ەرەكشە تەگى بار قازاقتىڭ تاعى ءبىر تالانتتى بالاسى – ەرجان ماقسىم.
بۇگىندە ەرجان ماقسىم ەسىمى ەلگە كەڭىنەن ءمالىم، كوپشىلىككە، اسىرەسە، مۋزىكاعا ءبىر تابان جاقىن جاندارعا جاقسى تانىس بولار. «ءبىزدىڭ ماقتانىشىمىز» شىعارىلىمىنىڭ بۇل جولعى سانىن ەرەشە داۋىس يەلەرىنىڭ ءبىرى، كۇشتى داۋىس يەسى ماقسىم ەرجانعا ارناۋدى ءجون سانادىق.
بالالىق شاعى
ەرجان 2007 جىلى 1 قاڭتاردا ەلىمىزدىڭ ورال قالاسىندا دۇنيەگە كەلگەن. ۇلتى – قازاق. تەگىنە قاراپ، «ۇلتى تازا قازاق پا؟» دەگەن سۇراقتار كوپ قويىلسا كەرەك. ەرجاننىڭ ءوزىنىڭ ايتۋىنشا، ونىڭ اتاسىنىڭ اتى ماقسىم بولعان. الايدا قۇجاتتا ماكسيم بولىپ جازىلىپ كەتىپتى.
ەرجان وتباسىندا ەكى اپكەسىنەن كەيىنگى كەنجەسى. 3-4 جاسىنان بەرى ءان ايتا باستاعان، ۇلدارىنىڭ انگە دەگەن قابىلەتىن بايقاعان اتا-اناسى ونى بەس جاسىنان باستاپ، ۆوكالعا بەرگەن. 9 جاسىنان باستاپ ورالداعى جەرگىلىكتى مۋزىكالىق مەكتەپتىڭ فورتەپيانو سىنىبىنا قابىلدانىپتى.
تابيعاتىنان اشىق، ەلگەزەك ەرجان سپورتتى دا ەرەكشە جاقسى كورەدى ەكەن. ول روليكتى كونكي تەپكەندى، سونىمەن بىرگە فۋتبول ويناۋعا دا جانى قۇمار.
ساحنا، مۋزىكا
كەز كەلگەن ءانشىنىڭ باعى ساحنادا اشىلادى، ساحنادا جۇلدىزى جانادى، ساحنا ارقىلى تانىلادى. ەرجان ۆوكالعا ۇزاق ۋاقىت قاتىسقان، داۋسىن قويۋعا ارنالعان ارنايى جاتتىعۋلاردى دا جاساپ جۇرگەن. دەيتۇرعانمەن، باستاپقىدا ساحناعا شىعار الدىندا بالا ەرجان قوبالجىعاننان ءجيى جىلاسا كەرەك. ۋاقىت وتە كەلە، بۇل قورقىنىشىن جەڭگەن ەرجان ماقسىم قازىرگى تاڭدا كورەرمەن الدىندا ءوزىن ەركىن ۇستايتىن، وزىنە، باستىسى، ءوز داۋىسىنا سەنەتىن مۋزىكانتقا اينالدى.
كوپتەگەن مۋزىكالىق بايقاۋلارعا قاتىسىپ جۇرگەن ەرجان حالىقارالىق ارەناداعى العاشقى جەتىستىكتەرىنە 9 جاسىندا قول جەتكىزدى. جاس دارىن 2016 جىلى گرۋزيانىڭ باتۋمي قالاسىندا وتكەن «دەلفين فەست» ءان بايقاۋىنا قاتىسىپ، باس جۇلدەنى يەلەندى. ءدال سول جىلى لاتۆيادا سول بايقاۋعا ۇقساس كونكۋرستا دا باعىن سىناپ كوردى. وندا ول بىردەن بىرنەشە اتالىم بويىنشا قاتىسىپ، 2 التىن مەن 1 كۇمىس جۇلدەنى يەلەندى.
2017 جىلى جاس ورىنداۋشى ءوزىن يتاليادا وتكەن San Remo Junior بايقاۋىندا تانىتتى. بۇل جەردە ول فينالعا ءوتىپ، سيمفونيالىق وركەستردىڭ سۇيەمەلدەۋىمەن جاندى داۋىستا ءان ورىندادى. جاس ونەرپازدىڭ بۇل ورىنداۋى كورەرمەندەردى تاڭ قالدىرىپ، كوپتىڭ ەسىندە قالدى.
كوپ ۇزاماي، ەرجان ۆيتەبسكتە «سلاۆيان بازارىنا» قاتىسىپ، ەكىنشى ورىننان كورىندى. ەرجاننىڭ اتا-اناسى گۇلميرا الىبەك پەن ەربول ناۋموۆ ۇلدارىنىڭ تالاتىن تانىتىپ، ءانىن شىڭداۋ ءۇشىن قولدارىنان كەلگەنىن اياماي كەلەدى.
ەرجان ماقسىمنىڭ انشىلىك كارەەراسىندا ماڭىزدى كەزەڭدەردىڭ ءبىرى – «بالالار ەۆروۆيدەنيەسى -2018» بايقاۋى بولدى. بۇل سايىستىڭ ىرىكتەۋ كەزەڭدەرىنە قازاقستاننىڭ تۇكپىر-تۇكپىرىنەن كوپتەگەن بالا قاتىستى. ءبىراق ۇلتتىق ىرىكتەۋگە ون قاتىسۋشى عانا ءوتتى. سولاردىڭ قاتارىندا ەرجان ماكسيم دا بولدى. ءان بايقاۋىندا ەرجاننىڭ ءبىرىنشى ورىن الۋىنا ۇپايى جەتپەي قالعانمەن، بۇل سايىس ول ونىڭ باسقا جوبالارعا قاتىسۋىنا جول اشتى.
ەرجاننىڭ اتىن شىعارعان شوۋ
2019 جىلى ەرجان ماقسىم رەسەيدىڭ ءبىرىنشى ارناسىنىڭ «گولوس.دەتي» شوۋىنىڭ 6-شى ماۋسىمىنا قاتىستى. وقۋشى فەدەرالدىق ارنادا ونەر كورسەتۋ تۋرالى شەشىمىن ءوزىنىڭ تالانتىن كورسەتىپ، الەمدى مويىنداتۋ نيەتىمەن ءتۇسىندىردى.
بۇل ونىڭ كىشكەنتاي كەزىنەن ارمانى ەدى، ءبىراق اتا-اناسى ۇلى قاجەتتى تاجىريبە جينادى-اۋ دەگەن كەزدە ولار ونى سول شوۋعا قاتىستىرۋعا ءوتىنىش بەرۋىنە رۇقسات بەردى.
بايقاۋدىڭ «كورمەي تىڭداۋ» دەپ اتالاتىن 1-كەزەڭى ءۇشىن ەرجان اندرەا بوچەلليدىڭ «Ama credi e vai» ءانىن تاڭداعان بولاتىن. سول كۇنى جاس ورىنداۋشىلارعا تورەلىك ەتەتىن تالىمگەرلەر قاتارىندا پەلاگەيا، سۆەتلانا لوبودا جانە ۆالەريي مەلادزە بولدى. تورەلىك ايتقان اتاقتى مۋزىكانتتار ەرجاننىڭ ورىنداۋىن جوعارى باعالاپ، ونەرىنە ەرەكشە ءتانتى بولىپ جاتتى. بۇل كەزەڭنەن وتكەن بالا ءانشى ۆالەريي مەلادزەنى وزىنە تالىمگەر رەتىندە تاڭدادى.
داۋىستىڭ كۇشتىلىنەن ستاكان سىنىپ كەتكەن
ءان بايقاۋىنىڭ ەكىنشى كەزەڭىندە قاتىسۋشىلار تريوعا بىرىكتىرىلىپ، تالىمگەر تاڭداعان ءاندى ورىنداۋ قاجەت بولدى. بۇل سىندا ەرجانمەن بىرگە يۆان ستاريكوۆ پەن يسلام بالكويەۆ ەسىمدى قاتىسۋشىلار ءبىر توپتا ونەر كورسەتتى. جاس بالالار ءمۇسىلىم ماگومايەۆتىڭ «سينيايا ۆەچنوست» ءانىن ورىندادى. ءبىزدىڭ ەلدىڭ نامىسىن قورعاعان ەرجان ماقسىمنىڭ ءوز پارتياسىن ءمىنسىز ورىنداعانى سونداي، ديريجەردىڭ جانىندا تۇرعىن ستاكان شىنىسى شىتىناپ كەتكەن ەدى. مۇنداي قۇبىلىستى ەرجاننىڭ داۋىسىنىڭ كۇشتىلىگىنەن دەپ باعا بەرىلىپ جاتتى سول كەزدە. وقۋشىنىڭ ونەرىنە ءتانتى بولعاندار سول ساتتە ءبىرازعا دەيىن قوشەمەت كورسەتىپ،ۇزاق ۋاقىت بويى قول سوعىپ تۇردى. كورەرمەننىڭ ىستىق ىقىلاسىنان-اق بۇل سىندا كىمنىڭ وزىق شىققانى بەلگىلى ەدى. بايقاۋدى ارى قاراي جالعاستىراتىن قاتىسۋشىنى انىقتاۋ كەزىندە تاڭداۋ بىردەن قازاق بالاسى ەرجانعا ءتۇستى. بايقاۋ قورىتىندىسىندا ەرجان ماقسىم ەكىنشى ورىنعا يە بولدى.
قالاي دەگەنمەن ەرجاننىڭ كەڭىنەن تانىمال بولۋى ءدال وسى بايقاۋدان باستالعان ەدى.
قازاقتىڭ باعىنا بىتكەن بالا
ەرجان ماقسىمنىڭ ونەردەگى اعاسى، قولداۋشىسى، بۇگىندە ەسىمى الەمگە ايگىلى ديماش قۇدايبەرگەن «گولوس. دەتي» شوۋىنىڭ سۋپەر فينالىنا شىعىپ، جەڭىسكە ءبىر تابان جاقىن قالعان ەرجان تۋرالى ءوز پىكىرىن بىلدىرگەن بولاتىن.
«باۋىرساق بالا! سەنىڭ فينالدا كورسەتكەن ونەرىڭدى تاماشالاپ شىقتىم. قازاعىمنىڭ باعىنا بىتكەن بالاسىڭ. جەڭىسىڭ قۇتتى بولسىن، ەرجانتاي! الار اسۋلارىڭ كوپ بولسىن. 100 ميلليوننان استام حالىقتىڭ اراسىنان 2 - ورىن الۋ دەگەن وتە ۇلكەن جەتىستىك. ءبىرىنشى ورىندى قىز بالاعا جىگىتتىك تانىتىپ بەرە سالعانىڭ دا دۇرىس بولدى. ناعىز دجەنتەلمەن سونداي بولادى! بارلىق قاتىسقان بۇلدىرشىندەردى قۇتتىقتايمىن. ءبىراق مەن ءۇشىن ەرجانتاي جەڭىمپاز!» – دەپ جازعان بولاتىن سول كەزدە ديماش Instagram جەلىسىندەگى پاراقشاسىنا.
ەرجاننىڭ ونەرىنە بۇدان اسقان باعا بار ما؟! ەرجاننىڭ ءوزى دە ديماش اعاسىن وزىنە ۇلگى تۇتىپ، الەمدىك جۇلدىزعا قاراپ، بوي تۇزەپ كەلەدى.
قىزىل كىلەم، سىيلى قوناق
ديماش قۇدايبەرگەن مەن ەرجان ماقسىم 2019 جىلى «مۋز-تۆ 2019» كەشىنە ارنايى شاقىرىلعان بولاتىن. مۋزىكالىق شارادا ەرجان ماكسيم «All by myself» ءانىن اۋەلەتە شىرقاپ، زالدىڭ ۇلكەن قولداۋىنا يە بولدى.
ديماش قۇدايبەرگەن مەن ەرجان ماقسىم «مۋز-تۆ» سىيلىعىنا ارنالعان سالتاناتتىڭ قىزىل كىلەمىمەن ءجۇرىپ ءوتىپ، ەل مەرەيىن تاعى ءبىر اسقاقتاتقان بولاتىن.
2019 جىلى ەرجان تاعى ءبىر بايقاۋدا ب ا ق سىنادى («پەسنيا نا ۆىلەت»). بۇل كونكۋرستا دا جاس ءانشى بوچەلليدىڭ «Ama credi e vai» ءانىن قايتا ورىنداپ، بىردەن فينالعا ءوتتى. ءبىراق جارىس قورىتىندىسى بويىنشا، رەسەيلىك ءانشى السۋدىڭ قىزى جەڭىسكە جەتتى.
WAF CONTEST – باس جۇلدە
بيىلعى جىلدىڭ باسىندا قازاقستاندىق جاس ءانشى ەرجان ماقسىم ماكەدونيا استاناسى سكوپە قالاسىندا وتكەن WAF CONTEST حالىقارالىق بايقاۋىنىڭ باس جۇلدەسىن جەڭىپ الدى.
ءبىر ايتا كەتەتىنى، ءقازىر جاس ءانشى قازاق ۇلتتىق ونەر ۋنيۆەرسيتەتى مەكتەبىنىڭ ەسترادالىق ۆوكال بويىنشا 9-سىنىبىندا وقيدى.
ەرجان ماقسىم سونىمەن قاتار جىل سايىنعى WAF AWARDS جۇلدەسىنە يە بولدى.
ۋنيۆەرسيتەت مالىمەتى بويىنشا، بۇل ەكى جارىستى دۇنيەجۇزىلىك فەستيۆالدار قاۋىمداستىعى وتكىزەدى. WAF وتكىزگەن ءار ءتۇرلى بايقاۋلاردىڭ بەلسەندى قاتىسۋشىلارى جىل قورىتىندىسىنا سايكەس ماراپاتتالادى.
بيىلعى جىلى WAF CONTEST بايقاۋىندا ەۋروپا جانە ازيانىڭ 16 مەملەكەتىنەن، سونىڭ ىشىندە قازاقستاننان 32 قاتىسۋشى ب ا ق سىنادى.
ولاردىڭ اراسىنان ەرجان ماقسىم بايقاۋدىڭ گران-پري يەگەرى اتاندى. ول ءوزىنىڭ جەڭىسىن قازاقستانعا، سونداي-اق قازاق ۇلتتىق ونەر ۋنيۆەرسيتەتىنە ارنادى. بۇل ۋنيۆەرسيتەتتىڭ بيىل تويلاناتىن 25 جىلدىعىنا العاشقى تارتۋ بولدى.
«ءقازىر ەرجان 15 جاستا. ونىڭ ورالدا باستالعان انشىلىك جولى وسىلايشا تابىستى جالعاسۋدا»، - دەيدى ەرجاننىڭ اناسى گۇلميرا الىبەك.
بۇگىندە ەرجان الىپ جۇرگەن مۋزىكالىق بىلىمىنەن بولەك، انشىلىگىن شىڭداپ، ءان جازىپ، وتاندىق شوۋ-باعدارلامالارعا قاتىسىپ، باعىن سىناپ ءجۇر. جاس تا بولسا، وسى جاسىنا دەيىن ءانشىنىڭ جەتكەن جەتىستىكتەرى از ەمەس. الەمدىك ارەنادا قازاقستان اتىن شىعارار جاستاردىڭ ءبىرى دەپ ماقتانىشپەن، زور سەنىممەن ايتۋعا بولاتىن وسىنداي جاستىرىمىزدىڭ بارى قۋانتادى.