ماشينا جاساۋ وڭدەۋشى ونەركاسىپتىڭ نەگىزگى سەكتورىنىڭ ءبىرى رەتىندە ونىڭ جالپى كولەمىنىڭ 19%-ىن قامتاماسىز ەتەدى.
ءوسۋدىڭ نەگىزگى درايۆەرلەرى: اۆتوموبيل (+12،1%)، تەمىرجول جانە باسقا دا كولىك قۇرالدارى (+7،1%)، اۋىل شارۋاشىلىعى تەحنيكاسى (+1،3%)، ەلەكتروتەحنيكا (+21،5%)، كومپيۋتەر، ەلەكتروندىق جانە وپتيكالىق جابدىق (ءوسىم 1،7 ەسە) ءوندىرىسى، سونداي-اق ماشينا جانە جابدىق جوندەۋ مەن ورناتۋ (+12%)، دەپ حابارلايدى aqshamnews.kz.
اۆتوموبيل جاساۋ ماشينا جاساۋ كولەمىنىڭ شامامەن 41%-ىن بەرەدى. بۇگىندە ەلىمىزدە JAC، Chevrolet، KIA، Lada، Jetour، Hongqi، Skoda، Hyundai جانە Genesis برەندتەرىن شىعاراتىن ەكى اۆتوزاۋىت جۇمىس ىستەيدى.
بيىل قازاقستاندا تاعى ەكى جاڭا كاسىپورىن — الماتىداعى مۋلتيبرەند زاۋىتى مەن قوستانايداعى KIA زاۋىتى ىسكە قوسىلادى. الماتىدا CHANGAN، Haval جانە CHERY سياقتى برەندتەردىڭ اۆتوموبيلدەرىن شىعارۋ جوسپارلانۋدا.
«جاڭا قۋاتتاردى پايدالانۋعا بەرۋدىڭ ارقاسىندا ەلىمىزدە شاعىن توراپتىق تەحنولوگيا بويىنشا جينالاتىن اۆتوموبيل ءوندىرىسىنىڭ كولەمى ەداۋىر ارتادى. بۇل مودەلدەر قاتارىن كوبەيتۋگە جانە وتاندىق اۆتوونەركاسىپتىڭ پوزيسياسىن نىعايتۋعا مۇمكىندىك بەرەدى»، — دەدى ونەركاسىپ جانە قۇرىلىس ۆيسە-مينيسترى ولجاس ساپاربەكوۆ.
2025 جىلى قازاقستاندا 147 824 اۆتوموبيل شىعارۋ جوسپارلانۋدا. الايدا، ۆيسە-مينيستر اتاپ وتكەندەي، سالادا بۇل كورسەتكىشتەن اسىپ ءتۇسۋدىڭ بارلىق العىشارتى بار.
ونىڭ ايتۋىنشا، وتاندىق تاۋار وندىرۋشىلەرگە سەرتيفيكات بەرۋگە بايلانىستى پروسەستى وڭتايلاندىرۋ كەزىندە قوسىمشا ءوسۋ مۇمكىندىگى جوعارى.
ۆيسە-پرەمەر سەرىك جۇمانعارين ساۋدا جانە ينتەگراسيا مينيسترلىگىنە قاجەتتى رۇقسات قۇجاتتاماسىن جەدەل بەرۋ ءۇشىن شارا قابىلداۋدى تاپسىردى. بۇل جاڭا مودەلدەردىڭ سەريالىق ءوندىرىسىن ۋاقتىلى ىسكە قوسۋعا جانە قۋاتتاردىڭ جۇكتەمەسىنىڭ ارتۋىن قامتاماسىز ەتۋگە مۇمكىندىك بەرەدى.
تەمىرجول سەكتورى ماشينا جاساۋ قۇرىلىمىندا 13%-دى الادى. 2024 جىلى قازاقستاندا جالپى سوماسى 599،3 ملرد تەڭگەگە 125 لوكوموتيۆ جانە 2،7 مىڭنان استام ۆاگون ءوندىرىلدى. بۇگىندە وسى سەگمەنتتە استانا، پەتروپاۆل، ەكىباستۇز جانە اتىراۋدا ورنالاسقان بەس وندىرىستىك كاسىپورىن جۇمىس ىستەيدى.
بيىلدان باستاپ استانادا «Stadler Kazakhstan» زاۋىتى جۇمىسىن باستادى. ونىڭ ىسكە قوسىلۋى سالانى ترانسفورماسيالاۋ مەن وقشاۋلاۋدى ارتتىرۋدىڭ ماڭىزدى كەزەڭىن جول اشىپ وتىر.
جىلجىمالى قۇرامدى جاڭارتۋ ءۇشىن كولىك مينيسترلىگى قىزمەت ەتۋ مەرزىمى ۇزارتىلعان ۆاگونداردى پايدالانۋعا شەكتەۋ ەنگىزۋگە باستاماشى بولدى. ءتيىستى نورماتيۆتىك قۇجات ازىرلەنىپ، كەلىسۋ راسىمىنەن وتۋدە.
ماشينا جاساۋدىڭ جالپى كولەمىنىڭ شامامەن 9%-ى ەلەكتروتەحنيكالىق ونىمگە تيەسىلى. 2024 جىلى قازاقستاندا 270 مىڭنان استام تۇرمىستىق تەحنيكا ءوندىرىلدى.
وسى جىلدان باستاپ ەلىمىزدە Samsung برەندىمەن تەلەديدار مەن كىر جۋعىش ماشينا ءوندىرىسى باستالادى. بۇل يمپورتتى الماستىرۋ، وقشاۋلاۋدى ارتتىرۋ جانە قازاقستان اۋماعىندا شىعارىلاتىن ءونىم اسسورتيمەنتىن كەڭەيتۋ باعىتىنداعى ماڭىزدى قادام بولماق.