قارجىلاي سەرتيفيكاتتار تابىستالدى
بيىل قازاقستاندىق دارىندى بالالار حالىقارالىق وليمپيادالاردان 27 مەدەل جەڭىپ الدى. بۇل تۋرالى ق ر وقۋ-اعارتۋ ءمينيسترى اسحات ايماعامبەتوۆ ءوزىنىڭ Telegram كانالىندا جازدى، دەپ حابارلايدى Almaty-akshamy.kz.
«حالىقارالىق وليمپيادالاردىڭ جۇلدەگەر وقۋشىلارىن سالتاناتتى تۇردە ماراپاتتادىق. بيىل دارىندى بالالارىمىز 27 مەدال جەڭىپ الىپ، وتكەن جىلدارداعى رەكوردتارىن جاڭارتتى. بيىل قۇتتىقتاۋدىڭ ءوزى دە بالالار، ولاردىڭ اتا-انالارى جانە مۇعالىمدەر ءۇشىن ەرەكشە قۋانىشتى بولدى.
پرەزيدەنت قاسىم-جومارت كەمەل ۇلى توقايەۆتىڭ قولداۋىنىڭ ارقاسىندا 27 جەڭىمپازعا 4،7 ملن تەڭگەگە دەيىنگى سەرتيفيكاتتار تابىستادىق.
بۇل پرەزيدەنتتىڭ دارىندى بالالاردى ىنتالاندىرۋ جۇمىستارىن جۇرگىزۋ بويىنشا تاپسىرماسىنان كەيىن مۇمكىن بولدى. سونداي-اق وقۋشىلار ۇبت تاپسىرماي-اق قازاقستاندىق جوو-دا وقۋعا گرانتتار الدى»، - دەپ جازدى مينيستر.
سونداي-اق ول بۇل باعىتتاعى جۇمىستار ءالى دە جالعاسىن تاباتىنىن جەتكىزدى. بيىل تىزىمگە 7 حالىقارالىق وليمپيادا كىرسە، كەلەسى جىلى ول تاعى 7 بەدەلدى حالىقارالىق وليمپيادامەن تولىعادى.
«ءبىز ەلىمىزدەگى بارلىق دەڭگەيدەگى وليمپيادانى وتكىزۋدىڭ اشىقتىعىنا ەرەكشە نازار اۋدارۋدى جالعاستىرا بەرەمىز. سونداي-اق جۇلدەلى ورىن العان وقۋشىلاردى دايىنداعان ۇستازدار دا ءبىرجولعى اقشالاي تولەم الادى. دارىندى بالالاردىڭ اتا-انالارىنا دا العىس حاتتار تابىستادىم.
ەل پرەزيدەنتىنىڭ جانە مەملەكەتتىڭ تىكەلەي قولداۋى باسقا دا وقۋشىلارىمىزدىڭ وليمپياداعا قىزىعۋشىلىعىن ارتتىراتىنىنا سەنىمىم مول»، - دەدى اسحات ايماعامبەتوۆ.