حالىقارالىق ەنەرگەتيكا اگەنتتىگى (حەا) مۇنايعا الەمدىك سۇرانىس 2023 جىلى تاۋلىگىنە 1،9 ملن باررەلگە ءوسىپ، تاۋلىگىنە 101،7 ملن باررەلگە جەتەدى دەپ بولجاپ وتىر.
بۇل تۋرالى Almaty-akshamy.kz قازاقپارات سايتىنا سىلتەمە جاساپ حابارلايدى.
«جۇڭگو كوروناۆيرۋس شەكتەۋلەرىن جويىلعاننان كەيىن، مۇنايعا سۇرانىستىڭ جارتىسىنا جۋىعىن قامتاماسىز ەتپەك. بۇل رەتتە 2023 جىلى الەمدە مۇنايعا سۇرانىس ءوسۋىنىڭ نەگىزگى كوزى اۆياسيالىق وتىن بولادى، وعان سۇرانىس تاۋلىگىنە 840 مىڭ باررەلگە ارتادى، - دەلىنگەن حەا ەسەبىندە.
اگەنتتىك سونداي-اق 2023 جىلى الەمدىك مۇناي جەتكىزىلىمىنىڭ ءوسىمى تاۋلىگىنە 1 ملن باررەلگە دەيىن باياۋلايدى دەپ بولجاپ وتىر.
الدىڭعى جىلى بۇل كورسەتكىش 4،7 ملن باررەلگە ارتقان بولاتىن. وپەك + قۇرامىنا كىرمەيتىن ەلدەر بيىل مۇناي ۇسىنىسىن تاۋلىگىنە 1،9 ملن باررەلگە ۇلعايتادى، ال وپەك+ ەلدەرىنىڭ ۇسىنىسى رەسەيدە ءوندىرىستىڭ تومەندەۋىنە بايلانىستى تاۋلىگىنە 870 مىڭ باررەلگە قىسقارادى. حەا مالىمەتىنشە، بيىل جەتكىزىلىم ءوسىمى بويىنشا اقش كوش باستاپ وتىر، ودان كەيىن ەكىنشى جىل قاتارىنان «قارا التىن» ءوندىرىسىنىڭ جىلدىق رەكوردىن ورناتقان كانادا مەن برازيليا تۇر. باياندامادا الەمدىك باقىلاناتىن مۇناي قورى قاراشا ايىندا 79،1 ميلليون باررەلگە ءوسىپ، 2021 جىلدىڭ قازان ايىنان بەرگى ەڭ جوعارى دەڭگەيگە جەتكەنى اتاپ ءوتىلدى.
الايدا، 2023 جىلدىڭ باسىندا مۇناي قورىنىڭ بالانسى باتىستىڭ رەسەي ەكسپورتىنا سانكسيالارىنىڭ ىقپالىنان تەز ناشارلاۋى مۇمكىن. تاۋار نارىعى، اسىرەسە ديزەل وتىنى مۇنايعا دەگەن سۇرانىستىڭ وسۋىنە بايلانىستى ەڭ ۇلكەن قاۋىپ-قاتەرگە ۇشىراماق.