پرەزيدەنتتىڭ باستاماسى
الماتى بالاباقشالارىندا تاربيەشىلەر 100-120 مىڭ تەڭگە كولەمىندە ايلىق الادى. بۇل وتە از. وسىعان وراي، پرەزيدەنت جولداۋىندا بالاباقشالا تاربيەشىلەرىنىڭ جالاقىسىن كوتەرۋ تۋرالى ايتقانى ولاردىڭ جۇمىسىنا ۇلكەن سەرپىن بەرمەك. بۇل تۋرالى الماتى قالاسى ءماسليحاتىنىڭ دەپۋتاتى ارايلىم شاموۆا ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«بۇگىن پرەزيدەنت قاسىم-جومارت توقايەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا بەس باعداردى اتاپ ءوتتى. ءوزىم ءبىلىم سالاسىنىڭ مامانى بولعان سوڭ، اۋەلى ءبىلىم سالاسىنا توقتالماقپىن. پرەزيدەنت جولداۋدا بالاباقشا تاربيەشىلەرىنىنىڭ جالاقىسىن كوتەرۋ تۋرالى ايتتى. راسىندا، قازىرگى تاڭدا بالاباقشا تاربيەشىلەرىنىڭ ەڭبەكاقىلارى تومەن. الماتىدا تاربيەشىلەر 100-120 مىڭ تەڭگە كولەمىندە جالاقى الىپ ءجۇر. پرەزيدەنتتىڭ باستاماسى ولاردىڭ جۇمىستارىنا ۇلكەن سەرپىن بەرەدى دەپ ايتا الامىن»، - دەدى سپيكەر.
سونداي-اق ول الماتى مەكتەپتەرىندە وقۋشىنىڭ ورىن تاپشىلىعىن اتاپ ءوتتى.
«بيىل الماتىدا 1 سىنىپقا جوسپاردان بولەك، 2 مىڭ بالا ارتىق كەلدى. ەگەر پرەزيدەنت جولداۋىندا ايتقانداي، «جايلى مەكتەپ» جوباسى اياسىندا 2025 جىلعا دەيىن 800 مىڭ بالاعا ارنالعان مەكتەپ سالىنار بولسا، بۇل ماسەلەنىڭ شەشىمى تابىلادى دەپ ويلايمىن. سونىمەن بىرگە، ءقازىر «جاڭادان اشىلاتىن وسى مەكتەپتەر قاي تىلدە وقىتادى» دەگەن سۇراقتار قويىلۋدا. وعان مەملەكەت باسشىسى ناقتى جاۋاپ بەردى، ياعني، «سۇرانىس قاي تلدىە بولسا، مەكتەپ سول تىلدە اشىلادى»، - دەدى دەپۋتات.
ارايلىم شاموۆا 18 جاسقا دەيىنگى بالالارعا الەۋمەتتىك شوتتىڭ اشىلۋىن جولداۋداعى وتە قۇپتارلىق جاعداي ەكەنىن اتاپ ءوتتى.
«بۇل جەردە ۇلتتىق قوردىڭ ينۆەستيسيالىق تابىسىنان اقشا ءتۇسىپ وتىرادى جانە بۇل اقشانى بالا 18 جاسقا تولماي شوتتان شەشىپ الا المايدى. بالا 18 جاسقا تولعاننان سوڭ، شوتىنداعى قاراجات ءوزىنىڭ وقۋىنا نەمەسە ءۇي الۋىنا ۇلكەن كومەك بولماق»، - دەدى سپيكەر.