اكىمدىك اۋەزوۆ اۋدانىنىڭ جول ينفراقۇرىلىمىنىڭ جاعدايىنا ەرەكشە كوڭىل ءبولىپ وتىر.
وتكەن جىلى ۇزىندىعى 27 كم بولاتىن 22 كوشەگە ورتاشا جوندەۋ جۇرگىزىلدى، سونداي-اق جالپى اۋدانى 25 مىڭ م2 75 كوشە ۋچاسكەسىندەگى اعىمداعى جوندەۋ جۇمىستارى اياقتالدى، دەپ حابارلايدى Almaty-akshamy.kz
«ۇزىندىعى 6،8 كم بولاتىن 33 ۋچاسكەگە تروتۋارلار سالىندى. وسى باعىتتاعى جۇمىستار جالعاسادى. 2023 جىلى ۇزىندىعى 19 كم بولاتىن 22 كوشەگە جانە 9 وتپەلى جولعا ورتاشا جوندەۋ جۇمىستارىن جۇرگىزۋدى جوسپارلاپ وتىرمىز. 2022 جىلى سىزدەردىڭ سۇراۋلارىڭىز بويىنشا ساين، قابدولوۆ جانە تولە بي كوشەلەرىندە بەس جاڭا ايالداما كەشەنى ورناتىلدى»، - دەدى بۇگىن اۋدان حالقىمەن كەزدەسكەن مەگاپوليس باسشىسى.
ورىن العان قاجەتتىلىككە بايلانىستى، وسى جىلدىڭ قازان ايىنا دەيىن جايدارمان جانە شايمەردەنوۆ كوشەلەرىنە قوسىمشا ءۇش ايالداما ورناتۋ جوسپارلانۋدا.
جول قوزعالىسىن رەتتەۋ جانە جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ماقساتىندا وتكەن جىلى جاندوسوۆ (4)، سۇلەيمەنوۆ (4)، مومىش ۇلى (2)، شالياپين (2)، التىنسارين (1)، وتەگەن باتىر (1) كوشەلەرىندە 14 جاڭا باعدارشام ورناتىلدى.
قازىرگى ۋاقىتتا بەرەگوۆوي كوشەسى - يۋ. كيم كوشەسىندە باعدارشام ورناتۋعا جوبالاۋ-سمەتالىق قۇجاتتاما ازىرلەۋ جانە تولە بي كوشەسى – فۋركات كوشەسى، تولە بي كوشەسى – ساين كوشەسىنىڭ شىعىسىندا رەتتەلەتىن جاياۋ جۇرگىنشىلەر وتكەلدەرىن سالۋ جۇمىستارى ءجۇرىپ جاتىر. جوبالاۋ-سمەتالىق قۇجاتتاما وسى جىلدىڭ مامىر ايىنىڭ سوڭىندا اياقتالادى، جوبا قاراشا ايىنىڭ سوڭىنا دەيىن ىسكە اسىرىلادى.
ۇنەمى سۋ باساتىن جەرلەردىڭ پروبلەماسىن شەشۋ ءۇشىن وتكەن جىلى توتەنشە جاعداي جەلىسى بويىنشا اۋداننىڭ 7 پروبلەمالىق ۋچاسكەسىنەن - تولە بي كوشەسى، رايىمبەك داڭعىلىنداعى 5 ۋچاسكە جويىلدى. جۇبانوۆ كوشەسىندەگى ۇزىندىعى 3،5 كم كانال تازارتىلىپ، جوندەلدى، سونداي-اق مومىش ۇلى كوشەسىنىڭ بويىندا (جۇبانوۆ كوشەسىنەن تولە بي كوشەسىنە دەيىن) ۇزىندىعى 1،4 كم جاڭا سۋ بۇرۋ كانالى سالىنىپ، وعان ارىق جەلىلەرى قوسىلدى، 2،4 كم جاڭا ارىق جەلىسى سالىندى.
«بۇگىنگى تاڭدا اباي داڭعىلى مەن مومىش ۇلى كوشەسىندەگى ەكى ۋچاسكەدە جۇمىستار جۇرگىزىلۋدە. جۇمىستاردى وسى جىلدىڭ ناۋرىز ايىنىڭ سوڭىنا دەيىن اياقتايمىز»، - دەدى اكىم ەربولات دوسايەۆ.