قازاقستاندا بەس ءتۇرلى ۆاكسينا قولجەتىمدى
ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ حالىقتى كوروناۆيرۋس ينفەكسياسىنا قارسى ۆاكسينالاۋ جۇمىستارى تۋرالى ايتىپ بەردى، دەپ حابارلايدى Almaty-akshamy.kz
«قازىرگى ۋاقىتتا رەسپۋبليكا بويىنشا كوروناۆيرۋس ينفەكسياسىنا قارسى ۆاكسينالاۋدى ۇيىمداستىرۋ جانە جۇرگىزۋ جۇمىستارى جالعاسۋدا. 2021 جىلعى اقپاننان باستاپ وڭىرلەرگە 18،5 ملن استام ۆاكسينا دوزاسى جەتكىزىلدى، ونىڭ ىشىندە ءى كومپونەنتكە 9،4 ملن دوزا جانە ءىى كومپونەنتكە 9،1 ملن دوزا ۆاكسينا بار. ازىرگە رەسپۋبليكا بويىنشا ءبىرىنشى كومپونەنتپەن 7 884 798 ادام ەگىلدى، ياعني ءتيىستى كونتينگەنتتىڭ 79،1%-ى قامتىلدى، ەكىنشى كومپونەنتپەن 6 942 756 ادام (69،6%) ۆاكسينالاندى»، - دەدى ەرجان بايتانايەۆ.
ونىڭ ايتۋىنشا، ق ر دەنساۋلىق ساقتاۋ مينيسترلىگى جەرگىلىكتى اتقارۋشى جانە مۇددەلى مەملەكەتتىك ورگاندارمەن حالىقتى كوروناۆيرۋس ينفەكسياسىنا قارسى يممۋنداۋ جونىندەگى كەشەندى جوسپاردى ازىرلەدى جانە ماقۇلدادى. ول كوروناۆيرۋسقا قارسى ۆاكسينالاۋدى ۇيىمداستىرۋ، حالىقارالىق تاجىريبەنى زەردەلەۋ، پروفيلاكتيكالىق ەكپەلەردى ەسەپكە الۋدى سيفرلاندىرۋ جانە حالىقپەن ۆاكسينانىڭ ماڭىزى تۋرالى كوممۋنيكاسيالىق جۇمىستى قامتيدى.
«كەشەندى جوسپار قازاقستان رەسپۋبليكاسى اۋماعىندا كوروناۆيرۋس ينفەكسياسىنىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ 2021 جىلعى 9 اقپانداعى حاتتاماسىمەن بەكىتىلگەن. بۇگىندە كەشەندى جوسپاردىڭ بارلىق تارماقتارى ورىندالدى. قازىرگى تاڭدا كۆي-عا قارسى ۆاكسينامەن قامتۋ بويىنشا قازاقستان تمد ەلدەرى اراسىندا 2ء-شى جانە الەمنىڭ بارلىق ەلدەرى اراسىندا 42ء-شى ورىندا تۇر. قازاقستاندا 9،9 ملن ادامعا بەس ءتۇرلى ۆاكسينا دوزالارى قولجەتىمدى. دۇنيەجۇزىلىك دەنساۋلىق ساقتاۋ ۇيىمى وسى ينفەكسياعا قارسى جىل سوڭىنا دەيىن حالىقتىڭ 40%-دان استامىن جانە 2022 جىلى 70%-ىن ۆاكسينامەن قامتۋدى ۇسىنادى»، - دەيدى ە. بايتانايەۆ.
2021 جىلعى 12 قازاندا قازاقستاندا كوروناۆيرۋس ينفەكسياسىنا قارسى ۆاكسينانىڭ 1ء-شى كومپونەنتىن 7 915 434 ادام، 2ء-شى كومپونەنتىن 6 983 073 ادام سالدىردى. سونىمەن بىرگە، قازاقستاندا 12-17 جاستاعى بالالار مەن جۇكتى ايەلدەردى ۆاكسينالاۋ جۇمىستارى جوسپارلانۋدا. وسىعان بايلانىستى مينيسترلىك Pfizer كومپانياسىمەن 2021 جىلدىڭ سوڭىنا دەيىن 4 ملن دوزا ۆاكسينانى جەتكىزۋ بويىنشا شارتقا قول قويدى.
قازىرگى ۋاقىتتا رەسپۋبليكا ازاماتتارىنا «گام-كوۆيد-ۆاك» (سپۋتنيك V)، «QazVac»، «Hayat-Vax»، «كوروناۆاك» جانە «سينوفارم» سىندى بەس ءتۇرلى ۆاكسينا قولجەتىمدى.