بيىل ۆەتەريناريا ماماندارىنىڭ جالاقىسى 35-50 پايىزعا وسەتىن بولادى.
بۇل تۋرالى اۋىل شارۋاشىلىعى مينيسترلىگىنىڭ كەڭەيتىلگەن القا وتىرىسىندا ايتىلدى، دەپ حابارلايدى Almaty-akshamy.kz.
بىلتىر ۆەتەريناريا ماماندارىنىڭ جالاقىسى رەسپۋبليكا بويىنشا ورتاشا ەسەپپەن 50 پايىزعا وسكەن بولاتىن.
وسى جىلدان باستاپ زاڭناما شەڭبەرىندە پاتوگەندىگى I جانە II توپتارداعى بيولوگيالىق اگەنتتەرىمەن جۇمىس ىستەگەنى ءۇشىن 35% جانە 50% مولشەرىندە قوسىمشا تولەمدەر تولەنەتىن بولادى. بۇل تۋرالى جيىندا اۋىل شارۋاشىلىعى ۆيسە-مينيسترى ءابىلحايىر تامابەك ءايتتى. سونىمەن قاتار، ەكى لاۋازىمدىق ايلىق مولشەرىندە ساۋىقتىرۋ ءۇشىن جاردەماقى تولەنەدى. باسقوسۋدا ۆەتەريناريا جۇيەسىن سيفرلىق فورماتقا كوشىرۋ بويىنشا جۇمىس ءجۇرىپ جاتقاندىعى دا ايتىلدى. بۇل ۆەتەريناريالىق قىزمەتكەرلەردى قاعازباستىلىقتان بوساتۋعا، اقپارات بەرۋ پروسەسىن اۆتوماتتاندىرۋعا جانە جانۋارلاردى ەسەپكە الۋدى جۇزەگە اسىرۋعا مۇمكىندىك بەرەدى.
تاعى ءبىر جاڭالىق – بيىل ءبىرىنشى جارتىجىلدىقتا ەلدە ءىرى قارا مەن ۇساق مالداردىڭ بارلىعى 23 اۋرۋ ءتۇرى بويىنشا تولىق ۆاكسيناسيالاۋدان وتەدى. بۇل ەلدىڭ ەت يمورتى الەۋەتىن ارتتىرۋ ءۇشىن قولعا الىنىپ وتىر.