2025 جىلى قازاقستاندا بالا تۋۋعا جانە ءبىر جارىم جاسقا دەيىن كۇتىم جاساۋعا ارنالعان مەملەكەتتىك جاردەماقىلاردى جالپى 508 مىڭ ازامات الدى. بۇل ماقساتقا 692 ميلليارد تەڭگە بولىنگەن، دەپ حابارلايدى Aqshamnews.kz ءتىلشىسى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، جىل باسىنان بەرى رەسپۋبليكالىق بيۋدجەتتەن 286 مىڭ ادامعا بالا تۋۋ بويىنشا جاردەماقى تولەندى. تولەمدەردىڭ جالپى كولەمى 51،7 ميلليارد تەڭگەنى قۇرادى. تەك قازان ايىنىڭ وزىندە 28،5 مىڭ ازاماتقا 5،2 ميلليارد تەڭگە بەرىلگەن.
بۇل جاردەماقى قازاقستان ازاماتتارىنا، قانداستارعا، سونداي-اق تۋعان، اسىراپ الىنعان نەمەسە قامقورلىققا بەرىلگەن بالالارى بار شەتەلدىكتەرگە تيەسىلى.
ءبىر جارىم جاسقا دەيىن بالا كۇتىمى ءۇشىن، مىندەتتى الەۋمەتتىك ساقتاندىرۋ جۇيەسىنە قاتىسپايتىندارعا بەرىلەتىن جاردەماقىنى جىل باسىنان بەرى 124،7 مىڭ ادام الدى. بۇل تولەمدەرگە 36،4 ميلليارد تەڭگە جۇمسالعان. قازان ايىندا 126،8 مىڭ الۋشىعا 3،7 ميلليارد تەڭگە بەرىلەدى.
2025 جىلى جاردەماقىلار مولشەرى 6،5 پايىزعا ءوسىرىلدى. ەسەپ ايىرىسۋ مرپ نەگىزىندە جۇرگىزىلەدى. 2025 جىلعى مرپ — 3 932 تەڭگە.
بالا تۋۋعا ارنالعان ءبىرجولعى جاردەماقى:
- 1ء-شى، 2ء-شى جانە 3ء-شى بالاعا — 149 416 تەڭگە (38 مرپ)؛
- 4ء-شى جانە كەيىنگى بالالارعا — 247 716 تەڭگە (63 مرپ).
ءبىر جارىم جاسقا دەيىن كۇتىم جاساۋعا ارنالعان اي سايىنعى جاردەماقى:
- 1ء-شى بالاعا — 22 648 تەڭگە؛
- 2ء-شى بالاعا — 26 777 تەڭگە؛
- 3ء-شى بالاعا — 30 866 تەڭگە؛
- 4ء-شى جانە ودان كەيىنگى بالالارعا — 34 995 تەڭگە.
جۇمىس ىستەيتىن اتا-انالارعا تولەمدەر مەملەكەتتىك الەۋمەتتىك ساقتاندىرۋ قورىنان جۇرگىزىلەدى — دەكرەتتىك دەمالىس كەزەڭىندە، سونداي-اق جاڭا تۋعان بالانى اسىراپ العان جاعدايدا. جىل باسىنان بۇل تولەمدى 175،1 مىڭ ادام الىپ، جالپى سوماسى 245،3 ميلليارد تەڭگەنى قۇرادى. قازان ايىندا — 17،8 مىڭ ادام، تولەم كولەمى 17،4 ميلليارد تەڭگە بولدى. ورتاشا تولەم مولشەرى — 1 457 321 تەڭگە.
سونىمەن قاتار، مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بالانىڭ تۋعان كۇنىنەن باستاپ ءبىر جارىم جاسقا دەيىن اي سايىن تابىستىڭ 40 پايىزى مولشەرىندە الەۋمەتتىك تولەم تاعايىندالادى. ەگىز نەمەسە ۇشەم تۋعان جاعدايدا تولەم ءار بالاعا بولەك ەسەپتەلەدى.
2025 جىلدىڭ ون ايىندا بۇل تولەمدى 208،2 مىڭ ادام راسىمدەپ، جالپى سوماسى 358،6 ميلليارد تەڭگەگە جەتكەن. قازان ايىندا — 18،8 مىڭ الۋشى، تولەم كولەمى 34،5 ميلليارد تەڭگە بولدى. ورتاشا ايلىق تولەم — 86 493 تەڭگە.