بيىل تۇركسىب اۋدانىندا جاڭا ەكى مەكتەپتىڭ قۇرىلىسى اياقتالادى

وسى ارقىلى وسى اۋدانداعى مەكتەپتەردەگى ورىن تاپشىلىعى شەشىلەدى. 

ۇستىمىزدەگى جىلدىڭ جەلتوقسان ايىنا دەيىن الماتىلىق قۇرىلىسشىلار تۇركسىب اۋدانىنداعى ەكى مەكتەپتىڭ قۇرىلىسىن اياقتايدى.بۇل تۋرالى الماتى اكىمى ەربولات دوسايەۆ اۋدان حالقىمەن وتكەن كەزدەسۋ بارىسىندا ايتتى، دەپ حابارلايدى Almaty-akshamy.kz. 

شاھار جەتەكشىسىنىڭ سوزىنە جۇگىنسەك، بۇگىنگى تاڭدا الماتىنىڭ تۇركسىب اۋدانىندا مەكتەپتەر مەن بالا باقشالارداعى ورىن تاپشىلىعى جيىنتىقتا 4،2 مىڭ ورىندى قۇرايدى (1،5 مىڭ - مەكتەپ، 2،7 مىڭ – مەكتەپكە دەيىنگى ۇيىمدار). ورىن تاپشىلىعىن ازايتۋ ماقساتىندا ءبىلىم بەرۋ ۇيىمدارىن سالۋ جانە جوندەۋ جوبالارى ىسكە اسىرىلىپ جاتىر. 

«2022 جىلدىڭ جەلتوقسان ايىندا «قايرات» شاعىناۋدانىنداعى 1500 ورىندىق مەكتەپ پەن ۆولوچايەۆسكايا كوشەسىندەگى 300 ورىندىق جەكە مەنشىك مەكتەپتىڭ قۇرىلىسىن اياقتاۋ جوسپارلانعان. بۇل قازىرگى ورىن تاپشىلىعىن تولىعىمەن شەشەدى.وسى جىلدىڭ 3ء-شى توقسانىندا № 59 مەكتەپ-گيمنازيانىڭ جاڭا عيماراتىن سالۋ باستالادى. 1939 جىلى سالىنعان ەسكى عيمارات بۇزىلادى. جىلدىڭ سوڭىنا دەيىن «جاس قانات» شاعىن اۋدانىندا 280 ورىندىق بالا باقشانىڭ قۇرىلىس جۇمىستارى قايتا باستالادى»، - دەدى قالا اكىمى. 

ەربولات دوسايەۆتىڭ ايتۋىنشا، 2023 جىلدىڭ مامىرىندا ستاحانوۆسكايا كوشەسىندەگى №70 ارنايى بوبەكجاي بالا باقشانىڭ عيماراتىن سەيسميكالىق كۇشەيتۋ جانە 2023 جىلدىڭ سوڭىنا دەيىن «قايرات» شاعىناۋدانىنداعى 260 ورىندىق بالاباقشانىڭ قۇرىلىس جۇمىستارى اياقتالادى.

«بۇگىنگى كۇنى №198 جانە №195 2 مەكتەپتەردىڭ 1050 ورىندىق قوسىمشا قۇرىلىستارىنىڭ جانە 480 ورىندىق 2 بالا باقشانىڭ قۇرىلىسىنا، №50 مەكتەپتى سەيسميكالىق  كۇشەيتۋگە جوبالاۋ-سمەتالىق قۇجاتتاما ازىرلەنۋدە»، - دەپ ايتتى قالا اكىمى.