«شەكتەۋسىز يننوۆاسيا: تۇراقتى دامىپ كەلە جاتقان الاتاۋ قالاسى» فورۋمىنىڭ اشىلۋ سالتاناتى ءوتتى.
وندا ق ر ونەركاسىپ جانە قۇرىلىس ءمينيسترى قانات شارلاپايەۆ ءسوز سويلەدى، دەپ حابارلايدى aqshamnews.kz.
بيىل قازاقستان مەن كورەيا رەسپۋبليكاسى 30 جىلدان استام جەمىستى قارىم-قاتىناستاردى اتاپ وتەدى جانە ونەركاسىپ پەن جوعارى تەحنولوگيالار سالاسىنداعى ىنتىماقتاستىقتى دامىتۋدى جالعاستىرۋدا.
«بۇگىندە ەلدەرىمىز اراسىنداعى وندىرىستىك كووپەراسيا ەكونوميكالىق دامۋدىڭ قۋاتتى قوزعالتقىشى. ءبىز جالپى قۇنى 3،8 ملرد دوللار بولاتىن 20 بىرلەسكەن ينۆەستيسيالىق جوبانى جۇزەگە اسىرىپ جاتىرمىز، بۇل 10 مىڭنان استام جۇمىس ورنىن قۇرۋعا مۇمكىندىك بەرەدى. ىنتىماقتاستىعىمىزدىڭ ماڭىزدى مىسالى – ماشينا جاساۋ سالاسى»، – دەدى قانات شارلاپايەۆ.
ءساتتى ىنتىماقتاستىقتىڭ ماڭىزدى مىسالدارىنىڭ ءبىرى ماشينا جاساۋ سالاسىنداعى بىرلەسكەن جوبالار. قازاقستاندا KIA اۆتوموبيلدەرىن شىعاراتىن زاۋىت، «استانا موتورس» جانە «Hyundai Motor Company»، جولاۋشىلار ۆاگوندارىن، «Hyundai» جۇك كولىكتەرى مەن اۆتوبۋستارىن شىعاراتىن زاۋىتتار تابىستى جۇمىس ىستەيدى.
مينيستر كورەيا رەسپۋبليكاسىمەن ساۋدا-ەكونوميكالىق قارىم-قاتىناستار ودان ءارى دامىپ كەلە جاتقانىن اتاپ ءوتتى. وتكەن جىلى تاۋار اينالىمى 6 ملرد دوللاردى قۇراسا، قازاقستاننىڭ كورەياعا ەكسپورتى مۇناي، فەرروحروم جانە تيتان قۇيمالارىن قوسقاندا 3،8 ملرد دوللاردى قۇرادى. بۇل رەتتە كورەيادان يمپورت 2،2 ملرد دوللارعا جەتتى، ونىڭ نەگىزگى تاۋارلارى ماشينالار، جابدىقتار جانە تۇرمىستىق تەحنيكا بولدى.
فورۋمنىڭ نەگىزگى بولىگى «الاتاۋ يندۋستريالدى پاركىنىڭ برەندينگ ستراتەگياسى جانە نەگىزگى نىسانداردى تارتۋدىڭ جول كارتاسى» پرەزەنتاسياسى بولدى. KPMG اتقارۋشى ديرەكتورى مۋن گۋ پاك مىرزا اتالمىش جوبانى جۇزەگە اسىرۋدىڭ نەگىزگى باعىتتارى تۋرالى ايتتى.
2024 جىلى قۇرىلعان «الاتاۋ» اەا 96 560 گەكتار اۋماقتى الىپ جاتىر. بۇل قاعاز ونىمدەرىن ءوندىرۋ، توقىما ءوندىرىسى، تۇرعىن جانە تۇرعىن ەمەس ءۇي-جايلاردى سالۋ سياقتى باسىم سالالارعا ينۆەستيسيا تارتۋعا باعىتتالعان ەلدەگى ەڭ ءىرى ايماقتاردىڭ ءبىرى.
«بۇل ايماقتىڭ ماڭىزدى ماقساتى – جوعارى تەحنولوگيالى وندىرىستەرگە باسا نازار اۋدارا وتىرىپ، زاماناۋي جانە باسەكەگە قابىلەتتى ءوندىرىس قۇرۋ جانە وڭىردە جۇمىسپەن قامتۋدى ارتتىرۋ. «الاتاۋ» اەا تارتىلعان ينۆەستيسيالار مەن جۇزەگە اسىرىلىپ جاتقان جوبالاردىڭ ارقاسىندا مىڭداعان جۇمىس ورىندارىن اشىپ، ونەركاسىپتىك ءوسۋدىڭ ماڭىزدى قوزعاۋشى كۇشىنە اينالا الادى دەپ كۇتىلۋدە»، – اتاپ ءوتتى قانات شارلاپايەۆ.
قازاقستان ۇزاق مەرزىمدى ىنتىماقتاستىقتى دامىتۋ جانە بىرلەسكەن جوبالاردى جۇزەگە اسىرۋ ماقساتىندا وڭتۇستىك كورەيالىق كومپانيالارعا ءبىرقاتار جەڭىلدىكتەر ۇسىنىپ وتىرعانىن ەرەكشە اتاپ وتكەن ءجون. اتاپ ايتقاندا، ونەركاسىپتى دامىتۋ قورى ارقىلى جەڭىلدەتىلگەن نەسيەلەندىرۋ، سالىقتىق جەڭىلدىكتەر، ونىڭ ىشىندە قازاقستاندا وندىرىلەتىن ونىمدەردى ققس تولەۋدەن بوساتۋ، سونداي-اق جاڭادان اشىلعان كاسىپورىنداردى العاشقى ءۇش جىلدا سالىق تولەۋدەن بوساتۋ. بۇل شارالار تارتىمدى بيزنەس-ورتانى قۇرۋعا جانە تىكەلەي شەتەل ينۆەستيسيالارىنىڭ اعىنىن ىنتالاندىرۋعا باعىتتالعان.