الماتى قالاسى الاتاۋ اۋدانىنىڭ 26 كوشەسى 2021 جىلى جوندەلەدى. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى كەزىندە الاتاۋ اۋدانىنىڭ اكىمى ازامات قالدىبەكوۆ مالىمدەدى، دەپ حابارلايدى almaty-akshamy.kz
«ءبىزدىڭ جۇمىسىمىزدىڭ نەگىزگى باعىتتارىنىڭ ءبىرى – اۆتوكولىك ينفراقۇرىلىمىن دامىتۋ. اۋداندا سامعاۋ، وجەت، شاڭىراق-5 جانە العاباس شاعىناۋداندارىندا جاڭا جولداردىڭ قۇرىلىسى باستالدى»، - دەدى ازامات قالدىبەكوۆ.
26 كوشەنىڭ 45 شاقىرىم جولىن جوندەۋ جوسپارلانعان. سونىڭ ىشىندە، نەگىزگى كوشەلەردىڭ بويىندا: سولتۇستىك اينالما جول 2،1 شاقىرىم (بوكەيحانوۆتان جۇمابايەۆ كوشەسىنە دەيىن)، رىسقۇلوۆ داڭعىلى 1،8 شاقىرىم (سايىننان ەمسوۆكە دەيىن)، رىسقۇلوۆ داڭعىلى 2 شاقىرىم (ەمسوۆتەن كۇدەرينگە دەيىن)، بۇرىنداي 2 كم (شوسسەينايا كوشەسىنەن بۇرىنداي كوشەسىنە دەيىن)، ەمسوۆ 0،3 شاقىرىم (رايىمبەك داڭعىلىنان رىسقۇلوۆ-ەمسوۆكە دەيىن). بارلىعى 8،4 شاقىرىم نەگىزگى كوشەلەر جوندەلەدى.
«ورتاشا جوندەۋ 36 شاقىرىمنان استام جەردە جۇرگىزىلەدى. بۇل سامعاۋ، توميريس، دارحان، كوك-قاينار، وجەت، سايالى، زەردەلى، 13-اۋماق، العاباس، بولاشاق جانە بورالداي شاعىناۋداندارىندا ورنالاسقان اۋداندىق جانە جەرگىلىكتى ماڭىزى بار كوشەلەر»، - دەدى اۋدان اكىمى.
بۇگىندە 7 كوشەدە: سەرىكوۆ، كىشى موڭكە بي، جاڭاارقا، تايقازان، حاليفا التاي، كارپاسكايا جانە ست «رادۋگا» جولداردى ورتاشا جوندەۋ بويىنشا جۇمىستار اياقتالدى.
الاتاۋ اۋدانىنىڭ اكىمى قازىرگى ۋاقىتتا اۋداننىڭ جارىقتاندىرىلۋى 85%-عا جەتكەنىن، ياعني 620 كوشە جارىقتانعانىن، 38 105 جارىق نۇكتەسى ورناتىلعانىن اتاپ ءوتتى.
ا. قالدىبەكوۆ وتكەن جىلى 413 كوشەگە 19 471 جارىق ديودتى شامدار ورناتىلعانىن ەسكە سالدى. بيىل 515 كوشەگە قوسىمشا جارىقتاندىرىلادى. وسىلايشا، جىل سوڭىنا دەيىن اۋداننىڭ جارىقتانۋى 100% بولادى.