الماتى قالاسى ورتالىقتاندىرىلعان كىتاپحانا جۇيەسى جامبىل اتىنداعى قالالىق جاسوسپىرىمدەر كىتاپحاناسىنىڭ كەڭىستىگى «رۋحاني جاڭعىرۋ» باعدارلاماسى اياسىندا مودەرنيزاسيالانعان. وسى رۋحاني مەكەنگە مەملەكەت باسشىسى الماتىعا ساپارىندا ارنايى ات باسىن بۇرعان ەدى. كىتاپحانانىڭ تىنىس-تىرشىلىگىمەن تانىسىپ، جاستارمەن، وقىرماندارمەن جۇزدەسكەن بولاتىن.
كوپ ۇزاماي پرەزيدەنتتىڭ حالىققا جولداۋىنان مادەنيەت قىزمەتكەرلەرى، ونىڭ ىشىندە كىتاپحاناشىلاردى اتاپ ايتقانى كوڭىلگە قۋانىش ۇيالاتقانى راس.
ءسوزدىڭ راسى، كىتاپحاناشىلاردىڭ ەڭبەگى كوپ جاعدايدا ەلەنبەي، قالىس قالىپ جاتادى.
باياعىدا ءبىر مەملەكەتتى قۇرتۋ ءۇشىن كىتاپحانالارىن ورتەگەن ەكەن. بۇل دەگەن - تاريحتى جوعالتۋ. كىتاپحانا - تۇتاس ءبىر ەلدىڭ تاريحىن ساقتاۋشى وشاق. سوندىقتان كىتاپحانالارعا ەرەكشە كوڭىل ءبولىنۋى دە تاريحي وقيعا ءبىز ءۇشىن.
سونداي-اق ۇلتتىق قوعامدىق سەنىم كەڭەسىنىڭ 4-وتىرىسىندا: «بۇگىنگى زاماندا كىتاپسىز، سونداي-اق كىتاپحاناسىز ادامنىڭ ويداعىداي دامۋى مۇمكىن ەمەس. بۇكىل الەمدەگى كىتاپحانالار - ءبىلىم مەن مادەنيەتتىڭ وشاعى، جاڭا ويلار مەن تىڭ پىكىرلەردىڭ مەكەنى. ەلەكتروندى فورماتتىڭ قارقىندى دامىپ جاتقانىنا قاراماستان، ءداستۇرلى كىتاپحانانىڭ اعارتۋشىلىق ءرولى ەشقاشان ءمانىن جوعالتپايدى. بۇل رەتتە وسى سالاداعى زاماناۋي ۇردىستەردى ەسكەرگەنىمىز ءجون. مىسالى، مەن الماتى قالاسىنداعى كىتاپحانالاردى جاڭعىرتۋعا ارنالعان وسىنداي ۇتىمدى جوبالار بار ەكەنىن بىلەمىن»، - دەگەن بولاتىن مەملەكەت باسشىسى قاسىم-جومارت توقايەۆ.
مەملەكەت باسشىسىنىڭ بۇگىنگى جولداۋىندا دا ەلىمىزدەگى، مەملەكەتىمىزدەگى جانە حالىقارالىق باستى جاعدايلار ءسوز بولدى.
كىتاپحانا مەملەكەتتىك باعدارلامالار تۋرالى وقىرماندارىنا جەتكىزۋگە مىندەتتى. ءبىز، كىتاپحاناشىلار، جولداۋداعى قامتىلعان بارلىق باعىتتارعا ارنايى ءتۇسىندىرۋ، تالقىلاۋ، پىكىرلەسۋ جۇمىستارىن جوسپارلاپ وتىرمىز.
«حالقىمىز ءۇشىن زيالى قاۋىمنىڭ ورنى قاشاندا ەرەكشە. ۇلت تاعدىرى سىنعا تۇسكەن ساتتە كوزى اشىق ازاماتتار ءاردايىم كوش باستاعان. ادامدارعا ءجون سىلتەپ، جاستارعا باعىت-باعدار بەرگەن. ەل اعالارى ءبىر اۋىز سوزبەن تەنتەگىن تىيىپ، تەكتىسىن تورگە وتىرعىزعان. ءبىز قانىمىزعا سىڭگەن وسى قاسيەتتەن ايىرىلماۋىمىز قاجەت. ءقازىر عالامتور ءداۋىرى. ونداعى بەيبەرەكەت اقپارات ۇرپاقتىڭ ساناسىن ۋلاپ جاتىر. ءبىر ساتتىك تانىمالدىقتى كورسەتەتىن تامىرسىز يدەيالار جاپپاي بەلەڭ الۋدا. ءدال وسى كەزەڭدە ۇلت زيالىلارىنىڭ ۇستانىمى جانە بەلسەندىلىگى ايرىقشا ماڭىزدى. زيالىلاردىڭ ەڭبەگى ماراپاتىمەن ەمەس، ساليقالى سوزىمەن جانە ناقتى ىسىمەن باعالانادى»، - دەدى مەملەكەت باسشىسى بۇگىنگى جولداۋىندا.
كىتاپحانالار وسى زيالى قاۋىم، اقىن-جازۋشى، عالىم، تاريحشىلاردىڭ ەڭبەكتەرىن وقىرماندارعا ناسيحاتتاپ، بىلىمگە قۇشتارلىقتارىن ارتتىرىپ، جاستاردىڭ بوس ۋاقىتتارىن ءتيىمدى پايدالانۋىنا كومەكتەسەتىن بىردەن-بىر ورتالىق رەتىندە جۇمىسىن جالعاستىرا بەرمەك.
«2022 جىلدان باستاپ مۋزەي قىزمەتكەرلەرى مەن كىتاپحاناشىلاردىڭ جالاقىسى وسەدى». بۇل دا - بۇگىنگى جولداۋدىڭ ءبىز ءۇشىن ماڭىزدى تۇسى. ەل رۋحانياتىن، ونىڭ ىشىندە جاستاردىڭ رۋحاني بايلىعىن كوتەرۋگە اتسالىسىپ وتىرعان مامانداردىڭ تۇرمىستىق الەۋەتىنىڭ جاقسارعانى، ارينە، جاقسى.
ەندەشە، مەملەكەت باسشىسىنىڭ مادەنيەت قىزمەتكەرلەرىن قولداۋ تۋرالى ايتقانى قوعامدا كىتاپحاناشىنىڭ مارتەبەسىن كوتەرىپ، بەدەلىن ارتتىرارى ءسوزسىز.
جالپى، ادام رۋحاني بايىپ، ساناسى سەرپىلمەي، ەشقانداي جەتىستىككە جەتە المايتىنى باسەنەدەن بەلگىلى. سوندىقتان مادەنيەت، ءبىلىم سالاسىنا باسا كوڭىل بولگەنى بۇل سالالارعا دا ايتارلىقتاي وزگەرىس ەنگىزەرى انىق.
جيىرما ءبىرىنشى عاسىر – اعىمى بولەك عاسىر. تىم جىلدام، تىم جاڭا ءارى جاڭالىقتارعا تولى. وسى تولقىنىستان جامبىل جاسوسپىرىمدەر كىتاپحاناسى قالىس قالماي، ەل بولاشاعى، مەملەكەت دامۋى ءۇشىن جاسالعان اسا ماڭىزدى جولداۋعا قولداۋ بىلدىرەمىز.
كىتاپحانا بىلىم-مادەنيەت وشاعى، اقپارات ورتالىعى بولعاندىقتان، وسى جولداۋدىڭ حالىققا جەتۋىنە جانە ەلىمىزدىڭ دامۋىنا ءاربىر ازامات مۇددەلى ەكەنىن جەتكىزۋ ءۇشىن ءبىرقاتار ءىس-شارالار، تۇسىندىرمە جۇمىستارى جۇرگىزىلەتىن بولادى.