«الماتى جاستارى» باعدارلاماسى بويىنشا جاستارعا 2023 جىلدىڭ سوڭىنا دەيىن 55 يپوتەكالىق نەسيە بەرىلەدى، دەپ حابارلايدى almaty-akshamy.kz
بۇل تۋرالى ءماسليحاتتىڭ كەزەكتەن تىس XI سەسسياسىندا قارجى باسقارماسىنىڭ باسشىسى قانات سۋحامبەكوۆ مالىمدەدى. تۇرعىن ءۇي باعدارلاماسىن قولداۋ الماتى اكىمى ەربولات دوسايەۆتىڭ باستاماسىمەن جالعاسىپ كەلەدى.
«بيۋدجەتتەن قوسىمشا 965 ملن تەڭگە بولىنەدى. بۇل الەۋمەتتىك، قۇقىق قورعاۋ، كوممۋنالدىق جانە باسقا دا سالالاردا ەڭبەك ەتەتىن جاس ازاماتتار ءۇشىن قوسىمشا 55 يپوتەكالىق قارىز بەرۋگە مۇمكىندىك بەرەدى»، - دەدى قانات سۋحامبەكوۆ.
بيىل «الماتى جاستارى» جەڭىلدەتىلگەن تۇرعىن ءۇي نەسيەلەۋ باعدارلاماسىنا قاتىسۋعا 11 104 ادام ءوتىنىش بەردى.