الماتى اكىمى ەربولات دوسايەۆ المالى اۋدانى تۇرعىندارىمەن كەزدەسۋ بارىسىندا ەلەكترمەن جابدىقتاۋ ساپاسىن ارتتىرۋعا قاتىستى جوسپاردى ايتتى.
ونىڭ ايتۋىنشا، 2025 جىلى اۋداننىڭ جارىقتاندىرۋ دەڭگەيىن 100%-عا جەتكىزۋ جوسپارلانىپ وتىر. تۇرعىنداردى تۇراقتى ەلەكتر قۋاتىمەن قامتاماسىز ەتۋ ماقساتىندا 2024 جىلى رايىمبەك – ناۋرىزباي باتىر – مامەتوۆا – سەيفۋللين (1،3 كم) كوشەلەرى مەن جامبىل – اۋەزوۆ – اباي – روزىباكييەۆ (6،4 كم) كوشەلەرى اۋماعىندا 7،7 كم ەلەكتر جەلىسى جاڭارتىلدى. سونىمەن قاتار، 58،1 كم ەسكى كابەل جەلىسى جاڭعىرتىلىپ، 4،4 مىڭنان استام شام اۋىستىرىلدى جانە 193 جارىق باعاناسى ورناتىلدى. جالپى، 46 كوشە مەن 185 اۋلا قامتىلدى.
قالا باسشىسى بيىل دا جەلىلەردى جاڭعىرتۋ جالعاساتىنىن اتاپ ءوتتى. جوسپار بويىنشا 27،1 كم ەلەكتر جەلىسى جاڭارتىلىپ، 85 ترانسفورماتورلىق قوسالقى ستانسيا جوندەلىپ، 1 جاڭا ستانسيا سالىنباق. سونداي-اق 4،5 مىڭ شام جاڭارتىلىپ، 58 كم كابەل جەلىسى اۋىستىرىلىپ، 483 جارىق باعاناسى ورناتىلادى.
ەربولات دوسايەۆتىڭ ايتۋىنشا، 2022 جىلى باستالعان ەلەكتر جەلىلەرىن جاڭعىرتۋ بويىنشا جۇيەلى جۇمىس ءقازىردىڭ جەمىسىن بەردى. المالى اۋدانىنداعى ەلەكتر جەلىلەرىنىڭ توزۋ دەڭگەيى 80%-دان 61%-عا دەيىن تومەندەدى.