قازاقستان تمد ورگاندارىنا سوڭعى رەت 2015 جىلى ءتوراعالىق ەتكەن
قازاقستان 2022 جىلعى 1 قاڭتاردان باستاپ تاۋەلسىز مەملەكەتتەر دوستاستىعىنا ءتوراعالىق ەتتى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.
1991 جىلى جەلتوقساندا الماتىدا وتكەن كەڭەستە تمد-نى قۇرۋ تۋرالى تاريحي دەكلاراسيا قابىلدانعان ەدى.
قازاقستان تمد ورگاندارىنا سوڭعى رەت 2015 جىلى ءتوراعالىق ەتكەن.
ايتا كەتەيىك، تمد ەلدەرى الدىندا تۇرعان ءبىرىنشى كەزەكتەگى مىندەتتەر قاتارىندا ساۋدا-ەكونوميكالىق ىنتىماقتاستىقتى جانداندىرۋ مەن ۇلعايتۋ بار. پرەزيدەنت قاسىم-جومارت توقايەۆ تمد ەلدەرىنىڭ ونەركاسىپتىك كووپەراسياسىن كەڭەيتۋگە باسا نازار اۋدارا وتىرىپ، ەكونوميكالىق ءوزارا ءىس-قيمىل تاسىلدەرىن جەتىلدىرۋ قاجەت ەكەنى تۋرالى مالىمدەدى. ول ءۇشىن ونەركاسىپتىك كەشەندەردى دامىتۋدىڭ كەمىندە 2025 جىلعا دەيىنگى جاڭا باعدارلاماسىن ازىرلەۋدى جانە قىزمەتتەر ساۋداسى تۋرالى كەلىسىمگە قول قويۋدى ۇسىندى.
سونىمەن قاتار، قازاقستان پرەزيدەنتى ورتاق اگرارلىق نارىقتى قالىپتاستىرۋدى وزەكتى دەپ سانايدى. ونىڭ ايتۋىنشا، تمد ەلدەرىنىڭ ازىق-تۇلىك جۇيەلەرىن دامىتۋ جانە ءوزارا ارەكەتتەسۋ ستراتەگياسىن ازىرلەۋ ورتاق مۇددەگە جاۋاپ بەرەر ەدى. توقايەۆ پاندەميانىڭ تەرىس سالدارىن ەڭسەرۋدەگى ىنتىماقتاستىق ماسەلەلەرىنە قاتىستى تمد كەڭىستىگىندە ۆاكسيناسيا پاسپورتتارىن ءوزارا تانۋدى جەدەلدەتۋدى ۇسىندى.
توقايەۆ تەرروريزم، ءدىني ەكسترەميزم، ەسىرتكى ساۋداسى كوبەيىپ كەلە جاتقان قاتەرىنە بىرلەسىپ قارسى تۇرۋعا باسا نازار اۋدارا وتىرىپ، قاۋىپسىزدىك سالاسىنداعى ىنتىماقتاستىق تەتىكتەرىن جەتىلدىرۋدى تمد-نىڭ تاعى ءبىر ماڭىزدى مىندەتى دەپ اتادى. ونىڭ ايتۋىنشا، بۇل قاۋىپتەر اۋعانستاندا قالىپتاسقان جاعداي اياسىندا وتە ماڭىزدى.
قازاقستان پرەزيدەنتى تمد بويىنشا ارىپتەستەردى ەكولوگيا جانە قورشاعان ورتانى قورعاۋ ماسەلەلەرىن ىلگەرىلەتۋدە جانە شەشۋدە ىنتىماقتاستىققا شاقىردى. ول تمد كەڭىستىگىندە ترانسشەكارالىق وزەندەردىڭ سۋ رەسۋرستارىن پايدالانۋ ماسەلەلەرىن شەشۋ بويىنشا ناقتى قادامدار قابىلداۋ قاجەت ەكەنىن اتاپ ءوتتى. سونىمەن قاتار، ول تومەن كومىرتەكتى ەكونوميكاعا كوشۋ ماسەلەسىنىڭ وزەكتىلىگىن ايتتى.
2022 جىلعى مامىردا نۇر-سۇلتاندا تمد-عا قاتىسۋشى مەملەكەتتەردىڭ ۇكىمەت باسشىلارى كەڭەسىنىڭ وتىرىسى وتەدى دەپ كۇتىلەدى.