تەك وسىمدىك شارۋاشىلىعى بويىنشا 107،2 ملرد تەڭگە باعىتتالادى
بۇگىندە ەلىمىزدىڭ بارلىق وبلىسى جاپپاي ەگىس ناۋقانىنا كىرىستى، دەپ حابارلايدى Almaty-akshamy.kz.
«ەگىس ناۋقانىن وڭتايلى جانە قاجەتتى مەرزىمدە وتكىزۋ ءۇشىن مەملەكەت تاراپىنان بارلىق شارالار قابىلداناتىن بولادى. بيىل شارۋالارعا بۇرىن-سوڭدى بولماعان كومەك كورسەتىلەدى»، - دەپ ءتۇسىندىردى اشم وسىمدىك شارۋاشىلىعى دەپارتامەنتىنىڭ ديرەكتورى ازات سۇلتانوۆ.
پرەزيدەنت قاسىم-جومارت توقايەۆتىڭ تاپسىرماسىنا سايكەس اۋىل شارۋاشىلىعىن قارجىلاندىرۋ كولەمى ۇلعايتىلدى، بۇل ەلدىڭ ازىق-تۇلىك قاۋىپسىزدىگىن ساپالى قامتاماسىز ەتۋگە مۇمكىندىك بەرەدى.
اوك-نى مەملەكەتتىك قولداۋعا بولىنگەن قوسىمشا قاراجاتتى ەسكەرە وتىرىپ، رەسپۋبليكالىق بيۋدجەتتى ناقتىلاۋ ناتيجەلەرى بويىنشا 449 ملرد تەڭگە كوزدەلگەن.
تەك وسىمدىك شارۋاشىلىعى باعىتى بويىنشا 107،2 ملرد تەڭگە باعىتتالادى، سونداي-اق الەۋمەتتىك نان ءوندىرىسىنىڭ ماڭىزدىلىعىن ەسكەرە وتىرىپ، استىقتى سۋبسيديالاۋ ءۇشىن 9،2 ملرد تەڭگە كوزدەلگەن.
اكىمدىكتەردىڭ دەرەكتەرىنە سايكەس، بيىل جالپى ەگىس الاڭى 23 ملن گەكتاردى قۇرايدى، بۇل 2021 جىلعى دەڭگەيدەن 105 مىڭ گەكتارعا كوپ.
سونداي-اق بيىل 3،6 ملن گا جەمشوپ داقىلدارىنىڭ الاڭىن ۇلعايتۋ جوسپارلانىپ وتىر، بۇل كوبىرەك جەم-شوپ وندىرۋگە جانە مۇقتاج وڭىرلەردى قامتاماسىز ەتۋگە مۇمكىندىك بەرەدى. سونداي-اق، كارتوپ، كۇنباعىس، كوكونىس، ياعني الەۋمەتتىك داقىلدار ەگىلەتىن القاپتار دا ۇلعايتىلدى.
بيىلعى جىلدىڭ ونىمىنە ەگىس ناۋقانىن جۇرگىزۋ ءۇشىن 2،3 ملن توننا تۇقىم سەبىلدى، بۇل قاجەتتىلىكتىڭ 100% كورسەتىپ وتىر.
ەگىس جۇمىستارى بارلىق وبلىستاردا جۇرگىزىلىپ جاتىر. اتاپ ايتقاندا، 2،9 ملن گا نەمەسە جوسپاردان 19% جازدىق داقىلدار، ونىڭ ىشىندە مايلى داقىلدار 1،5 ملن. گا (47،8%)، داندىك جۇگەرى – 231،2 مىڭ گا (87،2%)، كوپجىلدىق شوپتەر – 309،6 مىڭ گا (70،7%)، كارتوپ – 133،4 مىڭ گا (68%)، كوكونىس – 128،7 مىڭ گا (75،9%) جانە ت. ب.
اۋىل شارۋاشىلىعى تاۋار وندىرۋشىلەرىن تىڭايتقىشتارمەن قامتاماسىز ەتۋ جۇمىستارى دا جۇرۋدە. بيىل بارلىعى 670،0 مىڭ توننادان استام تىڭايتقىش ەنگىزۋ جوسپارلانعان، قازىرگى كۇنى 308،1 مىڭ توننا نەمەسە جوسپاردىڭ 46% تيەلدى.
ۇكىمەتتىڭ قولداۋىنىڭ ارقاسىندا وتاندىق مينەرالدى تىڭايتقىشتاردى وندىرۋشىلەرمەن اگرارييلەردىڭ قاجەتتىلىكتەرىن قامتاماسىز ەتۋ تۋرالى ۋاعدالاستىققا قول جەتكىزىلدى. اممياك سەليتراسىنىڭ باعاسى 200 مىڭ تەڭگەدەن 160 مىڭ تەڭگەگە دەيىن تومەندەدى. تىڭايتقىشتار باعاسىن تومەندەتۋ بويىنشا قوسىمشا جۇمىستار جالعاسىپ جاتىر.
قازىرگى ەگىس ناۋقانىنا 144 مىڭ تراكتور، 4،7 مىڭ جوعارى ءونىمدى ەگىس كەشەنى، 77 مىڭ بىرلىك استىق سەپكىش، 221 مىڭ باسقا دا توپىراق وڭدەۋ قۇرالدارى قولدانىلۋدا
ەگىس جۇمىستارىن جۇرگىزۋ ءۇشىن 400،2 مىڭ توننا ديزەل وتىنى ءبولىندى (2021 جىلى 380،0 مىڭ توننا بولعان ەدى). سونداي-اق، بيىل كوكتەمگى دالا جۇمىستارىن جۇرگىزۋدى قارجىلاندىرۋ ءۇشىن 140 ملرد تەڭگە كولەمىندە بيۋدجەتتىك نەسيە ءبولىندى، استىقتى فورۆاردتىق ساتىپ الۋ شەڭبەرىندە 80 ملرد تەڭگە كوزدەلگەن.
«كوكتەمگى دالا جۇمىستارىن تابىستى جۇرگىزۋ ماسەلەسى اۋىل شارۋاشىلىعى مينيسترلىگىنىڭ تۇراقتى جانە ەرەكشە باقىلاۋىندا ەكەنىن اتاپ ءوتۋ كەرەك. وسى ماقساتتا مينيسترلىكتە كوكتەمگى دالا جۇمىستارىن جۇرگىزۋدىڭ بارلىق پروبلەمالىق ماسەلەسىن ۋاقتىلى شەشۋگە ارنالعان جەدەل شتاب قۇرىلىپ، اتالعان باعىتتاعى جۇمىستارعا ەرەكشە ءمان بەرىلگەن»، - دەپ قورىتىندىلادى ازات سۇلتانوۆ.