بيىل قامبا تولىمدى، ەگىن ورىمدى بولاتىن سىڭايلى.
بىلتىر بىزدەگى ديحاندار 24 ملن گەكتار جەرگە ءدان ەكتى. جاۋاپتى مينيسترلىك، مۇنى 2022 جىلمەن سالىستىرعاندا 652 مىڭ گەكتارعا كوپ ەكەنىن ايتىپ، بورىگىن اسپانعا اتقان ەدى. ءبىراق جيىن-تەرىم جىلداعىدان ايتارلىقتاي از بولدى. سانداردى سويلەتسەك، وتكەن جىلى ءونىم 2022 جىلعا قاراعاندا 22 پايىزعا كەم جينالدى. سەبەبى الا جازداي قۋاڭشىلىق قوس بۇيىردەن قىستى.
سالاداعى ساراپشىلار سەلدىڭ سالدارىنان جەردىڭ ىلعالدىلى ارتۋى مۇمكىن، دەيدى. اسىرەسە تاسقىن جۇرگەن ايماقتاردىڭ ەگىنشىلەرى كوكتەمگى قارعىن سۋ مەن كوكتەن تۇسەتىن تامشىعا كوپ ءۇمىت ارتادى، دەپ حابارلايدى Almaty-akshamy.kz 24.kz-كە سىلتەمە جاساپ.
«بيىلعى مىنا تاسقىننىڭ ەگىنگە ەندى زيانى بولادى دەپ ونى قايتا الا الامىز؟ كۇزدىك داقىلدار زارداپ شەككەن جوق جانە مىناۋ جەردىڭ ىلعالدىلعى بيىل جاقسى بولادى دەپ، سوسىن ەندى ەگىستىك جاقسى شىعادى ما دەپ ويدامىز»، - دەيدى قوستاناي وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باس مامانى كەنجە جۇماندىقوۆ.
ەلدەگى اگروسەكتوردىڭ لوكوماتيۆتەرى قوستاناي، اقمولا، سولتۇستىك قازاقستان وبلىستارىندا ەگىن ماۋسىمى مامىرسىز باستالمايدى. سول سەبەپتى بيىلعى تاسقىننان كەلەتىن ءقاۋىپ تە، سالدار دا جوق دەيدى. ماسەلەن، قوستانايلىقتار بيىل 4 ملن گەكتار جەرگە ەگىن ەگۋگە نيەتتى. سوقاسىن سايلاپ، تەحنيكاسىن مايلاپ وتىر، مۇنداعىلار. ءساۋىردىڭ سوڭىندا دالالىق دايىندىق جۇمىستارىن باستاماقشى. سولتۇستىك قازاقستانداعى ەگىنشىلەر دە مامىردا ءدان تاستايمىز دەيدى. ولار دا قار سۋىنىڭ مولدىعى قۋاڭشىلىقتان قۇتقاردى دەگەنگە كەلتىردى. بيىل وڭىردەگى مەجە - 4،5 ملن گەكتار القاپقا ءدان سەبۋ.
«ەلىمىزدە ورىن الىپ وتىرعان جاعدايعا بايلانىستى جۇمىس ۋاقىتى وزگەرمەيدى. ءقازىر بارلىعى باقىلاۋدا. كوكتەمگى دالالىق جۇمىستاردى باقىلاۋ ءۇشىن جەدەل شتاب قۇرىلدى. تۋىنداعان پروبلەمالار جەدەل تۇردە شەشىلەۋدە. بيىل 4 ملن توننادان استام استىق جينايمىز دەگەن ماقساتىمىز بار. تاعىدا ايتقىم كەلەدى سۋ تاسقىنى ەگىن ەشقانداي كەدەرگىسى جوق. قايتا جەر ىلعالدىلىعى ارتسا ەگىن مول بولا ما دەگەن بولجام بار»، - دەيدى سقو اۋىل شارۋاشىلىعى جانە جەر قاتىناستارى باسقارماسىنىڭ باسشىسى مەيرام مەڭدىبايەۆ.
دەگەنمەن، ءۇمىت پەن كۇدىك قاتار. بىلتىر اۋىل شارۋاشىلىعى ماماندارى "كەلەر جىلى 2،5 ملن گەكتار القاپتى شەگىرتكە باسادى" دەپ كۇدىكتەنگەن ەدى. ەندىگى ءقاۋىپ سول عانا. ديحانداردى دا تەك وسى ماسەلە عانا الاڭداتادى.