بيىل 4 مىڭنان استام ادام سولتۇستىك وڭىرلەرگە قونىس اۋداردى. بۇل جايىندا پرەمەر-مينيستر ءاليحان سمايىلوۆ مالىمدەدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«مەملەكەت باسشىسىنىڭ تاپسىرماسىنا سايكەس وتكەن جىلى كوشى-قون ساياساتىنىڭ 2023-2027 جىلدارعا ارنالعان جاڭا تۇجىرىمداماسى (بۇدان ءارى – تۇجىرىمداما) قابىلداندى. تۇجىرىمدامانىڭ ءبىر باعىتى – بۇل قونىس اۋدارۋ باعدارلامالارىن قايتا قاراۋ ەسەبىنەن جۇمىس كۇشى ارتىق جانە جۇمىس كۇشى تاپشى وڭىرلەر اراسىنداعى دەموگرافيالىق تەڭگەرىمسىزدىكتى تەڭەستىرۋ ءۇشىن قازاقستاندىقتاردىڭ ىشكى ۇتقىرلىعىن ىنتالاندىرۋ»، - دەدى ۇكىمەت باسشىسى سەنات دەپۋتاتتارىنىڭ ساۋالىنا جاۋاپ بەرە وتىرىپ.
ونىڭ اتاپ وتۋىنشە، ءقازىر ەرىكتى تۇردە قونىس اۋدارۋ باعدارلاماسى اياسىندا ءبىرقاتار ءىس-شارا جۇزەگە اسىرىلىپ جاتىر.
«ماسەلەن، 2023 جىلى 8 652 ادامدى كوشىرۋ جوسپارلانىپ، وسى جىلدىڭ 1 شىلدەسىندەگى جاعداي بويىنشا 4 140 ادام نەمەسە جىلدىق جوسپاردىڭ 48 پايىزى (قانداستار 1 032 ادام جانە قونىس اۋدارۋشىلار 3 108 ادام) سولتۇستىك وڭىرلەرگە قونىس اۋداردى»، - دەدى ءاليحان سمايىلوۆ.