ونىڭ 40 پايىزى - قازاق كينوسى ەنشىسىندە
حVI حالىقارالىق «ەۋرازيا» كينوفەستيۆالىنىڭ باسپا ءسوز ورتالىعىندا «قازاقستاندىق كينونى دامىتۋ ۆەكتورى» تاقىرىبىندا دوڭگەلەك ۇستەل بولىپ ءوتتى. وندا «كينەماتوگرافيا تۋرالى زاڭ»، وتاندىق كينونى پروكاتتاۋ جانە ىلگەرىلەتۋ، كوپرودۋكسياعا شىعۋ جانە باسقا دا كينو سالاسىنداعى ءبىزدىڭ كينەماتوگرافيستەردى تولعاندىراتىن وزەكتى ماسەلەلەر تالقىلاندى.
جيىندا ءبىرىنشى بولىپ ءسوز سويلەگەن «قازاقفيلم» كينوستۋدياسىنىڭ ۆيسە-پرەزيدەنتى سەرىك ابىشيەۆ «كينەماتوگرافيا تۋرالى» زاڭعا قاتىستى ماسەلەلەرگە كەڭىنەن توقتالدى.
ول اتاپ وتكەندەي، زاڭ بار، ءبىراق ونىڭ جۇمىس ىستەۋ تەتىكتەرى جوق.
«جۇيە وتە كۇردەلى. مۇندا عىلىمي كوزقاراس، زەرتتەۋ، تالداۋ قاجەت. "كينو تۋرالى" زاڭ ق ر باسقا زاڭدارىمەن پىسىقتالۋى، باسقا مينيسترلىكتەرمەن بايلانىسى بولۋى ءتيىس. سوندا عانا ول ناقتى جۇمىس ىستەيتىن بولادى»، - دەيدى ول.
پروديۋسەر زارينا كيسيكوۆا ءوز كەزەگىندە «كينەماتوگرافيا تۋرالى» زاڭ اياسىندا جۇمىس ىستەۋگە ءماجبۇر بولعان وتاندىق كينەماتوگرافيستەردىڭ قانداي قيىندىقتارعا تاپ بولاتىنىن ايتىپ بەردى.
ايدوس سەيىتجان بولسا، دەرەكتى كينونىڭ پروبلەمالارىن كوتەردى.
دوڭگەلەك ۇستەلدىڭ وتاندىق كينوپروكات تاقىرىبىنا ارنالعان ەكىنشى بولىگى ودان دا قىزۋ پىكىرتالاس تۋدىردى. ۇكقمو باسقارما ءتوراعاسىنىڭ ورىنباسارى باۋىرجان شوكەنوۆ قازىرگى زامانعى وتاندىق نارىقتىڭ ارتىقشىلىقتارى مەن كەمشىلىكتەرى تۋرالى ەگجەي-تەگجەيلى ايتىپ، پروبلەمالار بار ەكەنىن، ولاردىڭ شەشىلىپ جاتقانىن جانە مەملەكەت تەك وندىرىسكە عانا ەمەس، سونىمەن قاتار قازاقستاندىق فيلمدەردى ىلگەرىلەتۋگە دە كوپ كوڭىل ءبولىپ جاتقانىن اتاپ ءوتتى.
شوكەنوۆتىڭ ايتۋىنشا، 2022 جىلى (قاراشاعا دەيىن) قازاقستاننىڭ پروكات نارىعى 20 ميلليارد تەڭگەنىڭ دەڭگەيىنە جەتتى، بۇل پاندەمياعا دەيىنگى كورسەتكىشكە جاقىن.
15 ميلليون بيلەت ساتىلدى، ورتاشا بيلەت باعاسى 1300 تەڭگەنىڭ توڭىرەگىندە، بۇل نەگىزىنەن ونشا قىمبات ەمەس.
«ەڭ قىزىعى، وسى 20 ميللياردتىڭ قىرىق پايىزىن، ياعني 8 ميللياردقا جۋىعىن وتاندىق فيلمدەر جيناعان. بيىل پروكاتقا شىققان 450 ءفيلمنىڭ 64ء-ى وتاندىق. بۇل فيلمدەردىڭ جالپى سانىنىڭ 14 پايىزى جانە ولار بىزگە پايدانىڭ 40 پايىزىن بەردى. بۇل - وراسان زور كورسەتكىش»، - دەپ اتاپ ءوتتى ول.