ارمەنيا، بەلگيا، ەگيپەت، كانادا، رۋمىنيا، فرانسيا، شۆەيساريا ەلدەرىنىڭ قازاقستانداعى ەلشىلەرى ورتالىق كوممۋنيكاسيالار قىزمەتى الاڭىندا «فرانكوفونيا كوكتەمى – 2023» مادەني ءىس-شارالار ماۋسىمىن تانىستىردى.
حالىقارالىق فرانكوفونيا كۇنىنىڭ ماقساتى – فرانسۋز ءتىلىن ۇناتاتىنداردى بىرىكتىرۋ، فرانسۋز مادەنيەتىن ناسيحاتتاۋ. فرانسيا ۇسىناتىن ءىس-شارالار تۋرالى وسى ەلدىڭ قازاقستانداعى ەلشىسى ديدە كانەسس ايتتى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
ونىڭ سوزىنشە، بيىل قازاقستاندا «فرانكوفونيا كوكتەمىن» 9 ەلشىلىك ۇيىمداستىرادى.
«الەمدە 320 ميلليوننان استام ادام فرانسۋز تىلىندە سويلەيدى. بۇل وتە كوپ. فرانسۋز ءتىلى - 29 مەملەكەتتە رەسمي ءتىل مارتەبەسىنە يە، الەمدەگى ەڭ كوپ تارالعان بەسىنشى ءتىل. سونىمەن قاتار فرانسۋز ءتىلى ينتەرنەتتە قولدانىلاتىن ءتورتىنشى ءتىل جانە الەمدە ەڭ كوپ وقىلاتىن ەكىنشى ءتىل بولىپ سانالادى»، – دەدى ەلشى.
ءىس-شارالار استانا، الماتى، اتىراۋ، قاراعاندى، قوستاناي، وسكەمەن جانە شىمكەنت قالالارىندا وتەدى.
فرانسيا فرانكوفوندى كينو اپتالىعى اياسىندا 9 فيلم كورسەتەدى.
سونداي-اق 7 ناۋرىزدا الماتىدا «ايەلدەردىڭ سپورتتاعى ورنى» ءفيلمى كورسەتىلەدى، ودان كەيىن ايەلدەر قۇقىعىن ساقتاۋ تاقىرىبىندا تالقىلاۋ وتەدى.
ەلشى 2024 جىلى فرانسيادا وتەتىن وليمپيادا ويىندارىنا 500 كۇن قالعاندا الماتى قالاسىندا مەكتەپ وقۋشىلارىنىڭ قاتىسۋىمەن ەستافەتا ۇيىمداستىرۋ جوسپارلانىپ وتىرعانىن ايتتى.
«بيىل فەستيۆال باعدارلاماسىنا ارت-رەزيدەنسيانى قوستىق، ونىڭ اياسىندا جاس فرانسۋز سۋرەتشىسى ءۇش اي بويى الماتىدا بولادى. رەزيدەنسيا اياقتالعاننان كەيىن شىعارماشىلىق جۇمىستار «Esentai» گالەرەياسىندا كوپشىلىك نازارىنا ۇسىنىلادى»، – دەدى ديدە كانەسس.