قاڭتار سوڭىنا دەيىن تولەنگەن قاراجات كولەمىنە ساي 5081 قاجىلىق ورنى بەرىلدى.
ساۋد ارابيا تاراپىنىڭ تالابى بويىنشا "قاجىلىق-2024" ماۋسىمىنا 2023 جىلدىڭ سوڭىنا دەيىن قاجىلار تىركەلىپ، قاراجاتى ۋاقىتىلى تولەنگەن ەلدەرگە تيەسىلى قاجىلىق ورىندارى ءبولىندى، دەپ حابارلايدى اlmaty-akshamy.kz.
"وسى رەتتە، قازاقستان مۇسىلماندارى ءدىني باسقارماسى اشىق كونكۋرستان وتكەن 17 قازاقستاندىق تۋروپەراتورعا 2024 جىلعى قاجىلىق ماۋسىمىن ۇيىمداستىرۋعا رەسمي رۇقسات بەرىپ، ساك قاجىلىق جانە ۇمرا مينيسترلىگى تالابىنا ساي 2023 جىلدىڭ سوڭىنا دەيىن ءتيىستى تولەمدەردى تولەۋگە مۇمكىندىك جاسالدى. الايدا باس ءمۇفتي باستاعان دەلەگاسيانىڭ قاڭتار ايىندا ساۋدياعا جاساعان ساپارى اياسىندا قاجىلىققا جازىلىپ ۇلگەرمەگەن كىسىلەردى ەسكەرە كەلە قاجىلىق ورىندارىن برونداپ، تولەم جاساۋ ۋاقىتى قاڭتار ايىنىڭ سوڭىنا دەيىن ۇزارتىلدى. ناتيجەسىندە، اتالعان 17 تۋروپەراتور اراسىنان بەلگىلەنگەن مەرزىمگە ساي ءتيىستى تولەمدەردى اۋدارىپ، تالاپتاردى ورىنداعان 16 تۋروپەراتورمەن قمدب اراسىندا كەلىسىم-شارت جاسالدى. ال، ساۋد تاراپىنان بولعان تالاپتاردى مەرزىمىندە ورىنداي الماعان 1 تۋروپەراتور قاجىلىقپەن اينالىسۋعا قابىلەتسىز دەپ تابىلدى"، – دەدى قمدب وكىلدەرى.
"قاجىلىق-2024" ماۋسىمىنا 16 تۋروپەراتور جانە وسى تۋروپەراتوردىڭ بىرىمەن سۋباگەنتتىك كەلىسىمشارت قۇرعان 19 تۋراگەنت ساۋد تاراپىنان بولعان تالاپتاردى تولىعىمەن ورىنداپ، قازاقستاننان باراتىن قاجىلار ءۇشىن، قاڭتار سوڭىنا دەيىن تولەنگەن قاراجات كولەمىنە ساي 5081 قاجىلىق ورنى بەرىلدى.
"سونىمەن قاتار، بيىل قاجىلىق قۇلشىلىعىنا نيەت ەتكەن كىسىلەر تەك تىزىمدە كورسەتىلگەن تۋروپەراتورلار مەن تۋراگەنتتەردەن قاجىلىق ورىندارىن برونداي الاتىنىن جەتكىزەمىز. قاجىلىق ورنىن برونداماعان ازاماتتاردىڭ جاعدايىن ەسكەرىپ، تۋروپەراتورلار مەن تۋراگەنتتەر ارتىق ورىندار العانى بەلگىلى. وسى ورايدا، بارشا قاجىلىققا نيەت ەتكەن ازاماتتارعا 2023 جىلى قاجىلىققا زاڭسىز بارعان كىسىلەردىڭ قاتەلىگىن قايتالاماۋدى ەسكەرتەمىز. سونىمەن قاتار قاجىلىققا جازىلعاندا زاڭسىز ارەكەتتەرگە بارماۋدى جانە قاجىلىق ورىندارىن رەسمي الماعان، تومەندەگى تىزىمدە جوق تۋركومپانيالار قىزمەتىنە جۇگىنبەۋدى قاپەرگە سالامىز"، – دەدى قمدب وكىلدەرى.
ەسكە سالا كەتەيىك، بيىل قازاقستاننان رەسمي 5081 ادام قاجىلىققا اتتانادى. ولار 5-10 ماۋسىم ارالىعىندا ساۋدياعا بارىپ، 23-28 ماۋسىم ارالىعىندا ەلگە ورالادى دەپ جوسپارلانۋدا.