2023 جىلعى 2 توقسان قورىتىندىسى بويىنشا وندىرىستەگى جازاتايىم وقيعالاردان 640 جۇمىسكەر زارداپ شەگىپ، ونىڭ 69-ى قازا تاپتى. مۇنداي دەرەكتى ەڭبەك جانە حالىقتى الەۋمەتتىك قورعاۋ مينيسترلىگى ۇسىندى، دەپ حابارلايدى Almaty -akshamy. kz.
بۇل رەتتە بيىلعى 6 ايدىڭ قورىتىندىسى بويىنشا وندىرىستىك جاراقاتتانۋ 2022 جىلدىڭ ەكىنشى جارتىجىلدىعىمەن سالىستىرعاندا 4%-عا تومەندەگەنى بايقالدى.
2023 جىلدىڭ 6 ايىندا وندىرىستىك جاراقاتتانۋ كوەففيسيەنتى (1000 جۇمىسكەرگە شاققانداعى جازاتايىم وقيعالاردىڭ جيىلىگى) 0،09 قۇرادى.
دەسە دە قازاقستاننىڭ ونىدىرىستىك ايماقتارىندا جاراقات الۋدىڭ ەڭ جوعارى دەڭگەيى ساقتالىپ وتىر. ماسەلەن، قاراعاندى وبلىسىندا - 79 ادام، شقو-دا – 53 ادام، اباي وبلىسىندا – 50 ادام، پاۆلودار وبلىسىندا – 46 ادام، قوستاناي وبلىسىندا – 44 ادام، اقتوبە وبلىسىندا – 40 ادام جۇمىس بارىسىندا زارداپ شەككەن. سونداي-اق الماتى قالاسىندا 50 ادام ءتۇرلى دەنە جاراقاتتارىن الدى.
ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە – 21،8% جانە قۇرىلىس سالاسىندا – 10،6%.
جازاتايىم وقيعالاردىڭ ورىن الۋىنىڭ نەگىزگى سەبەپتەرى:
جابىرلەنۋشىنىڭ ءوزىنىڭ ورەسكەل ابايسىزدىعى - 33،3%؛
وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى - 27،1%؛
ەڭبەك قاۋىپسىزدىگى جانە ەڭبەكتى قورعاۋ ەرەجەلەرىن بۇزۋ - 9،3%؛
جول قوزعالىسى ەرەجەلەرىن بۇزۋ - 8،4%.
سوڭعى بەس جىلدىڭ ىشىندە مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋ سالاسى بويىنشا قابىلدانعان كەشەندى شارالاردىڭ ناتيجەسىندە وندىرىستىك جاراقاتتانۋ دەڭگەيى 6،5%-عا تومەن ءتۇستى.
پروفيلاكتيكا مەن بۇزۋشىلىقتى الدىن الۋ ماقساتىندا ەلىمىزدىڭ 3211 كاسىپورنى قاۋىپسىزدىك پەن ەڭبەكتى قورعاۋ ستاندارتتارىن ەنگىزدى.
سونداي-اق قازاقستان رەسپۋبليكاسىنىڭ كاسىپوداقتار فەدەراسياسىمەن بىرلەسىپ، مۇگەدەكتىگى بار ادامداردى «حالىقتىق باقىلاۋشى» رەتىندە تارتۋدى كوزدەيتىن «حالىقتىق باقىلاۋ» الەۋمەتتىك ماڭىزدى جوباسى ەنگىزىلىپ جاتىر. بۇگىنگى كۇنى جوبانى جۇزەگە اسىرۋعا رەسپۋبليكانىڭ 252 كاسىپورنى قوسىلىپ، وندا 600-دەن استام جۇمىسكەر ىشكى باقىلاۋدى جۇزەگە اسىرىپ جاتىر.
2019 جىلدان باستاپ مينيسترلىك تاراپىنان «نولدىك جاراقات - Vision Zero» تۇجىرىمداماسىن جەتىلدىرۋ بوليىنشا بەلسەندى جۇمىس اتقارىلىپ كەلەدى. وعان 440 كاسىپورىن قوسىلعانىن ايتا كەتۋ كەرەك.
سونىمەن قاتار قازاقستاندا «ونلاين ەڭبەك كونسۋلتانتى» ەلەكتروندى سەرۆيسى دە ىسكە قوسىلدى. ول جۇمىسكەر مەن جۇمىس بەرۋشىنىڭ اراسىندا قاشىقتىقتان ءوزارا ارەكەتتەسۋدى قامتاماسىز ەتۋ ءۇشىن ەڭبەك زاڭناماسىنىڭ ساقتالۋىنىڭ تيىمدىلىگىن ارتتىرۋعا مۇمكىندىك بەرەدى. سەرۆيس جۇمىس بەرۋشىنىڭ ەڭبەكتى قورعاۋ تالاپتارىنىڭ ساقتالۋىن وزىندىك تەكسەرۋدەن ءوتۋىن قاراستىرادى.