بۇل تۋرالى «قازاقستانداعى 5G ەكوجۇيەسىن دامىتۋ» ونلاين-كونفەرەنسياسىندا ايتىلدى.
Tele2/Altel باس ديرەكتورى سەرگەي كونكوۆ ەلىمىزدە 5G تەحنولوگياسى قانشالىقتى جىلدام تارايتىنى تۋرالى ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز وزىمىزگە تەحنولوگيانى ىسكە قوسۋ قۇقىعىن، جيىلىك رەسۋرسىن الۋ، جەلىنى ورنالاستىرۋ مىندەتىن الدىق. كەلەسى بەس جىلعا ليسەنزيالىق مىندەتتەمەلەر بار. ءبىز بەس جىلدا شامامەن 3،5 مىڭ بازالىق ستانسيا سالۋىمىز كەرەك. بۇل ءوز كەزەگىندە 5G تەحنولوگياسىن پايدالاناتىنداردىڭ 80 پايىزدان استامىن قامتيدى»، - دەدى س. كونكوۆ.
وسى ورايدا ول 5G تەحنولوگياسىنىڭ العاشقى سەكتورلارى استانا، الماتى جانە شىمكەنت قالالارىندا ىسكە قوسىلعانىن ەسكە سالدى.
«العاشقى بازالىق ستانسيا استاناداعى ەكسپو اۋماعىندا ورناتىلدى. دەگەنمەن ول ەكسپو اۋماعىن تۇگەل قامتىمايدى. الداعى بىرنەشە ايدا استانادا جانە باسقا قالالاردا قامتۋ ايتارلىقتاي كەڭەيەدى»، - دەدى سپيكەر.
ەسكە سالساق، 2022 جىلى جەلتوقساندا قازاقستاندا 5G جيىلىكتەرىن تاراتۋ بويىنشا اۋكسيون ءوتتى. ءبىرىنشى تەندەردە جيىلىك 62،6 ملرد تەڭگەگە، ەكىنشىسىندە 93،4 ملرد تەڭگەگە ساتىلدى.
ۇكىمەت باسشىسى ءاليحان سمايىلوۆ 5G ەنگىزۋدى 2027 جىلعا دەيىن اياقتاۋدى تاپسىردى.
«قازاقتەلەكوم» اكسيونەرلىك قوعامىنىڭ ەنشىلەس كومپانيالارى 2027 جىلعا دەيىن ەلىمىز بويىنشا 7 مىڭنان استام بازالىق ستانسيا سالۋعا ءتيىس.
بيىل استانا، الماتى جانە شىمكەنت قالالارىندا وسىنداي 486 ستانسيا پايدالانۋعا بەرىلەدى.