2025 جىلدىڭ باسىنان بەرى الماتىدا تۇراتىن 380 مىڭنان استام جاس كوميۋنيتي ورتالىقتاردىڭ قىزمەتىن پايدالاندى.
بۇل 14 پەن 35 جاس ارالىعىنداعى جاستارعا ارنالعان زاماناۋي كەڭىستىكتەر، مۇندا ولار ءبىلىم الىپ، جۇمىسقا ورنالاسىپ، الەۋمەتتىك جانە پسيحولوگيالىق قولداۋ الا الادى، - دەپ حابارلايدى Aqshamnews.kz.
بۇل تۋرالى الماتى قالاسى جاستار ساياساتى باسقارماسى حابارلادى.
وسى كەزەڭدە ورتالىقتاردا 1،6 مىڭنان استام ءىس-شارا وتكىزىلدى. جاستار قالا ءومىرىنىڭ مادەني، ءبىلىم بەرۋ، ەكولوگيالىق جانە ەرىكتىلىك باعىتتارىنا بەلسەندى قاتىسىپ كەلەدى. ءار اۋداندا جەرگىلىكتى جاستاردىڭ قىزىعۋشىلىعى مەن كوزقاراسىن كورسەتەتىن جەكە كوميۋنيتي قۇرىلىپ كەلەدى. NEET ساناتىنداعى (وقىمايتىن جانە جۇمىس ىستەمەيتىن) جاستارعا ەرەكشە كوڭىل بولىنگەن.
ماسەلەن، بيىل 6،2 مىڭنان استام ادامعا ەڭبەككە ورنالاسۋ جونىندە كەڭەس بەرىلىپ، 3،9 مىڭنان استام جاس تۇراقتى جۇمىسقا تۇردى. سونداي-اق، 1 مىڭعا جۋىق جاسقا پسيحولوگيالىق، ال 1،3 مىڭنان استام ءوتىنىش بويىنشا زاڭگەرلىك كومەك كورسەتىلدى.
كوميۋنيتي ورتالىقتاردىڭ جۇمىسى جۇيەلى تۇردە ۇيىمداستىرىلعان: جاستاردىڭ الەۋەتى باعالانىپ، جەكە دامۋ باعىتى ايقىندالادى، وقۋ مەن تالىمگەرلىك باعدارلامالارعا جانە ءارى قاراي جۇمىسقا ورنالاسۋعا مۇمكىندىك بەرىلەدى. ءار ورتالىق ءوز اۋدانىنىڭ ەرەكشەلىگى مەن جاستاردىڭ سۇرانىسىنا ساي جوبالاردى جۇزەگە اسىرادى.
قالالىق جاستار ساياساتى باسقارماسىنىڭ مالىمەتىنشە، جىل سوڭىنا دەيىن ءار اۋداندا ەكىدەن ورتالىق اشىلىپ، ولاردىڭ جالپى سانى ارتادى.
بۇگىندە الماتىدا قالا اكىمدىگىنىڭ جوبالىق كەڭسەسىنىڭ قولداۋىمەن 11 كوميۋنيتي ورتالىق جۇمىس ىستەيدى. بۇل جاي عانا كوۆوركينگتەر ەمەس، جاستاردىڭ پىكىر الماسىپ، مۇمكىندىگىن دامىتىپ، كومەك الا الاتىن ورتالىق الاڭدارى. مۇندا پسيحولوگيالىق جانە زاڭگەرلىك كەڭەس الىپ، كاسىبي باعداردان ءوتىپ، ءتۇرلى شەبەردىڭ دارىسىنە، ترەنينگ جانە زياتكەرلىك ويىندارعا قاتىسۋعا بولادى.