بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ەڭبەك ينسپەكسياسى باسقارماسىنىڭ باسشىسى ەركىنبەك امىرعالييەۆ مالىمدەدى.
ول باسقارما ەڭبەك جاعدايلارى مەن جۇمىسشىلاردىڭ جۇمىس پروسەسىندە قاۋىپسىزدىگى سالاسىنداعى زاڭناما ەرەجەلەرىن، مىسالى، جۇمىس كۇنىنىڭ ۇزاقتىعى، جالاقى، ەڭبەك قاۋىپسىزدىگى، بالالار مەن جاسوسپىرىمدەردىڭ ەڭبەگىن پايدالانۋ جانە باسقا دا وسىنداي ماسەلەلەر بويىنشا ەرەجەلەردى قولدانۋدى قامتاماسىز ەتۋمەن اينالىساتىنىن ەسكە سالدى، دەپ حابارلايدى Almaty-akshamy.kz.
«ءبىزدىڭ باسقارما زاڭدى تۇلعا رەتىندە ادىلەت ورگاندارىندا اعىمداعى جىلدىڭ 15 ماۋسىمىندا تىركەلدى، دەگەنمەن ەڭبەك قاتىناستارى سالاسىنداعى فۋنكسيالار بۇرىن الماتى قالاسىنىڭ الەۋمەتتىك ءال-اۋقات باسقارماسى شەڭبەرىندە عانا جۇزەگە اسىرىلدى. ەڭبەك ينسپەكسياسى باسقارماسىن دەربەس مەملەكەتتىك ورگان رەتىندە ءبولۋ قازاقستان رەسپۋبليكاسى راتيفيكاسيالاعان حالىقارالىق شارتتاردىڭ نورمالارىنان تۋىندايدى، وعان سايكەس ەگەر ەڭبەك ينسپەكتورلارىنا باسقا فۋنكسيالار تاپسىرىلسا، وندا سوڭعىلارى ولاردىڭ نەگىزگى فۋنكسيالارىن جۇزەگە اسىرۋعا كەدەرگى كەلتىرمەۋگە جانە ينسپەكتورلاردىڭ كاسىپكەرلەرمەن جانە قىزمەتكەرلەرمەن قاتىناستارىندا قاجەتتى بەدەلىنە نەمەسە بەيتاراپتىعىنا قانداي دا ءبىر تۇردە نۇقسان كەلتىرمەۋگە ءتيىس، ياعني ەڭبەك ينسپەكسياسىنىڭ قىزمەتىندە مۇددەلەر قاقتىعىسىنا جول بەرىلمەيدى»، - دەپ ەركىنبەك امىرعالييەۆ جاڭا باسقارۋ سەبەبىن ءتۇسىندىردى.
جىل باسىنان باسقارما قىزمەتكەرلەرى ازاماتتاردىڭ ەڭبەك قۇقىقتارىن قورعاۋعا باعىتتالعان 320 جوسپاردان تىس تەكسەرۋ جۇرگىزدى. تەكسەرۋ بارىسىندا ەڭبەك زاڭناماسى نورمالارىنىڭ 390 بۇزۋشىلىقتار انىقتالدى، زاڭدىلىقتى بۇزۋشىلىقتى جويۋ تۋرالى 220 نۇسقاما بەرىلدى.
24،2 ملن تەڭگەگە 179 زاڭدى تۇلعا اكىمشىلىك جاۋاپكەرشىلىككە تارتىلدى (86 زاڭدى تۇلعانىڭ ەڭبەك اقىسىن ۋاقتىلى تولەمەگەنى ءۇشىن 18 ملن تەڭگە تولەندى). جەكە جانە زاڭدى تۇلعالاردىڭ 3 136 ءوتىنىشى قارالدى.
جالاقى بويىنشا 212 كاسىپورىندا 300،8 ملن تەڭگەگە بەرەشەك وتەلدى، وسىلايشا 642 قىزمەتكەردىڭ ەڭبەك قۇقىقتارى قورعالدى.
سونداي-اق ول جىل باسىنان بەرى وندىرىسپەن بايلانىستى 59 جازاتايىم وقيعا تىركەلگەنىن حابارلادى. زارداپ شەككەندەر سانى – 70، ونىڭ ىشىندە قايتىس بولعانى – 6 ادام، اۋىر دارەجەدەگى جاراقات العاندار –21 ادام، جەڭىل دارەجەدەگى جاراقات العاندار – 43 ادام.
ەڭبەك زاڭناماسىنىڭ نورمالارىن ءتۇسىندىرۋ بويىنشا قالا كاسىپورىندارىندا 2 236 ادامنىڭ قاتىسۋىمەن 87 كەزدەسۋ وتكىزىلدى.