بيىل ماقتا مەن كۇرىش ازايادى

بۇل تۋرالى اۋىل شارۋاشىلىعى ءمينيسترى ايداربەك ساپاروۆ ايتتى.

ماقتا القابىن 16 مىڭ گەكتارعا، ال كۇرىش القابىن 6،4 مىڭ گەكتارعا قىسقارتۋ جوسپارلانىپ وتىر، دەپ حابارلايدى Almaty-akshamy.kz

اۋىل شارۋاشىلىعى ءمينيسترى سۋدى كوپ قاجەت ەتەتىن داقىلداردىڭ الاڭىن قىسقارتۋ شارالارى جالعاسا بەرەتىنىن مالىمدەدى.

بيىل ماقتا القابىن 16 مىڭ گەكتارعا، ال كۇرىش القابىن 6،4 مىڭ گەكتارعا قىسقارتۋ جوسپارلانىپ وتىر. ال ازىقتىق داقىلدار الاڭىن 68 مىڭ گەكتارعا ۇلعايتىپ، 3،2 ملن گەكتارعا دەيىن جەتكىزۋ جوسپارلانعان.

"مايلى داقىلدار الاڭىن 385 مىڭ گەكتارعا ۇلعايتۋ جوسپارلانۋدا، بۇل جالپى ەگىس الاڭىن 3،2 ملن گەكتارعا دەيىن جەتكىزۋگە مۇمكىندىك بەرەدى. ونىڭ ىشىندە كۇنباعىس سياقتى الەۋمەتتىك ماڭىزى بار داقىل الاڭىن 60 مىڭ گەكتارعا ۇلعايتىپ، 1،2 ملن گەكتارعا دەيىن جەتكىزۋ جوسپارلانىپ وتىر"، دەدى ساپاروۆ.

ءمينيستردىڭ ايتۋىنشا، بيىل جاپپاي ەگىس ناۋقانى مامىر ايىنىڭ ەكىنشى ونكۇندىگىندە باستالادى. اۋىل شارۋاشىلىعى داقىلدارىنىڭ بولجامدى ەگىس القابى 23،8 ملن گەكتاردى قۇراپ وتىر. سونىڭ ىشىندە بيدايعا 13،3 ملن گەكتار ەگىستىك الاڭدارى بولىنگەن.

"جالپى، استىق داقىلدارى، كوكونىس-باقشا داقىلدارى، كارتوپ بويىنشا جوسپارلانعان الاڭدار ىشكى نارىقتىڭ قاجەتتىلىكتەرىن تولىق قامتاماسىز ەتۋگە مۇمكىندىك بەرەدى"، دەپ اتاپ ءوتتى مينيستر.