بۇگىن ءداستۇرلى ونلاين تانىستىرىلىم كەزىندە قالا اكىمى باقىتجان ساعىنتايەۆ وسىلاي دەدى.
سونىمەن قاتار قالا باسشىسى ەل اراسىندا ايتىلىپ جۇرگەن «قايتادان ونلاين وقۋ بولادى ەكەن» دەگەن الىپقاشپا اڭگىمەنىڭ دە نۇكتەسىن قويدى، دەپ حابارلايدى Almaty-akshamy.kz ءتىلشىسى.
بالامىزعا مەكتەپ كيىمىن الىپ قويساق، قايتادان ونلاينعا اۋىسىپ كەتپەي مە، مەكتەپتىڭ قاجەتتىلىگى دە از شىعىن ەمەس قوي دەگەن تىڭدارمان سۇراعىنا قالا اكىمى بىلاي دەپ جاۋاپ بەردى:
«ءبىز بالالاردى ءبىر جارىم جىل ونلاين رەجيمدە وقىتتىق، ۇدايى بۇلاي ۇستاپ وتىرا المايمىز. مەملەكەت باسشىسى دا، ۇكىمەت تە تاپسىرما بەردى، ءبىلىم ءمينيسترى دە بيىلعى ساباق مەكتەپتە وتەدى دەدى. دەمەك، ءبىز بيىلعى وقۋ جىلىن وففلايندا باستايمىز. قالانىڭ ءتيىستى قىزمەتى مەكتەپتى دايىنداۋعا كىرىسىپ كەتتى، دەزينفەكسيا جۇمىستارى دا جۇرگىزىلىپ جاتىر. سوندىقتان ءبىز ادەتتەگىدەي 1 قىركۇيەكتە وقۋشىلاردى قارسى الۋعا دايىنبىز».
مەگاپوليس باسشىسىنىڭ ايتۋىنشا، بارلىق مەكتەپتە Ashyq جۇيەسى جۇمىس ىستەپ تۇرادى.
«ۇستازداردىڭ بارلىعى ۆاكسينانىڭ ەكى كومپونەنتىن دە سالدىردى. مۇعالىمدەردەن بولەك مەكتەپتە جۇمىس ىستەيتىن قىزمەتكەردىڭ ءبارى ەكپە الۋى كەرەك. ءبىراق اتا-انالار تاراپىنان دا سونداي دايىندىق كەرەك، اتا-انالاردىڭ بارلىعى ەكپە سالدىرعان بولۋى ءتيىس. دەنى ساۋ اتا-انانىڭ بالاسىنىڭ دا دەنى ساۋ بولاتىنىن ۇمىتپايىق»، -دەدى باقىتجان ءابدىر ۇلى.
قالا اكىمىنىڭ مالىمدەۋىنشە، بەلگىلى ساناتتاعى وقۋشىلارعا اكىمدىك تاراپىنان كومەك تە جاسالىپ جاتىر.
«مەكتەپتى دايىنداۋمەن قاتار، جىلداعىداي تۇرمىسى تومەن وتباسى بالالارىن مەكتەپكە دايىنداۋ شاراسىن دا باستاپ كەتتىك. «مەكتەپكە جول» اكسياسى اياسىندا كومەك كورسەتىلەتىن ءۇيدىڭ بالالارىنىڭ ءار اۋدان اكىمشىلىگىندە ءتىزىمى بار. ول بالالاردىڭ مەكتەپكە قاجەتتى زاتتارىن الىپ بەرۋ جۇمىسى ءجۇرىپ جاتىر»، - دەدى الماتىنىڭ اكىمى.