كۇزدىڭ ءساندى تۇستەرى: Pantoneء-نىڭ ۇسىنىستارى جانە ستيليست كەڭەسى
كۇز – كيىم، اكسەسسۋار جانە سىرتقى وبرازدى تولىق جاڭارتۋ كەزەڭى. بيىلعى كۇزدىڭ تۇستەرى بۇرىنعىدان دا ەرەكشە. ءسان الەمىندەگى ءتۇس ساراپشىسى – Pantone Color Institute ءوزىنىڭ Fashion Colour Trend Report Autumn/Winter 2025-2026 اتتى زەرتتەۋىندە «جىل ءتۇسى» رەتىندە – Mocha Mousse – جىلى، قانىق قوڭىر ءتۇستى تاڭدادى.
نەگىزگى ءتۇس ترەندتەرى
1. «Mocha Mousse» – ساندەگى بەيتاراپ بازالىق رەڭكتەردىڭ ءبىرى. ءبىرىڭعاي مونوحروم (بارلىق كيىم ءبىر رەڭكتە) وتە ءساندى. سونىمەن بىرگە، Mocha Mousse-تى اشىق تۇستەرمەن ۇيلەستىرىپ كيۋ دە جاراسىمدى.
2. «Winterberry» ءتارىزدى قىزعىلت ءتۇس – ءسان سالاسىنىڭ ماماندارى بۇل رەڭكتى كۇز/قىس ماۋسىمىنداعى ماڭىزدى اكسەنت دەپ تانىدى. بۇل ءتۇستى دە باستان اياق كيۋگە نەمەسە قارا، كوگىلدىر، سۇر بازالىق تۇسپەن ۇيلەستىرۋگە بولادى.
3. Brandied Melon / Amber – بۇل رەڭك تە كۇزدە ەرەكشە تابيعي كورىنەدى. بۇل قوڭىر جانە ءسۇت رەڭكتى تۇسپەن وتە ادەمى ۇيلەسەدى.
4. Fern / Olive Green – بۇل دا تابيعي ءتۇس بولعاندىقتان اسىرەسە، سەرۋەنگە، قىدىرىسقا كيەتىن كيىمگە ەرەكشەلىك بەرەدى. اقشىل نەمەسە قارا تۇستەرمەن جاقسى ۇيلەسەدى. سونداي-اق، جاسىلدى اكسەسسۋار ارقىلى اكسەنت رەتىندە قولدانۋعا بولادى.
5. Deep Plum / Damson – سانگەرلەر كۇلگىن ءتۇستى دە كۇزگى ترەند رەتىندە قابىلدادى.ۆەلۆەت، اتلاس، بىلعارى سياقتى ماتەريالدارعا بۇل ءتۇس ەرەكشە جاراسىمدى، قارا جانە مەتالل ەلەمەنتتەرمەن تولىقتىرۋعا بولادى.
ستيليستەر نە دەيدى؟
ىلعي ءبىر ءتۇستى كيىم كيۋگە ۇيرەنگەندەرگە ماماندار جاڭا، ءساندى رەڭكتەردى بىرتىندەپ ەنگىزۋگە كەڭەس بەرەدى.
1. تۇستەردى بىر-ەكى اكسەنتپەن قوسىپ كورىڭىز. ەگەر بۇرىن كۇزدە قارا-اق، قارا-قوڭىر ءتۇستى كوبىرەك قولدانعان بولساڭىز، بيىل Mocha Mousse، ءزايتۇن نەمەسە كۇلگىن رەڭكتى ءبىر اكسەسسۋار الىڭىز.
2. تەك تۇسكە عانا ەمەس، تەكستۋراعا دا ءمان بەرىڭىز. ءتۇسىنىڭ ادەمىلىگىمەن قاتار، ماتانىڭ ساپاسى دا ماڭىزدى: مىسالى، Mocha Mousse ءتۇستى كاشەمير، ۆەلۆەت، جوعارى ساپالى بىلعارى بۇيىمدار ەرەكشە كورىنەدى.
3. مونوحروم (ءبىر ءتۇستى كيىم) ترەندىن قولدانىڭىز. تولىقتاي قوڭىر كوستيۋم نەمەسە سىرتقى كيىم – كۇزدىڭ ءساندى سيمۆولى.
4. تۇستەردى ۇيلەستىرىڭىز. مىسالى، Mocha Mousse + ءزايتۇن جاسىل، نەمەسە قىزىل اكسەنت + بەيتاراپ ءتۇستى كونتراست پەن ۇيلەسىم وبرازدى جانداندىرادى.
5. تەرىڭىزدىڭ رەڭىن ەسكەرىڭىز. جىلى رەڭكتى تەرى ءۇشىن (قوڭىر، توقسارى، جاسىل) جاقسى بولسا، سالقىن رەڭكتى تەرىگە (باكلاجان، بوردو-كۇلگۇن) ۇسىنىلادى.
6. كوڭىل-كۇيگە ساي ءتۇس تاڭداڭىز. Pantone انىقتاعان تۇستەر – جاي عانا ءسان ەمەس، سونىمەن بىرگە ەموسيالىق فون ەكەنىن ەستەن شىعارماڭىز.
ءقازىر سانگە ءمان بەرەتىندەردىڭ قاراسى كوبەيگەن. ءار ماۋسىمدا كويلەك-كونشەگىن جاڭالاۋ ءۇشىن ءستيليستىڭ قىزمەتىنە جۇگىنەتىندەر دە بارشىلىق. قىز-كەلىنشەكتەرگە كيىم تاڭداپ، وبراز قۇراۋعا كومەكتەسىپ جۇرگەن ستيليست گۇلدەن قۋانىش بىلاي دەدى:
2025 جىلدىڭ كۇز-قىس مەزگىلىندەگى ءسان باعىتى تابيعاتپەن ۇيلەسكەن جىلى تۇستەر مەن ەركىن، جايلى ۇلگىلەرگە نەگىزدەلگەن. ماۋسىمنىڭ باستى ءتۇسى – موكا رەڭكى، ياعني قويۋ قوڭىر مەن ءسۇتتى كوفە تۇستەرىنىڭ قوسىندىسى. سونىمەن قاتار، كۇلگىن ءتۇس تە كەڭىنەن قولدانىلادى. ال كۇندەلىكتى كيىمدە سۇر، قارا-قوڭىر سەكىلدى بەيتاراپ تۇستەر وزەكتىلىگىن جوعالتپايدى.
بۇل ماۋسىمدا ءجۇن مەن بارقىتتان تىگىلگەن كيىمدەر سۇرانىسقا يە بولادى. سونىمەن بىرگە، بىلعارى بۇيىمدار دا سانگە ورالىپ وتىر. كيىم ۇلگىلەرىندە قاباتتاپ كيۋ ءتاسىلى كەڭ تارالادى. سەبەبى، بۇل ءارى جىلى، ءارى ءستيلدى كورىنەتىنى ءسوزسىز.
سوڭعى جىلدارى ءسان تەك كوركەمدىككە ەمەس، ەكولوگيالىق تازالىق پەن ۇزاق مەرزىمدىلىككە دە نازار اۋدارا باستادى.