بيىل ەلىمىزدە شاكىرتاقى كولەمى تاعى دا ارتادى

دوكتورانتتاردىڭ ستيپەندياسى 82 مىڭنان 170 مىڭ تەڭگەگە دەيىن ءوستى

كەيىنگى ەكى جىلدا دوكتورانتتاردىڭ شاكىرتاقىسى 82 مىڭ تەڭگەدەن 170 مىڭ تەڭگەگە دەيىن وسكەن. بيىل قىركۇيەك ايىندا ونىڭ مولشەرى تاعى كوتەرىلمەك. ق ر ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا وسىلاي دەپ ءمالىم ەتتى، دەپ حابارلايدى اlmaty-akshamy.kz

«مەملەكەت باسشىسىنىڭ تاپسىرماسىنا سايكەس، جوعارى وقۋ ورىندارى ستۋدەنتتەرىنىڭ شاكىرتاقىسى ءوستى. ماسەلەن، سوڭعى ەكى جىلدا دوكتورانتتاردىڭ شاكىرتاقىسى 82 مىڭنان 170 مىڭ تەڭگەگە دەيىن ءوستى. بيىل قىركۇيەك ايىندا شاكىرتاقى كولەمى تاعى دا ارتادى»، - دەگەن مينيستر جوعارى وقۋ ورنىندا وقۋ ءۇشىن بولىنەتىن مەملەكەتتىك ءبىلىم گرانتتارىنىڭ سانى 5000-عا ارتقانىن ەسكە سالدى.

ايتۋىنشا، بيىل دا گرانت سانى وسىنداي كولەمدە ارتادى.

«گرانت ءبولۋ كەزىندە «merit based»-كە عانا ەمەس، «need based»-كە دە نازار اۋدارامىز. ماسەلەن، العاش رەت كۆوتا بويىنشا ءبىلىم گرانتتارى جالپى سانىنىڭ 5%-ى كوپ بالالى وتباسىنان شىققان بالالارعا، 1%-ى تولىق ەمەس وتباسىنان شىققان بالالارعا بولىنەدى»، - دەپ جازدى اسحات ايماعامبەتوۆ.