بۇگىن اباي قۇنانباي ۇلىنىڭ دۇنيەگە كەلگەنىنە 178 جىل تولدى. الماتىدا ۇلى تۇلعانىڭ اتاۋلى كۇنىن رەسمي اتاپ ءوتۋ اباي ەسكەرتكىشىنە گۇل شوقتارىن قويۋمەن باستالدى، دەپ حابارلايدى almaty-aqshamy.kz.
اباي كۇنىنە ارنالعان رەسمي ءىش-شارالاردىڭ باستاۋىنا ءبىرقاتار زيالى قاۋىم وكىلدەرى مەن ءماسليحات دەپۋتاتتارى جانە قالا تۇرعىندارى جينالدى. ولار اباي ەسكەرتكىشىنىڭ الدىنا ۇلى تۇلعانىڭ رۋحىنا تاعزىم ەتىپ، گۇل شوقتارىن قويدى.
قازاقستان جازۋشىلار وداعىنىڭ ءتوراعاسى مەرەكە قۇلكەنوۆ باستاپ مەرەكەلىك قۇتتىقتاۋ ءسوزىن سويلەدى. قالامگەرلەر اتىنان ءسوز العان م.قۇلكەنوۆ: «مىناۋ، ۇلى تۇلعاعا ارنالعان كوركەم تۋىندى ابايدىڭ 115 جىلدىعىندا قويىلعان ەدى. وسىمەن بىرگە الماتىعا ابايدىڭ رۋحى كەلىپ قوندى. بيىل بۇعان 63 جىل تولعان ەكەن. اباي ءوزى جيدەبايدا تۇعانىمەن ءار قازاق ءوز جەرىندە، ماڭعىستاۋدا، تالدىقورعاندا، كوكشەتاۋدا «اباي ءبىزدىڭ اقىنىمىز» دەپ ماقتان تۇتادى. تۋعان كۇنىن دۇبىرلەتىپ تويلايدى. ول ءوز زامانىندا العاش رەت حالىقتى تولعاندىرعان قوعامدىق جانە ساياسي ءومىردىڭ پروبلەمالارىن قوزعادى. قوعامنىڭ قايشىلىعىمەن بىرگە زامانداستارىنىڭ بەرەكەسىزدىگىن، وتارلىق ساياساتتىڭ زيانىن سىناي وتىرىپ، حالىققا ءىش تارتتى. ەلىن وزىق مادەنيەتكە قاراي جەتەلەدى»، – دەدى.
اباي كۇنىنە وراي رەسمي ءىس-شارالاردىڭ جايىن سۇراعانىمىزدا الماتى قالاسى مادەنيەت باسقارماسىنىڭ باسشىسى عاني مايلىبايەۆ بىلاي دەدى: «وزدەرىڭىز بىلەتىندەي، ايتۋلى مەرەكەنى الماتى جۇرتشىلىعى، جىل سايىنعى داستۇرىنە ساي، ەسكەرتكىشكە گۇل شوعىن قويۋدان باستاپ جاتىر. وعان زيالى قاۋىم وكىلدەرى، قالالىق ءماسليحاتتىڭ دەپۋتاتتارى، مادەنيەت جانە قوعام قايتارتكەرلەرى دە قاتىسۋدا. ايتا كەتەرى، ەسكەرتكىشكە گۇل شوعىن قويۋمەن باستالعان مەرەكە ورتالىق قالالىق كىتاپحاناداعى ۇلكەن دوگەلەك ۇستەلگە، ودان كەيىن «الاتاۋ» ءداستۇرلى ونەر تەاترىنداعى مەرەكەلىك كونسەرتكە ۇلاسادى»، – دەدى.
سونىمەن بىرگە، عاني مايلىبايەۆ اباي شىعارمالارىنا، رۋحاني مۇرالارىنا ارنالعان كونسەرتتىك شارانىڭ قالا تۇرعىندارى ءۇشىن تەگىن ەكەنىن دە ەسكەرتتى.
قازاقتىڭ ۇلى تۇلعاسى، ۇلتىمىزدىڭ ادامزات رۋحاني قازىناسىنا قوسقان ۇلەسى سانالاتىن اباي قۇنانبايەۆتىڭ تۋعان كۇنى 2020 جىلى 5 تامىزدا رەسمي مەرەكەلىك كۇن رەتىندە بەكىتىلگەن بولاتىن. سودان بەرى بۇل كۇن رەسپۋبليكامىزدىڭ جەر-جەرىندە اتالىپ وتىلۋدە.
