دارىندى بالالاردى قولداۋعا ەرەكشە كوڭىل بولىنبەك
بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook پاراقشاسىندا جازدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
«كەشە الماتىدا قالا مەكتەپتەرىندە وقيتىن رەسپۋبليكالىق وليمپيادانىڭ جەڭىمپازدارى مەن جۇلدەگەرلەرىن قۇتتىقتادىم. جەڭىمپازدارعا ديپلومدارىن تابىستاپ، دارىندى بالالاردىڭ سۇراقتارىنا جاۋاپ بەردىم.بيىل جۇلدەلى ورىنداردى ەلىمىزدىڭ بارلىق ايماعىنىڭ 920 قاتىسۋشىسى يەلەندى. 183 وقۋشى التىن، 274 وقۋشى كۇمىس جانە 463 وقۋشى قولا مەدال يەگەرى اتاندى. ولار اۋداندىق، قالالىق، وبلىستىق وليمپيادالاردىڭ ەلەگىنەن ءوتىپ، رەسپۋبليكا كولەمىندەگى ۇزدىكتەردىڭ ۇزدىگى اتاندى. جاس قاتىسۋشىلاردىڭ جەڭىستەرى بارىنشا ءادىل بولۋى ءۇشىن بيىل ءبىز بارلىق دەڭگەيدەگى وليمپيادانى وتكىزۋ پروسەسىن اۆتوماتتاندىردىق. ياعني ولار ەلەكتروندى فورماتتا ءوتتى. بىلتىر وقۋشىلارىمىزدىڭ الەمدىك دەڭگەيدەگى وليمپيادالاردا جەڭىپ العان مەدالدارى رەكوردتىق كورسەتكىشكە جەتتى. بيىل ءوز رەكوردىمىزدى جاڭارتامىز دەپ ۇمىتتەنەمىن»، دەدى مينيستر.
سونداي-اق ول سوزىندە مەملەكەت باسشىسى قاسىم-جومارت توقايەۆتىڭ دارىندى بالالاردى قولداۋعا ەرەكشە كوڭىل بولەتىنىن اتاپ ءوتتى.
جاقىندا پرەزيدەنت حالىقارالىق پاندىك وليمپيادا جەڭىمپازدارىنا ءبىرجولعى اقشالاي تولەمدەردى تولەۋ نورماسىن قاراستىراتىن زاڭعا قول قويدى. التىن مەدال العان وقۋشىعا 1 500 اەك، كۇمىس مەدالعا 1 000 اەك، قولا مەدالعا 500 اەك كولەمىندە اقشالاي سىياقى بەرىلەدى. وقۋشىلاردى جارىسقا دايىنداعان پەداگوگتەرگە دە ءبىرجولعى سىياقى بەرىلەدى.
ودان بولەك، حالىقارالىق وليمپيادالاردىڭ جەڭىمپازدارى مەن جۇلدەگەرلەرىنە قازاقستاندىق جوو-عا ءتۇسۋ ءۇشىن اۆتوماتتى تۇردە گرانتتار بەرىلەدى.
«ءبىلىم جانە عىلىم مينيسترلىگى ەلىمىزدە بالالارعا جاعداي جاساۋ جانە وليمپيادالىق قوزعالىستى دامىتۋ جۇمىستارىن جالعاستىرا بەرەدى»، دەيدى اسحات ايماعامبەتوۆ.