الماتىدا پرەزيدەنتتىڭ تاپسىرماسى بويىنشا 2023 جىلدىڭ باسىنان بەرى 53 مىڭ جۇمىس ورنى قۇرىلدى
الماتىدا 2023 جىلدىڭ باسىنان بەرى 53 مىڭ جۇمىس ورنى قۇرىلدى. بۇل مەملەكەت باسشىسىنىڭ تاپسىرماسى بويىنشا ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا ىسكە قوسىلعان «جۇمىس ورىندارىن قۇرۋدىڭ وڭىرلىك كارتاسى» اياسىندا جاسالدى. باعدارلامانىڭ ماقساتى - بوس جۇرگەن ازاماتتاردى جۇمىسقا ورنالاستىرۋ ءۇشىن جاعداي جاساۋ.
اعىمداعى جىلى وسى كارتا اياسىندا الماتىدا 53 مىڭ جۇمىس ورنى، ونىڭ ىشىندە ۇلتتىق جوبالار بويىنشا قۇرىلعان 16 مىڭ جۇمىس ورنى، جەكە باستامالار اياسىندا شوب سۋبەكتىلەرى – 38 مىڭ جۇمىس ورنى.
سونىمەن قاتار، 2023 جىلدان باستاپ مەملەكەت باسشىسىنىڭ جاستاردى قارجىلاندىرۋدىڭ جاڭا قۇرالىن ۇسىنۋ جونىندەگى تاپسىرماسىن ورىنداۋ ماقساتىندا ەڭبەك مينيسترلىگى جاستارعا شاعىن نەسيە بەرۋ جوباسىن ىسكە قوستى. جوبانىڭ ماقساتى جاستاردى مەملەكەتتىك قولداۋمەن قامتۋدى كەڭەيتۋ بولىپ تابىلادى. ميكروكرەديتتەر ءوز ءىسىن اشۋ نەمەسە كەڭەيتۋ ءۇشىن 21 جاستان 35 جاسقا دەيىنگى جاستارعا، جەكە كاسىپكەر رەتىندە تىركەلگەن جاعدايدا، مەرزىمى 5 جىلدان اسپايتىن مەرزىمگە بەرىلەدى. الماتى قالاسى بويىنشا جوبانى ىسكە اسىرۋعا 667 كاسىپورىن ءۇشىن 3،3 ملرد. تەڭگە ءبولىندى.
بۇدان باسقا، جاڭا بيزنەس-يدەيالاردى ىسكە اسىرۋعا 400 اەك-كە دەيىنگى گرانتتاردى ىسكە اسىرۋ جالعاستىرىلدى. ولار حالىقتىڭ الەۋمەتتىك وسال توپتارى قاتارىنداعى ادامدارعا كونكۋرستىق نەگىزدە ۇسىنىلادى. مۇنداي گرانتتاردى 188 ادام الدى. گرانت قاراجاتى حالىقتىڭ جەكەلەگەن الەۋمەتتىك ساناتتارىنا جاتاتىن ءوزىن-وزى جۇمىسپەن قامتىعان جۇمىسسىزدارعا وزدەرىنىڭ بيزنەس-الەۋەتىن ىسكە اسىرۋعا، ءوندىرىستى جولعا قويۋعا جانە دامىتۋعا، سول ارقىلى وزدەرىن تۇراقتى تابىسپەن قامتاماسىز ەتۋگە مۇمكىندىك بەرەدى.
سونداي-اق، جۇمىسپەن قامتۋدىڭ ءتيىمدى قۇرالى رەتىندە كاسىپكەرلىك نەگىزدەرىنە وقىتۋ ءوزىن كورسەتتى. 2022 جىلى 3 مىڭنان استام ادام وقىدى، ونىڭ 936-سى ءوز بيزنەسىن اشتى. بۇل رەتتە كاسىپكەرلىك نەگىزدەرىنە وقىتۋ جانە كاسىپكەرلىك باستامالاردىڭ business.enbek.kz. ءبىرىڭعاي پورتالى ارقىلى گرانتتار بەرۋ بويىنشا بيزنەس-پروسەستەر اۆتوماتتاندىرىلدى.
ايتا كەتەرلىگى، جۇمىس بەرۋشىلەر ۇسىنعان بوس جۇمىس ورىندارىنا ازاماتتار ەلەكتروندىق ەڭبەك بيرجاسى ارقىلى ءوز بەتىنشە جۇمىسقا ورنالاسا الادى.