مەدەۋ اۋدانىنداعى وزەكتى ماسەلەلەردىڭ ءبىرى – كەڭساي، مۇزتاۋ جانە كامەنسكوە پلاتو شاعىناۋداندارىندا ينتەرنەت پەن ۇيالى بايلانىس جەلىسى تۇراقتى جۇمىس ىستەمەيدى. بۇعان جەر بەدەرى سەبەپ بولىپ وتىر. بۇل تۋرالى الماتى قالاسى اكىمى ەربولات دوسايەۆ تۇرعىندارمەن كەزدەسۋ بارىسىندا ايتتى، دەپ حابارلايدى اlmaty-akshamy.kz.
2022 جىلى سيگنالدىڭ ساپاسىن جاقسارتۋ ءۇشىن 3 تىرەكتى ورناتىپ، كەڭساي شاعىناۋدانىندا قوسىمشا ءموبيلدى ستانسيالاردى قوسۋ جوسپارلانعان.
«2020-2021 جىلدارى الاتاۋ، كولساي، سۇلۋساي، كەڭساي شاعىناۋداندارىندا بايلانىس جانە ينتەرنەت جەلىسىن ورناتۋ جۇمىستارى جۇرگىزىلدى»، – دەدى اكىم.
مەگاپوليستىڭ تەلەكوممۋنيكاسيالىق ينفراقۇرىلىمىن دامىتۋ ءۇشىن 2022 جىلى گورنىي گيگانت، كوك-توبە 1-2، كومپوت، مالايا ستانيسا، شۋاقتى شاعىناۋداندارىن جوعارى جىلدامدىقتاعى ينتەرنەتكە قوسۋ جۇمىستارى جوسپارلانعان.
«جولدارعا جانە ادامدار كوپ باراتىن جەرلەرگە بەينەباقىلاۋ وبەكتىلەرىن ورناتۋ جوباسىنىڭ اياسىندا وسى جىلدىڭ سوڭىنا دەيىن سەرگەك اپپاراتتىق-وندىرىكتىك كەشەنىنىڭ سانى 120-دان 214-كە دەيىن ۇلعايتىلادى. جىلدىڭ سوڭىنا دەيىن 303 بەينەباقىلاۋ كامەراسى ورناتىلادى. اۋلالارعا 185، جول قيىلىستارىنا 80، پاركتەرگە 20، ءبىلىم بەرۋ وبەكتىلەرىنە 16، ساۋدا ورتالىقتارىنا 2 بەينەكامەرا ورناتىلادى»، – دەدى الماتى قالاسى اكىمى ەربولات دوسايەۆ.
بۇل رەتتە سامال شاعىناۋدانىنا 103 كامەرا، دۋمان شاعىناۋدانىنا 23، الاتاۋ شاعىناۋدانىنا 18، گورنىي گيگانت شاعىناۋدانىنا 3، اسقارتاۋ شاعىناۋدانى مەن كەڭساي ساياجاي ماسسيۆىنە 2 كامەرادان ورناتىلادى. قالعان 152 بەينەكامەرا كوشەلەردىڭ بويىنا قويىلادى.
«كەڭساي، سۇلۋساي جانە دۋمان شاعىناۋداندارىندا ەلەكتر جەلىلەرىن مودەرنيزاسيالاۋ بويىنشا جوبالاردى اياقتاعاندا، بەينەكامەرالاردىڭ سانىن كوبەيتەتىن بولامىز»، – دەدى قالا اكىمى.
2020 جىلى مەدەۋ اۋدانى بويىنشا «كار-تەل» ج ش س (Beeline) كومپانياسى مەدەۋ اۋدانىنىڭ كەڭساي، «مەبەلششيك ا/ت»، الاتاۋ شاعىن اۋدانى بويىنشا بازالىق ستانسيالاردى ىسكە قوستى.
سونداي-اق، 2020 جىلى «Kcell» اق كومپانياسى مەدەۋ اۋدانىنىڭ الاتاۋ شاعىن اۋدانىندا جاڭا 2 بازالىق ستانسيانى ىسكە قوستى.