بيىل ەلىمىزدە قانداي اۋرۋلار تىركەلمەدى؟

ەلىمىزدە قىزىلشا اۋرۋىن جۇقتىرۋ دەرەكتەرى ءوستى.

بۇل تۋرالى دەنساۋلىق ساقتاۋ ۆيسە-مينيسترى – باس مەملەكەتتىك سانيتاريالىق دارىگەر ايجان ەسماعامبەتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«بيىلعى 7 ايىندا رەسپۋبليكا تۇرعىندارى اراسىندا 25 نوزولوگيا، ونىڭ ىشىندە تىرىسقاق، وبا، پاراتيفتەر، ءىش سۇزەگى، تۋليارەميا، سىرەسپە، ديفتەريا، پوليوميەليت، قۇتىرما، بەزگەك، ۆيسەرالدى لەيشمانيوز، پاستەرەللەز اۋرۋلارى تىركەلگەن جوق. بىلتىردىڭ وسى كەزەڭىمەن سالىستىرعاندا 39 ينفەكسيالىق اۋرۋ، ونىڭ ىشىندە بوتۋليزم 45 پايىزعا، روتاۆيرۋستىق ەنتەريت 25 پايىزعا، قىشىما 9 پايىزعا، سالمونەللەز 12 پايىزعا، تۋبەركۋلەز 6 پايىزعا تومەندەدى»، - دەدى ا. ەسماعامبەتوۆا ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، قىزىلشا اۋرۋىن جۇقتىرۋ دەرەكتەرى ءوستى، قازىرگى كەزدە قىزىلشانىڭ 3 037 جاعدايى تىركەلدى.

«قازاقستان اۋماعىندا اسا ءقاۋىپتى ينفەكسيالاردىڭ تابيعي وشاقتارى: وبا، تۋليارەميا، كۇيدىرگى اۋرۋىنىڭ، كونگو-قىرىم گەمورراگيالىق قىزباسى، بۇيرەك سيندرومى بار گەمورراگيالىق قىزبا جانە باسقالار ورنالاسقان. جازعى كەزەڭدە كەنەلەردىڭ كەڭىنەن تارالۋىنا قاراي اۋرۋ فاكتىلەرى وسەدى. ەلىمىزدىڭ 4 ءوڭىرىنىڭ، ياعني جامبىل، قىزىلوردا، تۇركىستان وبلىستارى مەن شىمكەنت قالاسىنىڭ اۋماعىندا كونگو-قىرىم گەمورراگيالىق قىزبانىڭ تابيعي وشاقتارى بار. جىل سايىن وڭىرلەردىڭ اكىمدىكتەرى مەن سانيتاريالىق-ەپيدەميولوگيالىق اۋماقتىق دەپارتامەنتتەرى كوكتەمدە اۋرۋدىڭ تارالۋىنا جول بەرمەۋ ماقساتىندا تابيعي وشاقتاردا كەنەگە قارسى ءىس-شارالار ۇيىمداستىرادى»، - دەدى ۆيسە-مينيستر.