فيتومەليوراسيا جۇمىسى
ەكولوگيا، گەولوگيا جانە تابيعي رەسۋرستار ۆيسە-مينيسترى ءاليا شالابەكوۆا جۇمىس ساپارىمەن قىزىلوردا وبلىسىنا بارىپ، ارال تەڭىزىنىڭ قۇرعاعان تابانىنداعى فيتومەليوراسيا جۇمىسىمەن تانىستى، دەپ حابارلايدى Almaty-akshamy.kz.
ەستەرىڭىزگە سالا كەتەيىك، پرەزيدەنت قاسىم-جومارت توقايەۆ 2021-2025 جىلدار ارالىعىندا ارالدىڭ تابانىندا 1،1 ملن گا اۋماقتا اعاش وتىرعىزۋ مىندەتىن قويدى.
تاپسىرماعا سايكەس، قىزىلوردا وبلىسىندا ورمان شارۋاشىلىعى جانە جانۋارلار دۇنيەسى كوميتەتى، سونىمەن قاتار ورمان مەكەمەلەرىنىڭ كۇشىمەن بىلتىر 100 مىڭ گا جەرگە سەكسەۋىل كوشەتى وتىرعىزىلدى.
ال، 2022-2025 جىلدار ارالىعىندا جىل سايىن 250 مىڭ گا الاڭدا اعاش وتىرعىزىلماق.
ايتا كەتۋ كەرەك، بيىلعى كوكتەم مەزگىلىندە كوشەتتەۋ ارقىلى 12 مىڭ گەكتارعا سەكسەۋىل وتىرعىزىلدى. قالعانى كۇز ايلارىندا ەگىلەدى.
ۆيسە-مينيستر ارال تەڭىزىنىڭ قۇرعاعان تابانىن ورماندى اۋماققا اينالدىرۋ جۇمىسىنىڭ جوسپارعا ساي ءجۇرىپ جاتقانىن اتاپ ءوتتى.
سونىمەن قاتار، جەرگىلىكتى اتقارۋشى ورگاندارمەن بىرلەسىپ، ارالدىڭ ەكولوگيالىق پروبلەمالارىن شەشۋ جۇمىسىنا اتسالىسۋعا دايىن ەكەنىن جەتكىزدى.