىڭ ماسكەۋدەگى ەكىنشى جەكە كونسەرتى 2020 جىلى «مەگاسپورت» سپورت سارايىندا ءوتتى. ديماشتىڭ ايتۋىنشا، سىيىمدىلىعى 10 مىڭ ادام بولاتىن مۋزىكالىق الاڭدا وسىنداي ۇلكەن اۋديتوريانى جيناۋ ونىڭ ارمانىنىڭ ءبىرى ەدى.

ءارتىس كورەرمەندەردى قازاق، فرانسۋز، اعىلشىن جانە ورىس تىلدەرىندە ءان سالۋمەن قۋانتتى. ماسكەۋدەگى ەكىنشى جەكە كونسەرتتە «S. O. S.»، «Give Me Your Love»، «Screaming»، «ماحاببات بەر ماعان» جانە تاعى دا باسقا اندەر شىرقالدى.

قوناق رەتىندە شاقىرىلعان ءانشى توكيودا ABU Song Festival فەستيۆالىندە ونەر كورسەتتى. 

ديماش ميشەل بەرجە مەن ليۋك پلۋموندوننىڭ ايگىلى «SOS d’ un terrien en detresse» ءانىن ورىندادى.

كونسەرت جۇرگىزۋشىلەرىنىڭ ارتىسكە قويعان ساۋالدارىنا قازاق تىلىندە جاۋاپ بەرگەن بولاتىن.

ەۋروپاداعى العاشقى كونسەرت

لوندوندا ونەر كورسەتۋ ديماشتىڭ مانسابىندا ۇلكەن ماڭىزعا يە بولدى. بۇل ونىڭ باتىس ەۋروپاداعى العاشقى جەكە كونسەرتى بولدى. مۋزىكانت ونەر كورسەتكەن كونسەرت زالى ءۇش مىڭعا جۋىق كورەرمەندى قابىلدايتىن ينديگو زالى دەپ اتالادى.

كورەرمەندەردىڭ پىكىرىنشە، ءانشىنىڭ لوندونداعى كونسەرتىنە ەڭ ادال جانكۇيەرلەر كەلدى – Dears سۇيىكتى ءارتىستىڭ ەۋروپالىق دەبيۋتىن الەمنىڭ 40 ەلىنەن قولداۋعا كەلدى.

نيۋ-يوركتەگى كونسەرت

2019 جىلدىڭ 10 جەلتوقسانى ءانشىنىڭ دە، ونىڭ كوپتەگەن جانكۇيەرلەرىنىڭ دە ەسىندە قالدى. بۇل كۇنى ول كوماندامەن بىرگە نيۋ-يوركتە ۇلكەن جەكە كونسەرت وتكىزدى. شوۋ ايگىلى Barclays Center الاڭىندا ءوتتى. كەيىنىرەك ول ايتقانداي، بۇل ۇمىتىلماس ءسات بولدى.

كونسەرت ءۇش ساعاتتان استام ۋاقىتقا سوزىلدى. بۇل جولى Dears 60 ەل مەن امەريكانىڭ 45 شتاتىنان كەلدى. ديماشتىڭ نيۋ-يوركتە ونەر كورسەتۋىنە 7 مىڭ بيلەت ءبىر اي بۇرىن ساتىلدى، ولاردىڭ 80% -عا جۋىعىن امەريكالىق اۋديتوريا ساتىپ الدى.

ۇيىمداستىرۋشىلارعا قازاقستاندىقتاردىڭ شىعارماشىلىعىن باعالاۋ ءۇشىن جانكۇيەرلەردىڭ بارىنشا كوپ بولۋى ءۇشىن تاعى 2 مىڭ ورىن قوسۋعا تۋرا كەلدى. Arnau tour ENVOY شوۋى ق ر مادەنيەت جانە سپورت مينيسترلىگىنىڭ قاتىسۋىمەن ءوتتى جانە قازاقستاننىڭ امەريكا قۇراما شتاتتارداعى مادەنيەت كۇندەرىنىڭ ماڭىزدى بولىگى بولدى.

بۇكىل ونەر كورسەتۋ بارىسىندا ديماش قازاق مادەنيەتىنىڭ رۋحىن داۋىس، دەكوراسيا جانە كورنەكى اسەرلەر ارقىلى ءتۇرلى تاسىلدەرمەن جەتكىزدى. نيۋ-يوركتە ول قازاق، ورىس، اعىلشىن جانە جۇڭگو تىلدەرىندە ءان ايتتى. 

2020 جىلدىڭ 16 اقپانىندا كراسنوداردا ديماشتىڭ Arnau Tour 2020 اتتى اۋقىمدى گاسترولدىك ساپارى باستالدى. وسى باعدارلامامەن ول قازاندا (20 اقپان)، ەكاتەرينبۋرگتە (23 اقپان)، لاتۆيا استاناسى ريگادا (7 ناۋرىز)، ماسكەۋدە (9 ناۋرىز) جانە كييەۆتە ونەر كورسەتكەن بولاتىن.

قازاقستاندىق ءارتىستىڭ ەكاتەرينبۋرگتەگى كونسەرتى «ەكاتەرينبۋرگ-ەكسپو» الاڭىندا ءوتتى. 5 مىڭ ادامعا ارنالعان زالدا تاعى دا سولد-اۋت بولدى.

ديماشتىڭ كييەۆتەگى كونسەرتى الەمنىڭ تۇكپىر-تۇكپىرىنەن تاعى دا تىڭدارمانداردى جينادى. ورىنداۋشىنى تىڭداپ، كورۋگە 25 ەلدەن كورەرمەن جينالدى.

ديماشتىڭ Dimash DIGITAL SHOW ونلاين-كونسەرتى

ءانشىنىڭ 2021 جىلعى العاشقى ونلاين-كونسەرتى Dears جاھاندىق قوعامداستىعى ءۇشىن ۇمىتىلماس جانە كوپتەن كۇتكەن سىيلىق بولدى. 16 قاڭتاردان باستاپ مىڭداعان كورەرمەندەر امەريكاندىق Tixr.com. اعىندى پلاتفورماسىندا ارنايى ونلاين-شوۋدىڭ كۋاسى بولدى.

كونسەرت نۇر-سۇلتان قالاسىنىڭ ۋاقىتىمەن 20:00-دە باستالىپ، جۇزدەن استام ەلدە ءوتتى. كەيىنىرەك tixr قىزمەتكەرلەرى تۇسىندىرگەندەي، DIMASH DIGITAL SHOW كورەرمەندەرى شەتەلدىك ورىنداۋشىنىڭ كونسەرتىنە بيلەتتەر ساتۋ بويىنشا رەكورد ورناتتى.

ديماش قۇدايبەرگەننىڭ ءوزى ءانىن جازعان تۋىندىلار: 2014 جىلى – «كوركەمىم»، 2015 جىلى – «ۇمىتىلماس كۇن»، 2017 جىلى – «سالەم»، «ءتاتتى ەلەس»، «ءسوز سوڭى»، «سوعىس جانە بەيبىتشىلىك» (戰爭與和平)،2018 جىلى – «وكىنىش»، 2019 - «Give Me Your Love»، «Stand Up»، «اكەشىم-اناشىم».

جىگىتكە جەتى ونەر دە از

 بۇلاي دەۋىمىزگە سەبەپ تە جوق ەمەس. كاسىبي مۋىزكانت ديماش سپورتپەن دە ءبىراز جىل كاسىبي تۇردە اينالىسقان ەكەن. ءجاسوسپىرىم كەزىندە 3-4 جىلداي تاەكۆاندوعا قاتىسقان، اتالعان سپورت تۇرىنەن قىزىل بەلبەۋى بار. كەيىننەن ۋاقىت تاپشىلىعى مەن دەنساۋلىعىنا بايلانىستى بۇل سپورتتى قويىپ كەتكەن.

ۆوكال دەگەن – كادىمگى سپورت

ديماش ۇزبەي شۇعىلدانعان سپورت تۇرلەرىنىڭ ءبىرى – ءجۇزۋ. قاتارىنان بەس جىل بويى تۇراقتى تۇردە جۇزۋگە بارعان. ونىڭ اسا جوعارى داۋىس وكتاۆاسىن ەركىن الا الۋىنىڭ ءوزى وسى سپورتپەن اينالىسقانىنىڭ ءبىر كورىنىسى ءارى جەمىسى دەۋگە بولادى. سۇحباتتارىنىڭ بىرىندە ءانشى: «ءجۇزۋدى وتە قاتتى جاقسى كورەتىن ەدىم. ءالى كۇنگە دەيىن قاي ەلدىڭ قوناق ۇيىندە بولسام دا، باسسەينگە بارىپ، ءوزىمدى شىنىقتىرىپ تۇرۋعا تىرىسامىن. ويتكەنى ۆوكال دەگەن – كادىمگى سپورت. ول – تازا ماتەماتيكا»، - دەي كەلە، جۇلدىز ءوزىنىڭ ومىرىنە سپورتتىڭ قالاي وڭ اسەر ەتكەنىن اڭعارتتى.

ديماشتىڭ ورىنداۋىنداعى اندەر

ديماشتىڭ ورىنداۋىنداعى ءاربىر ءان، مۋزىكا اسا جوعارى تالعاممەن جازىلادى، ورىندالادى. وعان بۇگىندە  الەمنىڭ تۇكپىر-تۇكپىرىنەن ايتىلىپ، جازىلىپ جاتاتىن ميليياردتاعان تىڭدارمان ىقىلاسىنان كورۋگە بولادى. «قۇلاقتان كىرىپ بويدى الار» دەگەن ءسوز تەككە ايتىلماسا كەرەك. ديماشتىڭ اندەرىن ءسۇيىپ تىڭدايتىندار مۋىزكانى تىڭداپ بولعانشا، باستان ءتۇرلى كۇي كەشكەندەي سەزىمدە بولاتىندارىن ءجيى ايتادى. بويدى شىمىرلاتىپ، جۇرەكتى ەلجىرەتەدى.

ديماش قۇدايبەرگەننىڭ ورىنداۋىنداعى... دەگەندە ويعا بىردەن كەلەتىن تۋىندىلاردىڭ ءبىرى – حالىق ءانى «دايديداۋ». بۇل ءان بۇرىننان حالىق اراسىندا كەڭىنەن تانىمال. دەيتۇرعانمەن، حالىق فولكلورىنا جاتاتىن وسىنداي ءاننىڭ كۇللى الەمگە تانىلۋىنا ديماشتاي ءانشىنىڭ ۇلەسى قانشالىقتى ەكەنى ايپاسا دا بەلگىلى. سەبەبى ءانشىنىڭ اتىن جالپى الەم تاني باستاعان جىلدارى «دايديداۋ» الەمدىك راديو جۇيەسىنە ەنگىزىلدى. سول كەزدە ءاندى حالىقارالىق راديو جۇيەسىندەگى جۇزدەگەن ەلدىڭ تۇرعىندارى تىڭداي الاتىن مۇمكىندىككە يە بولدى. حالىقارالىق راديو وكىلدەرى «قازاق» راديوسىنا ۇسىنىسپەن شىعىپ، قازاق حالقىنىڭ ۇلتتىق بولمىسىن كورسەتەتىن ءان سۇراعان.

ديماش باعىن اشقان تاعى ءبىر حالىق ءانىنىڭ ءبىرى – «سامالتاۋ».  بۇل ءاندى ول قىتايدىڭ فۋچجوۋ قالاسىندا وتكەن VI حالىقارالىق «جىبەك جولى» كينوفەستيۆالىنىڭ جابىلۋ سالتاناتىندا ورىندادى.

بۇرىننان حالىق اراسىندا تانىلعان ءان بولعانمەن، حالىقارالىق ارەنادا بۇل ءاندى تانىتقان ديماش بولىپ سانالادى. انگە زاماناۋي وڭدەۋ جاسالىپ، قوبىزبەن سۇيەمەلدەنگەن. جەلى قولدانۋشىلارى ديماش قۇدايبەرگەننىڭ ورىنداۋىنا دا، «سامالتاۋ» انىنە دە ءتانتى بولعانى بۇعان دەيىن تالاي ايتىلىپ، جازىلدى.

ەرەكشە داۋىس يەسى

ديماشتىڭ داۋىسى تۋرالى ايتار بولساق، تابيعي دياپازونى وتە كەڭ جانە ونىڭ داۋىسى ونىڭ ءبىر تۇرىمەن عانا شەكتەلمەيدى، سونىمەن قاتار ءداستۇرلى كلاسسيفيكاسياعا دا جاتپايدى. ديماشتى اكادەميالىق ەمەس، ءبىراق ەسترادالىق باعىتتا «بىرنەشە داۋىستىڭ» يەسى دەپ ايتا الامىز جانە بارلىق رەگيسترلەردە (تومەنگى، ورتا جانە جوعارعى) «ءبىر» داۋىسپەن ءان ايتاتىن «ءداستۇرلى انشىگە» دە ۇقسامايدى، سودان كەيىن ديماش ءارتۇرلى رەگيسترلەردە ءارتۇرلى داۋىستا: تومەندە ەسترادالىق باريتون، سودان كەيىن تەنورعا اينالادى، ال جوعارعى داۋىسقا جەتكەندە اشىق سوپرانو فالسەتتو (كونتراتەنوردىڭ ناق ءوزى)، سونداي-اق ارالاس جانە ىسقىرىق تا بار عاجايىپ داۋىس يەسى.

ديماشتى ناقتى جانە ناقتى داۋىستىڭ اياسىنا سىيعىزۋ  مۇمكىن ەمەس، ونى «تەك» تەنور، باريتون نەمەسە كونتراتەنور دەپ ايتۋعا بولمايدى. ونىڭ داۋسىندا «ءارتۇرلى» داۋىستاردان «ءارتۇرلى» قاسيەتتەر بار – جانە وسى قىرى ونى باسقالاردان ەرەكشەلەپ تۇرادى .  ەگەر ءداستۇرلى ءانشى بارلىق رەگيسترلەردە «ءبىر» داۋىسپەن ءان ايتسا، ديماش ءارتۇرلى رەگيسترلەردە ءارتۇرلى داۋىسپەن ءان سالادى. سونىڭ ناتيجەسىندە ديماشتىڭ داۋسى تابيعاتتىڭ سيرەك سىيى، سونىمەن قاتار ۇلكەن ەڭبەك پەن تىنىمسىز ەڭبەكتىڭ جەمىسى دەپ ايتا الامىز.

الەم جۇلدىزى - ديماش باسقا جۇلدىزدارمەن

ديماش پەن دجەكي چان بۇرىننان جاقسى تانىس. قازاق ءانشىسى قىتايدا وتكەن I am Singer جوباسىندا ميلليونداعان قاۋىمنىڭ جۇرەگىن جاۋلاعان بولاتىن. سوندا ايگىلى اكتەرمەن كەزدەسىپ، يىعىنا قازاقتىڭ شاپانىن جاۋىپ، قوڭىر ءۇندى دومبىراسىن دا سىيعا تارتقان ەدى.

ديماش قۇدايبەرگەن ماسكەۋ ساحناسىندا «Ti amo cosi» ءانىن لارا فابيانمەن بىرگە ورىندادى.

تۋعان كۇنىندە – جاڭا بەينەبايان

ديماش قۇدايبەرگەن  24 مامىر، ياعني بۇگىن  YouTube ارناسىندا جاڭا بەينەباياننىڭ تۇساۋى كەسىلەتىنىن جەتكىزدى.

ءومىر - اق پەن قارا الماسقان، ب ا ق پەن نالا ارباسقان، قۋانىش پەن قايعى تالاسقان، تەڭدەسسىز الىپ كەمە. ايدىنداعى سۇراپىل تولقىنعا دا، داۋىلعا دا توتەپ بەرۋىمە تۇرتكى بولىپ جۇرگەن بارشا تىڭدارمانىما تۋعان كۇنىمنىڭ قارساڭىندا شىعاتىن، العاش رەت اۋەنى مەن ءسوزى جان دۇنيەمدى جارىپ شىققان شىعارما. بۇل تۋىندى مەنىڭ ءومىرىم جايىندا»،- دەپ جازدى ءانشى الەۋمەتتىك جەلىدەگى پاراقشاسىندا.

بۇگىن ديماش قۇدايبەرگەن 29-عا كەلدى.

ەرەكشە داۋىسىمەن تەك قازاق حالقىن عانا ەمەس بۇكىل الەمدى الديلەگەن ءبىرتۋار ۇلدىڭ تاريحتا ەسىمى قالارى انىق. وسى كەزدە دەيىن ەل اتىن تانىتۋدا ءانشىنىڭ جاساعان ەڭبەگى از ەمەس، دەگەنمەن الدا ءالى دە تالاي باعىندىرار، قازاقتىڭ وسىنداي ەرەكشە تۋعان بالاسى  بارىن مويىنداتار دەگەن سەنىم مول.

ديماش قۇدايبەرگەنگە ۇزاق عۇمىر مەن شىعارماشىلىق تابىس تىلەي وتىرا، ماڭدايىنداعى جۇلدىزى كۇللى الەمگە جارقىراي بەرسىن دەگىمىز كەلەدى.